Kayonza: Abarezi n’abanyeshuri babangamiwe no kwiga mu magambo atagira ibikorwa

Akarere ka Kayonza ngo kagiye gukora ibishoboka gakemure ibibazo by’aya mashuri

Abanyeshuri n’abarimu bo mu mashuri y’uburezi bw’ibanze bw’imyaka 9 ndetse na 12 mu karere ka Kayonza, bahangayikishijwe no kuba ibigo byabo nta muriro bigira kuko bibangamira imyigishirize n’imyigire y’abanyeshuri aho hari amasomo amwe n’amwe bigoranye kwigisha nta muriro w’amashanyarazi.

Mu banyeshuri ndetse n’abarimu baganiriye na Makuruki.rw batifuje ko amazina yabo ajya ahagaragara, badutangarije ko kuba nta muriro bafite bibabangamira mu masomo ya bo kuko hari amasomo aba asaba kuba hari amashanyarazi harimo nko kwiga mudasobwa, bo bakaba bayiga mu buryo bw’amagambo (theory) nta gushyira mu bikorwa ibyo biga(pratique).

Ikindi ni ukuba imirasire ivugwa kuba yarahawe ibigo bitagira umuriro w’amashanyarazi ho ntayahageze ndetse n’abana bakaba batabona uburyo basubira mu masomo nimugoroba.

Umwe mu barimu bigisha mu rwunge rw’amaqshuri rwa Nyawera yagize ati”urabona hano nta muriro dufite, hari abantu bigeze kuzana na Depite Safari bavuga ko benda kuduha imirasire y’izuba ariko baragiye ntibagaruka, icyo bibangamyeho nko kwigisha mudasobwa ntaho abana bari bukore pratique na we bya guca intege kuko ni mu magambo gusa babyiga(theory) kandi nk’abiga mu wa gatatu n’uwa gatandatu ntibabona uko basubiramo amasomo neza kuko nta muriro uba uhari.”

Uyu nawe ni umwarimu ku rwunge rw’amashuri rwa Rwimishinya mu murenge wa Rukara nawe yemeza ko babangamiwe no kuba nta muriro ikigo cya bo kigira.

yagize ati"nta muriro dufite, biratubangamira cyane kuko abana baratsindwa cyane kuko batabona umwanya wo gusubira mu masomo ndetse ikijyanye na mudasobwo bayiga mu magambo(theory) ntago babona uko bashyira mu bikorwa ibyo biga(pratique kuko nta muriro."

Asimwe William umuyobozi w’urwunge rw’amashuri rwa Nyawera, avuga ko imirasire ibasha kuba yacanira iri shuri nta yo bigeze bahabwa, gusa ngo iki kibazo bakaba barakigejeje ku buyobozi bw’akarere ka Kayonza kandi ngo bukaba bwarabijeje ko bugiye kubakorera ubuvugizi iki kibazo kigakemuka.

Harerimana Jean Damascene, umuyobozi w’akarere ka Kayonza wungirije ushinzwe imibereho myiza y’abaturage aganira na Makuruki.rw, yavuze ko iki kibazo kitihariwe n’ibigo byinshi byo muri aka karere, bityo ngo bakaba bagiye gukora ibishoboka byose ngo ibi bigo bibone umuriro.

Yagize ati”Ni ibigo byinshi dufite bifite icyo kibazo, gusa mu bushobozi bw’akarere turimo turagerageza kuba twageza umuriro ku bigo by’ishuri aho bidakunze turimo gushaka uburyo twahashyira imirasire y’izuba.”

Uyu muyobozi yemeza ko akarere kagiye kwihutisha iki kibazo kugira ngo gikemuke vuba maze abana bige mudasobwa mu buryo bukwiye dore ko banazihawe ariko bakabangamirwa no kutagira umuriro w’amashanyarazi.

Yisangize Inshuti.

Ibitekerezo

Tanga Igitekerezo