Amwe mu mashami ya Kaminuza y’u Rwanda agiye guhuzwa

2

Inyubako ikoreramo Kaminuza y’u Rwanda

Kaminuza y’u Rwanda igiye kongera guhuza amwe mu mashami ayigize mu rwego rwo gukomeza gushaka ireme ry’Uburezi nkuko ubuyobozi bwayo bubitangaza.

Kaminuza y’u Rwanda igizwe na kaminuza zitandukanye zahoze ari iza Leta zahurijwe hamwe muri 2013 maze zibyara kaminuza imwe y’ u Rwanda (UR) yahise itangira no gukorera mu nyubako zakoreshwaga n’izo kaminuza.

Nyuma yaho habayeho guhuza amasomo, izo kaminuza zahujwe zatangiye kugendera ku ngengabihe imwe ndetse na bamwe mu banyeshuri bazo bakimurwa bakava aho bigiraga bakajya ahandi.

Urugero rumwe ni urw’abanyeshuri bigiraga I Huye ibijyanye n’ubuhinzi n’ubworozi bahujwe n’abanyeshuri bigiraga mu cyahoze ari ISAE Busogo ndetse n’abigiraga I Rubirizi mu mujyi wa Kigali, kuburyo abigiraga I Huye bajyanwe muri ayo mashuri, uretse abatangira umwaka wa mbere bakigira I Huye.

Icyakora bamwe muri abo banyeshuri ntibabyishimiraga kuko bavugaga ko kuva ahantu bari bamenyereye bakajya ahandi bigorana kandi n’ubundi bagiye kwiga nk’ibyo bigaga aho bari bari.

Ubu noneho hateganijwe kongera guhuza andi mashami (colleges), mu rwego rwo gukomeza guteza imbere ireme ry’uburezi.

Umuyobozi w’ishami ry’Indimi n’Ubumenyi mbonezamubano (College of Arts and Social Sciences: CASS) Dr. Usta Kayitesi mu kiganiro cyihariye na Makuruki.rw, yavuze ko hateganijwe kongera guhuza andi mashami ya Kaminuza y’u Rwanda mu rwego rwo kuzamura ireme ry’ibyo yigisha.

Yavuze ko nko mu ishami ayobora harimo abanyeshuri bagaragaje ko ibyo biga bijyanye n’uburezi bityo basaba ko bajyanwa mu ishami ry’uburezi riri I Kigali. Yavuze ko ishuri ry’ indimi rizahuzwa n’ishami ry’ Uburezi bikaba ishami rimwe kandi ko bishoboka ko hari n’andi mashami azahuzwa kuko ngo hari aho usanga amasomo biga asa.


Dr Usta Kaitesi umuyobozi wa CASS

Yagize ati “Ni igitekerezo kigali cyane twatangiye kuganiraho ariko kitaremezwa. Twavuze ko abari mu itsinda ririmo kubitegura bazagenda bakabiganiraho n’ abayobozi b’amashuri bakazana n’ibitekerezo bivuye muri Sena kuko ari rwo rwego rufata ibyemezo bijyanye n’uburezi[…] ni byemezwa ishuri ry’indimi rizahuzwa n’ishami ry’ uburezi”.

Icyakora yavuze ko abasanzwe biga indimi I Huye atari bo bazatangirana no kwigira hamwe n’ abo mu ishuri ry’uburezi ahubwo ko haherwa ku banyeshuri bazaza mu mwaka wa mbere n’ubwo ngo byose bikiri kwigwaho.

Yasabye kandi abanyeshuri kumva ko impinduka zose zikorwa kugira ngo babashe kubona uburyo bwiza bwo kwiga ndetse bakanita n’aho ibyo bakeneye ngo bige neza biherereye.

Kaminuza y’ u Rwanda ifite amashami (Colleges) atandatu abarizwa hirya hirya no hino mu gihugu mu nyubako zahoze zikorerwamo na kaminuza zari iza Leta mbere y’uko zihurizwa hamwe ngo zivemo kaminuza imwe.

Donat NIYITANGA

MAKURUKI.RW

Yisangize Inshuti.

Ibitekerezo 2

  1. Sinibaza niba abasanzwe biga indimi i Huye batazahuzwa. Nonese bazakomeza kwiga bitwe ko biga mu yihe college kdi zizaba zamaze guhuzwz?

    Mudusobanurize neza kdi bage batubaza natwe dutange ibitek

Tanga Igitekerezo