Gicumbi:Basinzira mu gihe cy’amasomo kuko batemerewe kurira ku ishuri no kujya iwabo

Kuri uyu wa Gatanu 16 Kamena 2017 ubwo hizihizwaga umunsi mukuru w’umwana w’umunyafurika, bamwe mu bana bagaragaje ko bagowe no kwiga nyuma ya saa sita kuko baba batemerewe kujya kurya iwabo mu rugo kandi batanemerewe kurira ku ishuri iyo batishyuye amafaranga yo kubatunga.

Bamwe mu bana baganiriye na Makuruki.rw ni abiga mu mashuri y’imyaka 9 na 12 y’amashuri y’ibanze (9&12 years basic education) bavuze ko bakigorwa no gufata ifunguro ku ishuri.

Umwe muri bo wiga mu Rwunge rw’amashuri Inyange Byumba (G.S.Inyange) yagize ati: “biratugora cyane kwiga nyuma ya saa sita kuko inzara iba iturya, abenshi muri twe turisinzirira mbese muri make nyuma ya saa sita ntitwiga neza.”

Aba bavuga ko nabo batakwanga gusangira n’abandi ku ishuri ariko ubushobozi buke butuma bajya gukina saa sita mu gihe abandi baba bagiye kurya.

Aba banyeshuri basaba ko ubuyobozi bw’ishuri bwajya bubareka saa sita bakajya iwabo mu rugo bagafungura kuko ngo kwigana n’abariye bo batariye bibagiraho ingaruka mu myigire yabo.

Iki kibazo aba banyeshuri ntibakivugaho rumwe n’umuyobozi w’ishuri bigaho kuko we avuga ko nta munyeshuri babuza kujya kurya, kuko ngo ababyeyi baza kubivuga kandi ngo ubona atazabona amafaranga y’umwana we bamuha uburenganzira umwana akajya ataha.

Nyirabahire Esperanse, umuyobozi w’ishuri G.S.Inyange yagize ati: “hari ababyeyi baza ku ishuri bakavuga ko amafaranga batarayabona wenda bakaduha ibyumweru bibiri ko bazaba bayabonye; icyo gihe umwana turamureka agasangira n’abandi. Hari n’umubyeyi uvuga ko nta mafaranga yabona yo kugaburira umwana we ku ishuri; uwo na we turamureka akajya ataha.”

Nubwo Nyirabahire ahakana ko batabuza abana kujya kurya mu ngo iwabo, ubuyobozi bw’akarere ka Gicumbi bwo bwemeza ko gahunda yo gufatira amafunguro ku mashuri itaragerwaho neza.

Benihirwe Charlotte, umuyobozi w’Akarere ka Gicumbi wungirije ushinzwe imibereho myiza y’abaturage yagize ati: “kugaburira abana ku ishuri ntibyari byagerwaho 100% ariko imyumvire igenda ihinduka tugereranyije no mu myaka yashize ariko turacyashishikariza ababyeyi kuzana bike bafite abana bakabifatira ku mashuri.”

Benihirwe akomeza avuga ko kubona abana bamwe bafata amafunguro abandi ntibayafate bitagira ingaruka mbi mu myigire gusa ahubwo bitera n’ipfunwe ku batabashije gusangira n’abandi.

Umunsi w’umwana w’umunyafrica wizihizwa buri mwaka ku itariki 16/6 kuri iyi nshuro ukaba wahuriranye n’umunsi mpuzamahanga wo kurwanya imirimo mibi ikoreshwa abana.

Insanganyamatsiko y’uyu mwaka ikaba ivuga ngo Twubake u Rwanda rw’ejo, turinda ibyagezweho mu kurengera abana.

Patrick Rurinda

Yisangize Inshuti.

Ibitekerezo

Tanga Igitekerezo