Gasabo:Hamaganywe isabukuru zo mu mashuri n’abarimu bazigize ubucuruzi

Abayobozi b’ibigo by’amashuri mu Karere ka Gasabo mu mujyi wa Kigali basabwe guca umuco uharawe na bamwe mu babyeyi bajya gukorera isabukuru abana babo igihe bari mu masomo ngo barabatunguye (Surprise).

Umunsi umuntu yavukiyeho ni imwe mu matariki akomeye umuntu atapfa kwibagirwa mu buzima bwe, ndetse bamwe buri mwaka bategura ibirori byo kuwizihiza, abandi bakabitegurirwa n’inshuti n’imiryango ariko imyiteguro ikaba mu ibanga ngo uwagize isabukuru bimutungure, biryoshye ibirori.

Mu mujyi wa Kigali ibi bintu bigezweho,buri munsi ibirori birakorwa, no mu mashuri ababyeyi bafite abana bamwe bajya babatungura mu gihe bari mu masomo.

Mu nama y’Uburezi y’Akarere ka Gasabo yabaye kuwa 05 Nzeli 2016, ushinzwe Uburezi mu Karere ka Gasabo Nzamwita Dismas yongeye kugaya uyu muco avuga ko nta kindi bimaze uretse kudindiza amasomo ndetse asaba ko bicika burundu.

Yagize ati “ Hari ibintu bya Anniversiare byaje ababyeyi bakagenda ku ishuri ngo baje gukorera umwana surprise (kumutungura) ku ishuri ubwo amasomo akaba arahagaze. Rwose ndabasabye ibyo bintu bihagarare, abazajya bashaka gukora anniversaire bajye bagenda babikorere iwabo.”

Yongeho ko kandi hari abarimu babibonyemo umushinga, aho baka abanyeshuri imisanzu ngo bazakorere mugenzi wabo ibirori nyamara imwe cya kabiri cy’amafaranga yatanzwe kikigira mu mifuka y’abo barimu.

Yagize ati “Hari abarimu usanga babishyushyemo bigize ba marraine (ababyeyi b’abana) bagakusanya amafaranga niba umwana atanze 1000 magana atanu akajya mu mufuka we.”

Gukorera abana iminsi mikuru mu gihe byabangamira amasomo ariko na none kubica bishobora kutoroha mu gihe nta bihano runaka byashyiriweho ababikora ndetse uko kubica bikaba ari umwihariko kuri Gasabo gusa.

Yisangize Inshuti.

Ibitekerezo

Tanga Igitekerezo