Diane, umukobwa w’umukanishi aragaragaza uko yakira gukorana n’abahungu n’imbogamizi ahura na zo

Uwitije Diane ni umukobwa urangije ubukanishi mu ishuri rya EMVTC Remera, n’ubwo arangije ariko yari asanzwe akora aka kazi k’ubukanishi, aravuga uko akorana n’abahungu ndetse n’uko yiyemeje gukora uyu mwuga kimwe n’imbogamizi ahura na zo nk’umwali.

Mu Rwanda abakobwa bakora uyu mwuga w’ubukanishi baracyari bake cyane ndetse n’ababyiga baracyari ku kigereranyo cyo hasi. Niyo habonetse ubyiga bigaragara nk’igitangaza kuko bidasanzwe kubona umukobwa ujya munsi y’ikinyabiziga akagikanika.

Uwitije Diane ari mu bakobwa bake batinyutse kubyiga akaba aherutse no kubihererwa impamyabushobozi muri EMVTC. Akomeza avuga ko kwikuramo isoni no kwiyumvisha ko ashoboye ariyo ntandaro yo kubyiga.

Ati :”Kugira ngo nze kwiga uyu mwuga icya mbere niyumvisemo ko nshoboye ndetse n’abo bahungu babikora ntacyo bandusha, ibyo ni byo nabanje kwishyiramo bwa mbere ikindi bisaba kwikuramo ibintu by’isoni ubwoba ugakamirika nyine ukabazamo kuko biba bigoye kubazamo. Urabona nkanjye ni jye mukobwa jyenyine ugasanga rero birakujennye ukuntu kubiyakiramo ariko bigeraho bikaza ukabimenyera.”


Diane yagaragazaga ubumenyi afite mu bukanishi

Diane n’ubwo ari bwo akirangiza ariko ngo asanzwe akora, yamaze kubona igaraje akoreramo, ubu ubukanishi ni ko kazi ke ka buri munsi.

Avuga ko gukora aka kazi uri umukobwa bitaburamo imbogamizi kuko akenshi uba ukorana n’abahungu gusa kandi bakagukorera ibyo utamenyereye, iyi ikaba ari imbogamizi ikomeye kuri we n’ubwo ageraho akabimenyera.

Ati :”Imbogamizi zirahari usanga nko mu igaraje kubera ko uba uri nk’umukobwa umwe cyangwa babiri biba bigoye, usanga bakubangamira ukuntu utamenyereye . Urabona nk’abakobwa, umuhungu kuza kugufatafata uba wumva atari byo bitakunyuze. Barabikora ariko bageraho bakabireka kuko baba babona nta kintu bigutwaye, ugeraho nawe ukiyakira nyine kuko nta kundi nyine uba warabijemo.”

Uwitije Diane asaba abakobwa bagenzi be kwikuramo isoni kuko arizo zituma batagera ku ntego zabo ati:”Icyo nababwira icya mbere ni ukwikuramo ubwoba, ikindi kintu cy’isoni gikunda gutuma tutagera ku kintu runaka ibyo ni byo bagomba kwikuramo bwa mbere iyo ubyikuyemo rwose uraza ukisanzura ugakora nta kibazo.”

Uwitije avuga ko ubu yumva yiyizeye mu kazi cyane ko ubu noneho yanahawe impamyabushobozi. Avuga ko ubu ntacyo abahungu bakora we atakora ndetse ko n’abakiriya bishimira kumuha ikiraka n’ubwo basanga ari kumwe n’abahungu.

Yisangize Inshuti.

Ibitekerezo

Tanga Igitekerezo