REB yongeye kubura mu biganiro biyihuza n’abayishinja akarengane n’ubwambuzi

2

Ikigo cy’igihugu gishinzwe uburezi REB cyongeye kubura bitunguranye mu mishyikirano yagombaga kugihuza n’abahoze buhugura abarimu bigisha ururimi rw’icyongereza (mentors) iki kigo cyirukanye, imishyikirano yari iteganijwe kuri uyu 14 Nyakanga 2016 ku cyicaro cya Minisiteri y’Abakozi ba Leta n’Umurimo (MIFOTRA).

Mu kwezi kwa Nyakanga 2015 ni bwo REB yasezereye bamwe mu bari bashinzwe guhugura no gukurikirana abarimu bigisha icyongereza mu mashuri abanza n’ayisumbuye babwirwa ko bitewe n’uko hari amavugurura agiye kuba muri uwo murimo.

Aba bakozi bavuga ko REB yasheshe amasezerano (amasezerano yari kurangira muri Mata 2016) bari bafitanye ntiyabagenera ibyo bari bagenewe birimo amafaranga y’amezi bari basigaje ngo amasezerano yabo arangire nk’uko biteganywa n’amategeko.

Aba bakozi bitabaje Minisiteri ishinzwe abakozi ba Leta n’Umuririmo (Mifotra) kugira ngo ibarenganure maze hatangira ibiganiro byo kubahuza ku itariki ya 18 Gicurasi 2016 ntibyarangira, ariko bemeza ko bizasubukurwa tariki ya 07 Kamena 2016.

Iyi tariki ya 07 Kamena 2016 igeze aba barega REB batunguwe no kumva ko REB itabonetse kubera impamvu z’imirimo abayihagarariye batanze babwirwa ko bizasubukurwa mu kwezi kwa Nyakanga, ibintu bafashe nko gutinza ibiganiro nkana nk’uko babibwiye Makuruki.rw bakimenyeshwa iryo subikwa.

Murekezi Zacharie uhagarariye 46 barega REB yabwiye Makuruki.rw ko ku nshuro ya gatatu REB yitabiriye ibiganiro ku wa 07 Nyakanga 2016 gusa ngo icyo gihe ibiganiro byabaye nk’ibisubira irudubi kuko abari bahagariye REB bwa mbere atari bo baje ku nshuro ya kabiri ndetse birangira REB yanze kwemera ibyo ushinzwe umurimo muri MIFOTRA akaba ari nawe muhuza yababwiraga hafatwa umwanzuro w’uko bazagaruka kuri uyu wa 14 Nyakanga 2016 bagasinyirwa ubundi bakerekeza mu nkiko.

Yagize ati “ Ubushize bari bazanye n’umunyamategeko wabo bazana n’ushinzwe abakozi, itsinda ryari ryaje mbere risa n’irihinduka biba ngombwa ko dusubira inyuma kugira ngo babyumve neza, naho turabatsinda kuko MIFOTRA yo irababwira ngo contract igomba kwishyurwa…ubu ngubu ni bwo twari kugaruka avocat agatera kashe akabijyana mu rukiko.”

Undi witwa Jean de Dieu yabwiyiye Makuruki.rw ko batunguwe no kumva ko gahunda zisubitswe kuko ushinzwe umurimo muri MIFOTRA ngo yamuhamagaye saa tanu yamaze gufata inzira ajya I Kigali bitewe n’uko gahunda yari iri saa munani z’amanywa, bityo bakemeza ko bakomeje kubihomberamo kuko batega imodoka ndetse bakica n’imirimo yabo ngo baje mu biganiro na REB ariko ntiboneke.

Yagize ati “Fabien yampamagaye saa tanu nari ndi mu nzira nza, ubwo nta kundi tuzajya dukomeza gutakaza amafaranga n’umwanya kuko REB buri gihe irabura ariko nyine turahahombera.”

Jean de Dieu avuga ko nta mpamvu bigeze bamenyeshwa yatumye REB itaboneka gusa ngo bahawe indi gahunda yo kuwa 19 Nyakanga 2016.

Twashatse kumenya icyatumye REB ivuga ku mpamvu zatumye itakiboneka muri ibi biganiro maze umuyobozi Ushinzwe abakozi muri REB Mbarushimana Ghad atubwira ko nta mwanya wo kutuvugisha afite, ngo ibindi twabibaza muri MIFOTRA.

Ushinzwe Umurimo muri MIFOTRA, Mberamihigo Fabien yabwiye Makuruki.rw ko kuba REB itabonetse nta kibazo kirimo kuko n’aba baburana na yo babimenyeshejwe kandi bakabyemera.

Yagize ati “Nta kibazo kirimo, REB ntiyabonetse kandi twabibamenyesheje.”

Ubwo bongeraga guhura tariki 07 Nyakanga 2016, habonetse abandi bantu 134 na bo bavugaga ko bahuje ikibazo n’abo ba mbere, ariko REB ivuga ko batanga ikirego ukwabo bativanze na 46 batangiye kuganira mu mezi abiri ashize.

Arsene Muvunyi

MAKURUKI.Rw

Yisangize Inshuti.

Ibitekerezo 2

  1. REB irabeshya nta biganiro iragirana na 46 bareze imbere narimwe .ibirego byarakurikiranye icyambere ni cya kabiri Bose bagera 134 kuko si 46 gusa yambuye birazwi na reta KO bamentors bageraga mwi ijana nukurenga babanyarwanda aribo bitaga local mentors.

    Ahubwo abari abanyahanga aribo bitaga régional mentors abari bahawe akazi baturutse mubihugu Bya EAC nabo nuko bigiriye iwabo byabashobeye nibabyumva KO local mentors bashoye urubanza nabo byatinde gute bizarangira nabo bishyize hamwe baje kurega.

  2. REB irabeshya nta biganiro iragirana na 46 bareze imbere narimwe .ibirego byarakurikiranye icyambere ni cya kabiri Bose bagera 134 kuko si 46 gusa yambuye birazwi na reta KO bamentors bageraga mwi ijana nukurenga babanyarwanda aribo bitaga local mentors.

    Ahubwo abari abanyahanga aribo bitaga régional mentors abari bahawe akazi baturutse mubihugu Bya EAC nabo nuko bigiriye iwabo byabashobeye nibabyumva KO local mentors bashoye urubanza nabo byatinde gute bizarangira nabo bishyize hamwe baje kurega.

Tanga Igitekerezo