Abarangije kaminuza ngo bafite ibyishimo bivanze n’intimba ku mitima yabo

Bamwe mu banyeshuri basoje amasomo yabo muri kaminuza y’u Rwanda kuri uyu wagatanu taliki ya 29 Nyakanga 2016, baravuga ko nubwo bakoze ibirori byo kwishimira ko basoje amasomo ya kaminuza, ngo bababajwe nuko bagiye kongera umubare w’abize batagira akazi mu Rwanda nubundi wari kurwego rwo hejuru.

Umuhango wo gutanga impamyabumenyi wayobowe na Nyakubahwa Perezida wa Repubulika Paul Kagame waranzwe ahanini n’impanuro zahabwaga aba basoje amasomo yabo, zirimo ahanini kwihangira imirimo dore ko basoje ari benshi kandi imirimo bapiganira ari mike ugereranije n’umubare w’abashaka akazi.

Aba barangje amasomo ya kaminuza mu byiciro bitadukanye baganiriye na MAKURUKI bavuga ko umunsi wo gusoza amasomo ubu ari ibyishimo kuri bamwe n’ubundi baba bafite akazi, mu gihe abandi ngo baba bafite agahinda ku mutima batekereza aho bagiye kwerekeza kubera ko baba batizeye kuzabona ibyo bakora.

Umwe mu bo twaganiriye yagize ati:” Ndababwiye rwose maze iminsi nganira na bagenzi banjye, ubu ku mitima yacu dufite ubwoba buvanze n’agahinda kuko ubu twibaza aho turi bujye, turibaza aho tuzakura akazi n’ubundi gasanzwe kabona umugabo kagasiba undi ikitubabaje gusa ni uko tugiye kongera umubare w’abashomeri n’ubundi utari muto.”

Bakomeza bavuga ko nubundi ikibazo cy’ubushomeri kiraje inshinga Leta y’ u Rwanda bashingiye ku kuba nubundi ngo hari abasoje kaminuza mbere yabo nubu batarabona akazi, bakumva ko isi ibaguye hejuru.

Ibivugwa n’aba banyeshuri, ku rundi ruhand bisa n’ibyagarutsweho n’umukuru w’igihuhu mu mpanuro yabahaye, aho yababwiye ko aho bagiye hakomeye kurusha aho bavuye by’umwihariko ku bigendanye no kubona imirimo.

Yagize ati: “ku isoko ry’umurimo ntabwo buri wese abona umurimo uko abyifuza imirimo ishobora kuba na mike kuruta abayishaka, ubwo ni ukuvuga rero ko muri abo bayishaka ubwo ari benshi imirimo ikaba itangana na bo ubwo uwo mubare munini w’abayishaka bazayipiganira, bazayihanganiraho, abashoboye abe ari bo bajya imbere. Ndabategura kugira ngo mumenye ko hari ubundi buryo bw’ingorane zo kugera ku byo mwifuza.”

Icyakora ku rundi ruhande, umukuru w’igihugu yasabye aba basoje amasomo yabo gutekereza uko bakwihangira imirimo, abizeza ubufatanye mu kubashakira uko bakwiteza imbere, nubwo benshi muri aba banyeshuri bavuze ko bidashoboka kwihangira imirimo kuko ngo nta gishoro kandi ngo ugasanga ibintu byose ubu byaramaze gushorwamo imari.

Munezero Laetia umwe mu basoje amasomo uyu munsi ati:” Yewe birasa n’ibidashoboka ibyo kwihangira imirimo kuko ubu ibintu hafi ya byose usanga abantu barabyinjiyemo. Dore nkubu uraba ufite ibihumbi magatanu ugashaka icyo ukora ukakibura pe!”

Ku ruhande rwa bamwe mu babyeyi bari baherekeje abana babo, bo bavuga ko ngo batarumva ukuntu umuntu yabura akazi kandi arangje kaminuza.

Umukecuru Mukamurenzi waje aherekeje umuhungu we ati:” Umwana wanjye namutangiye amafaranga menshi kugira ngo yige, na we rero agomba gushaka ibyo akora, yabibura akihangira umurimo biramutse bimunaniye arangije kaminuza yaba ari igicucu.”


Uyu mukecuru waherekeje umwana we ngo Ntiyumva ukuntu umuntu yabura akazi arangije kaminuza

Ubushakashatsi bw’igerageza bwakozwe n’ikigo cy’ibarurishamibare muri Gashyantare 2016 bwerekana ko abari ku isoko ry’umurimo mu gihugu ubariyemo abafite akazi n’abatagafite ari 49.3%, muri bo 58.1% ni abagabo naho 41.5% basigaye ni abagore.

Muri icyo gihe mu Rwanda habarurwaga abaturage 6,611,000 bafite kuva ku myaka 16 kuzamura, abari ku isoko ry’umurimo bakaba 3,261 000; muri bo abafite akazi ni 2,831 000 mu gihe abatagafite ari 430, 000.

Iyi mibare isobanura ko kuba ubushomeri buri kuri 13.2%, bivuze ko mu bantu umunani harimo umwe udafite akazi. Ubushomeri mu bagore buri kuri 13% mu gihe mu bagabo ari 12.9%. Mu mujyi hari abashomeri benshi ugereranyije no mu byaro, kuko bangana na 15.9% mu gihe mu byaro ari 12.6%.


Bari bishimiye ibirori byabo ariko ku minima yabo bafite intimba y’ubusbomeri

Muneza Ferdinand

MAKURUKI.RW

Yisangize Inshuti.

Ibitekerezo

Tanga Igitekerezo