Abasoza amashuri abanza batangiye ibizamini bya Leta, hari ibihano kubazakopera

Minisiteri y’uburezi iratangaza ko itazabura guhana abanyeshuri bazafatwa bakopera ibizamini bya Leta bisoza amashuri abanza byatangiye kuri uyu wa 01 Ugushyingo 2016.

Ibi byagarutsweho na Munyakazi Isaac, umunyamabanga wa Leta muri Minisiteri y’Uburezi (MINEDUC) ushinzwe amashuri abanza n’ayisumbuye ubwo yatangizaga ibi bizamini ku mugaragaro.

Igikorwa cyo gutangiza ibizamini bisoza amashuri abanza cyabereye mu rwunge rw’Amashuri rwa Sainte Famille, mu gitondo cyo kuri uyu wa Kabiri, tariki ya 1 Ugushyingo 2016.

Umunyamabanga wa Leta muri MINEDUC Isaac Munyakazi yavuze ko Minisiteri y’uburezi yateganyirije ibihano bikarishye abazakopera cyangwa abazakopeza ibizamini.

Yagize ati: "By’umwihariko bagomba kwitwara neza mu bizamini kuko imyitwarire mibi ishobora kubabuza amahirwe, nubwo baba bagiye kubazwa haba hari n’uburere bwiza bagomba kugaragaza. Twafashe ingamba zikomeye zo gukumira icyo ari cyo cyose kijyanye n’uburiganya cyangwa se gukopera ibizamini, n’uwo byagaragaraho rwose yahanwa by’umwihariko kuko ibyo ni ibintu tutashyigikira."

Yasabye abanyeshuri kwirinda icyo ari cyo cyose cyabagusha mu mutego wo gukopera kuko ngo hari ibihano biteganyirijwe abazagwa muri uwo mutego.

Munyakazi yavuze kandi ko umunyeshuri usoza ikiciro runaka cy’amashuri adakwiye kugira ubwoba bwo gutsindwa ikizamini cya Leta kuko Leta iba yarabateguriye ibizamini bijyanye n’icyiciro barimo gusoza bityo ngo umunyeshuri ntakwiye kugira ubwoba bumushora mu mutego wo gukopera.

Yabasabye kwirinda igihunga ndetse abifuriza amahirwe masa mu bizamini batangiye.

Abazokora ibizamini bisoza amashuri abanza uyu mwaka ni 194,679 mu gihe umwaka ushize bari 168, 290. Ni ukuvuga ko abagiye gukora ibizamini bisoza amashuri abanza biyongereye ku kigero cya 16%.

Ibizami bisoza amashuri abanza byatangiye kuri uyu wa 01 Ugushyingo 2016 bikazasoza tariki 03 Ugushyingo 2016

Ibi bizamini bizakurikirwa n’ibindi bisoza icyiciro rusange cy’amashuri yisumbuye bizatangira tariki 9 Ugushyingo 2016 bisoze tariki 16 Ugushyingo 2016.

Hari kandi ibizami bisoza amashuri yisumbuye na byo bizatangira tariki 9 Ugushyingo 2016 ariko byo bikazasozwa tariki 18 Ugushyingo 2016.


Isaac Munyakazi mu kiganiro n’abanyamakuru kuri uyu wa kabiri

Bamwe mu banyeshuri bagiye gukora ibizamini bya Leta bisoza amashuri abanza bakurikiye impanuro za Isaac Munyakazi

Yisangize Inshuti.

Ibitekerezo

Tanga Igitekerezo