Igitabo ‘intambara ikomeye’ cyateje impagarara i Save, hari abanze kwiga ngo isabato yubahirizwe

64

Frère Egide Nsabimana umuyobozi wa TTC Save

  • Igitabo ’Intambara ikomeye’ ngo cyarabagumuye
  • Basabye kuruhuka ku isabato, byanze barataha
  • Umupasiteri umwe arashinjwa kubigiramo uruhare
  • Akarere kasabye ko abana bagarurwa ku ishuri

Abanyeshuri umunani biga mu mwaka wa gatandatu w’amashuri yisumubuye mu ishuri nderabarezi rya Save (TTC Save), basengera mu itorero ry’abadivantisiti baretse kwiga ngo kuko ishuri ribambura uburenganzira bwo gusenga ku munsi w’isabato.

TTC Save ni ikigo cy’Abihayimana ariko gifashwa na Leta, kikaba kigwamo n’abanyeshuri b’amadini atandukanye harimo n’abadivantisiti b’umunsi wa karindwi bavuga ko bambuwe uburengenzira bwo gusenga ku isabato.

Kuwa Gatandatu ari nawo w’isabato abasengera mu badivantisiti b’umunsi wa 7 bahabwa umwanya wo gusenga kuva saa kumi n’ebyiri n’igice kugera saa mbili n’igice za mugitondo. Kuva saa mbili n’igice kugera saa tanu hakaba ugusubira mu masomo nyuma hakaba imirimo y’isuku, irangira abanyeshuri bajya mu byabo, saa kumi n’ebyiri z’umugoroba kugera saa moya n’igice abadivantisiti bagasubira ku gusoza isabato.

Umuyobozi bw’Ikigo Frère Nsabimana Egide yemeza ko batanga umwanya ungana kandi uhagije ku madini yose, gusa ngo bamwe mu banyeshuri basengera mu badivantisiti b’umunsi wa 7 biga mu mwaka wa gatandatu bavuze ko badashobora kugira icyo bakora ku isabato, bituma ishuri riboherereza ababyeyi babo ngo baze baganire ku myitwarire yabo ariko nabo baje bashyigikira ko abana babo bataha aho kutubahiriza isabato.

Yagize ati “Abo abana baravuze bati umudive ku isabato ntacyo agomba gukora ngo nibwo bakimenya ukuri, ngo hari igitabo bita intambara ikomeye, bati ntidushobora kuguma mu byaha…Tubanza kubatuma n’ababyeyi turabaganiriza, bahisemo kuvuga ngo bazagaruka baje gukora ikizamini cya leta n’ababyeyi babo banditse impapuro baziha ubuyobozi bw’Umurenge.”

Aba banyeshuri n’ubundi ngo bari basanzwe bikingirana mu mashuri no mu bwogero bagasenga ku munsi w’isabato.

Nsabimana Egide akomeza avuga ko mu gihe aba banyeshuri batemeye kuza mu kigo ngo bakurikize amategeko agenga abandi ngo bazakomeza babe hanze y’ikigo bazagaruke baje gukora ibizamini bya leta.

Igitabo cyitwa Intamba ikomeye n’umupasiteri uturiye ishuri nibo bagumura abanyeshuri.

Umuyobozi wa TTC Save Frère Nsabimana Egide avuga ko aba banyeshuri bagumuwe n’igitabo cyitwa “Intambara ikomeye” kigisha ko isi igiye kurangira dore ko batangiye kubikora muri iyi minsi ngo mbere batigeze babikora.

Yagize ati “Hari igitabo cyitwa ‘Intambara Ikomeye’ kigisha ngo isi igiye gushira harimo n’abana batubwiye ngo bajyaga babigisha bakababwira ngo ubundi barigira iki? Icyo gitabo twarakibambuye bwa mbere, ubwo hashobore kuba hari umupasiteri wabongeye ibindi.”

Uwo mupasiteri ukekwaho kugumura abo banyeshuri,ubuyobozi bw’ikigo buvuga ko butazi imyirondoro ye neza kandi ko kugeza ubu ari we ucumbikiye abo abanyeshuri mugihe bategereje kuzasubira ku ishuri bagiye gukora ibizami bya leta.

Ushinzwe uburezi mu Karere ka Gisagara Bigira Alexis avuga ko icyo kibazo bacyumvise ndetse ko bari bumvikanye n’Ubuyobozi bw’ishuri ko bureka abo banyeshuri bakagaruka kwiga ndetse bagahabwa uburenganzira bwabo bwo kubahiriza isabato nk’uko babisabye.

Yagize “Ikibazo turacyizi ndetse twanaganiriye n’ubuyobozi bw’ikigo ndetse n’abana ariko twagihaye umurongo, twabwiye ubuyobozi bw’ikigo ko buri munyeshuri aba afite ubwisanzure ku idini rye kandi ko atagomba kuvutswa kubera imyemerere ye, dusaba ubuyobozi bw’ikigo ko bwahamagara abana bakabagarura, bakiga niba ari ibizamini bakabishyira ku yindi minsi haba hariho kuwa Mbere, kuwa kabiri n’ubwo bakibashyirira ku Cyumweru kubera ko ari abadive ntacyo byahungabanya kuri bo.”

Bigira Alex avuga ko biteganijwe ko aba banyeshuri bagaruka kwiga kuri uyu wa 19 Nzeri 2016.

Mu Ishuri rya TTC Save hari abanyeshuri barenga 180 basengera mu idini ry’abadivantisiti b’umunsi wa 7, abagera ku 8 bonyine nibo banze gusenga ku masaha bahawe.

Yisangize Inshuti.

Ibitekerezo 64

  1. Abo banyeshuri bakomeze bihangane ni ibyanditwe biri gusohora kandi sibo gusa natwe muri TTC mbarizwamo niko bimeze mudusengere cyane

  2. Abo banyeshuri bakomeze bihangane ni ibyanditwe biri gusohora kandi sibo gusa natwe muri TTC mbarizwamo niko bimeze mudusengere cyane

  3. Abo bana bahagaze neza mu byizerwa rwose kuko najye ndangije amashuri yisumbuye kandi nagize amanota meza kuruta abandi nabagenzi banjye nyamara twaruhukaga isabato Yehova arakomeye ntazatuma ubwoko bwe buseba
    niyo bapfa bagahara ubuzima bwabo.

  4. 1 | 2 | 3 | 4 | 5 | 6 | 7

Tanga Igitekerezo