Abakoze n’abize muri Lycee de Rusatira bagiye gusubira ku isooko

10

Karangwa Charles wayoboye Lycee de Rusatira bwa mbere

Tariki 26 Kamena 2016 ababaye abarezi ndetse n’abanyeshuri mu ishuri rya Lycee de Rusatira bazasubira ku isoko bakuyeho ubumenyi bakesha aho bageze, bakazibukiranya amateka bahagiriye ari nako bereka abakihiga intambwe bakwiye gukurikiza kugira ngo batere ikirenge mu cyabo.

Abahoze ari abanyeshuri n’abarimu b’ishuri rya Lycee de Rusatira riherereye mu karere ka Huye, mu Murenge wa Kinazi, bahuriye ku mbuga nkoranyambaga zitandukanye harimo facebook na WatsApp bose hamwe basaga 300, akaba ari na ho haturutse iki gitekerezo cyo gusubira ku isoko bakuyeho ubumenyi.

Karangwa Charles wabaye umuyobozi w’iri shuri kuva rigitangira mu 1996 kugera muri 2008, avuga ko impamvu nyamukuru zatumye bazirikana ishuri bizeho harimo amateka meza yariranze, indagagaciro abahanyuze basangiye, umurage mwiza wahabwa abagihari ndetse no kuba hari icyo bamarira ishuri ryareze bamwe abandi bakaribera abarezi.

Yagize ati “icya mbere ni amateka twahagize mu buryo buturuhije, impamvu ya kabiri ni ukuvuga icyo kigo bakomeza uwo murage wacu, kuko umuntu ntago yatakaza izina ryiza yabonye yaba ahombye. Icya gatatu ni uko abantu bahize n’abahakoze hari indangagaciro dusangiye, hari n’ukuntu nyine ibyo byatwegeranyije turashaka rero kubigumana mu buzima bwo hanze. Impamvu ya kane hari ubushobozi twebwe dufite uyu munsi bishobora kugirira akamaro ririya shuri.”

Uwimana Jean Bosco uyobora umurenge wa Nyanza wo mu karere ka Gisagara akaba yarize muri Lycee de Rusatira kuva mu 1996 kugeza mu 1999, na we ashimagira ko abarerewe muri iryo shuri badateze kuryibagirwa we akabishingira ku buryo iri shuri ryatangiriye ku kantu gato ariko rikaba rimaze kuba ubukombe ndetse bikaba byarababereye impamba mu buzima bwabo.


Uwimana Jean Bosco uyobora umurenge wa Nyanza mu karere ka Gisagara mu bize muri Lycee de Rusatira

Yagize ati “ikintu gikomeye kimpora ku mutima cyigisha ubuzima ni ugutangirira kuri zero ukagera ku kintu gikomeye. Kuko ubuzima twari tubayemo ikigo cyari gitangiye gutyo, abantu bishakisha ariko ukabona ikigo kigeze ku rwego ruri hariya, na we ubwawe waratangiye nta cyizere ukaba ubona aho umuntu ageze.”

Uretse kuba abize n’abakoze muri Lycee de Rusatira bazahura bakaganira ndetse bagasabana, ngo bazanakina n’abanyeshuri ndetse n’abarimu imikino itandukanye irimo umupira w’amaguru, volley ball ndetse na basketball.

Umuyobozi wa Lycee de Rusatira ushinzwe imyitwarire y’abanyeshuri Ndagijimana Ernest, yatangarije Makuruki.rw ko bakiriye neza icyo gitekerezo cyo gusurwa n’abahize ndetse n’abahakoze kuko bngo bazabasangiza ku bunararibonye bakuye kuri iryo shuri bikazabafasha gutera ikirenge mu cyabo.

Amateka y’ishuri rya Lycee de Rusatira.

Ishuri rya Lycee de Rusatira ryatangiye tariki 24 Gicurasi 1996 ritangira ari ishuri ry’itorero ry’abangilikani bo muri diyoseze ya Butare, aho ryigagamo abanyeshuri bo mu cyiciro rusange (Tronc-commun).

Abayobozi b’iri shuri bagize igitekerezo cyo kuzanamo ishami ryigisha imyunga maze baryita Lycee Technique de Rusatira (LYTEC) ariko ntibyaza gushoboka kuko nyuma y’imyaka 3 bahise bazanamo ishami ry’ubumenya muntu (Sciences Humaines) rirongera ryitwa Lycee de Rusatira ari na ryo zina ishuri rifite kugeza ubu .

Iri shuri n’ubwo ritari rizwi cyane, ryagiye rikora amateka dore ko ritaburaga mu myanya 3 ya mbere mu mashuri yatsinze neza mu Karere ka Huye mu barangiza icyiciro rusange ndetse n’abarangiza amashuri yisumbuye, aho abanyeshuri babonaga amanota abajyana muri kaminuza ku bwinshi.

Kugeza ubu haracyari icyiciro rusange ndetse n’ishami ry’Amateka, Ubukungu n’Ubumenyi bw’isi (HEG).

Yisangize Inshuti.

Ibitekerezo 10

  1. Nigende Lycee de Rusatira ibaye ubukombe tuyishimiye ko yatureze tukaba turi abagabo bahamye Imana ikomeze iyishingishe ibirenge ikomere

  2. lyceeee ntabw nzakwibagirwa habe nagato kdi nanjye icyaguteza imbere nzagishyigikira nanjye uwo munsi ndahabaye kbx

  3. ahahaha nibyiza kweri ahubwo nuko twebwe batatubwiye cg ngobadushyire kuri group ya whats up

  4. Genda wa kigo we ufite amateka yo kurere neza nubwo abo wareze Bose batabonekera rimwe.Gusa komereza aho wa Kigo wee!!

Tanga Igitekerezo