Rwamagana:Arasaba gusubizwa ibikoresho bye byo mu nzu bimaze imyaka ibiri mu biro by’Akagali

Mukagatare Francoise

Hashize imyaka ibiri n’amezi 6 Mukagatare Francoise we n’abana be bakuwe mu nzu babagamo yari yubatse ahaguzwe na RSSB mu Kagali ka Nyagasenyi mu Murenge wa wa Kigabiro.

Iyi nzu babagamo yari yubatswe aho RSSB yaguze mu mwaka wa 2008, ishaka kuhubaka inzu zigezweho.

Abari baturanye na Mukagatare baraguriwe, ariko we hazamo ikibazo kuko inzu yabagamo yari ayifatanyije n’umugabo we Turatsinze Augustin kandi bari bamaze igihe batabana kubera ko yagiye kwishakira undi mugore.Inzu yari yarahawe Mukagatare ngo ariho arerera abana be.

Umugabo amaze kumenya ko RSSB iri kwishyura, yagiye kwishyuza atabibwiye umugore we.Mukagatare amaze kubimenya yagiye mu rukiko, narwo rutegeka ko amafaranga umugabo yishyuwe agarurwa, Mukagatare n’abana bagashakirwa aho kuba.

Umwanzuro w’urukiko nturubahirizwa n’inzego birebwa kuko amafaranga umugabo atarayagarura, gusa ngo hari aho yagiye kumugrira arahanga kuko ari kure, ikindi kandi ngo yagombaga kubyemera nyuma yo kugaragarizwa amafaranga yose RSSB yishyuye, akabona kwigurira aho ashaka.

Mugatare Francoise avuga ko kuwa 28 Werurwe 2014 ubuyobozi bw’Umurenge bufatanyije n’Akarere bwaje bukamusaba kuva muri iyo nzu, bushaka kujya kumushakira ahandi ho kuba.

Mukagatare yarabyanze, avuga azava mu nzu ye imyanzuro y’urukiko yubahirijwe.Ubuyobozi ngo bwapakiye ibikoresho byose byo mu nzu, babijyana mu nzu nshya bashakaga kumukodeshereza.

Babonye Mukagatare yanze kuyijyamo, barabyimuye babishyira mu biro by’Akagali ka Sibagire ari naho bikiri kugeza ubu.

Yagize ati “Batubwiye ko bagiye kudukodeshereza inzu ndabyanga kuko icyo nashakaga n’uko twarangirizwa urubanza tukagurirwa inzu n’ingobyi yayo bisimbura iyo Turatsinze yari yarishyuwemo na caisse sociale..natunguwe no kubona abayobozi baje badusohora mu nzu,ibikoresho byo mu nzu byose babishyize mu modoka barabijyana, nyuma numvise ko babijyanye kubibika mu Kagali.”

Mukagatare yakomeje avuga ko ibikoresho byo mu nzu byangiritse, ndetse ngo hari n’ibyabuze, agasaba ubuyobozi kumusubiza ibyo bikoresho.

Ati “Nohereje umwana wanjye mukuru kureba aho biri ariko agarutse ambwira ko byinshi byangiritse ibindi ntabyo yahabonye,Twari dufite matela eshatu ariko umwana yambwiye ko ebyiri ntazo yabonye ku Kagali.”

Umukozi ushinzwe irangamimerere mu Murenge wa Kigabiro Mikebanyi Emmanuel yavuze ko ibyo bikoresho babikuye mu nzu Mukagatare yabagamo kugirango itazamugwira.

Mikebanyi aganira na Makuruki yagize ati “Nibyo twamukuye mu nzu yabagamo n’abana be kuko yendaga kubagwira, twashakaga kuba tumucumbikiye mu nzu idafite ikibazo kuko iyo yendaga kugwa kandi aho hantu hari harishyuwe n’icyahoze ari caisse sociale du Rwanda.Twari dutegereje ko abona aho arera abana be yabyaranye n’umugabo bahoze babana, mu gihe hataraboneka indi nzu isimbura iyo babagamo. Yanze ko tumufasha kubona irindi cumbi.”

Mikebanyi yakomeje avuga ko Mukagatare aramutse ashaka ibyo bikoresho yakwandikira umurenge akabisubizwa.

Ubuyobozi buvuga ko impamvu urubanza rumaze hafi imyaka 8 rutararangizwa, ngo ari amananiza Mukagatare n’umugabo we bakomeje kuzana.

Mukagatare yanze kujya mu nzu ubuyobozi bwamuhaye, arikodeshereza ndetse aba aguze ibindi bikoresho, mu gihe ategereje ko ibyemezo by’urukiko bishyirwa mu bikorwa.

Iki kibazo ngo yakigejeje ku nzego zirimo Urwego rw’Umuvunyi, Inteko Ishinga Amategeko, Minisiteri y’Ubutabera n’iy’Ubutegetsi bw’Igihugu n’izindi,ndetse na Minisitiri w’Intebe ariko nta gisubizo yabonye.

Yanandikiye Perezida wa Repubulika abinyujije kuri twitter, Ubuyobozi bw’Intara y’Uburasirazuba bumwizeza ko burabukemura ariko ntibirakorwa.

Yandikiye Perezida Kagame kuri Twitter asaba kurenganurwa

Justin NGABONZIZA

Yisangize Inshuti.

Ibitekerezo

Tanga Igitekerezo