Rwamagana: Barasaba kurangirizwa imanza zimaze imyaka 10 ziciwe na Gacaca

Bamwe mu bacitse ku icumu rya Jenoside yakorewe Abatutsi batuye mu kagari ka Nsinda mu murenge wa Muhazi mu karere ka Rwamagana, baravuga ko ubuyobozi bw’akagari bwanze kubarangiriza imanza batsinze mu nkiko Gacaca mu myaka 10 ishize.

Abo baturage baribaza impamvu hashize imyaka 10 batsinze imanza zishingiye ku mitungo yabo yangijwe mu gihe cya Jenoside yakorewe Abatutsi mu 1994 kandi baraziburanye mu nkiko Gacaca bakazitsinda.

Kabazayire Melannie, umwe muri abo baturage avuga ko barambiwe guhora basaba kwishyurizwa imitungo yabo yangijwe kandi barayiburanye bakayitsindira.

Yagize ati: ”twatsindiye kwishyurwa imitungo yacu yangijwe muri Jenoside ariko ikibabaje nuko tumaze imyaka 10 yose bataratwishyura kandi nta wanze kutwishyura ahubwo umuyobozi w’akagari ntaturangiriza imanza niyo tubivuze atubwira nabi ku buryo twacitse intege”.

Yakomeje avuga ko bafite ibibazo byinshi birimo n’imibereho mibi kubera kutitabwaho, ati “Nasigaye njyenyine kuko umuryango wanjye wiciwe i Gishari nyamara n’inka nahawe gitifu yarayinyambuye kuko nari ngiye kuyiragiza, urebye n’inzu nubakiwe irenda gusenyuka ku buryo iyo batwishyuriza mba naranayisannye .”

Musoni Francois nawe usaba kurangirizwa imanza z’imitungo yemeza ko batishyurwa kubera ko gitifu w’akagari yanze kubishyuriza imitungo yabo.

Musoni Francois yagize ati: “Ubundi gitifu Valens akiri muri aka kagari yagerageje kutwishyuriza ariko haje Donatha ntiyigeze adufasha kurangirizwa imanza, ahubwo yakomeje kutunaniza kuburyo twabuze icyo twakora .”

Umunyabanganshingwabikorwa w’akagari ka Nsinda Dukuzumuremyi Donatha yabwiye MAKURUKI ko imanza nyinshi zarangijwe ariko hari izitararangizwa bitewe n’abaturage batuzuza ibisabwa.

Yagize ati:”imanza nyinshi zararangijwe kandi iyo umuntu yujuje ibisabwa tumurangiriza urubanza, naho kuba hari abatararangirizwa imanza bishobora no guterwa nabo ubwabo bitewe n’imyumvire yabo ,kurangiza imanza bijyana n’amategeko, gusa ugasanga hari bamwe bifuza ko imanza zirangizwa uko bamwe babyifuza kandi ntabwo twarangiza urubanza rutariho kashe mpuruza.”

Gitifu yahakanye ko ananiza abamusabye kubarangiriza imanza ahubwo ngo ababivuga bafite izindi mpamvu zibibatera.

Ati “ Ntawe twakira nabi ahubwo ababivuga bafite impamvu zibibatera kuko ntabwo ari benshi, rwose nta kibazo gihari”

JUSTIN Ngabonziza

Yisangize Inshuti.

Ibitekerezo

Tanga Igitekerezo