Nyaruguru: Abaturage barashinja abayobozi babo kubasiragiza

Bamwe mu baturage batuye mu mirenge itandukanye y’akarere ka Nyaruguru by’umwihariko mu mirenge ya Kivu, Ngoma na Munini, baravuga ko barambiwe kwirirwa basiragira mu nzego z’ibanze bashaka ababakemurira ibibazo kuko ngo bababwira bati muzagaruke ejo kugeza ubwo barambiwe bakareka serivise bashakaga.

Icyo bahurizaho ngo ni ukuba mu kwezi kwahariwe imiyoborere myiza, ndetse niyo hari umuyobozi mukuru ku rwego rw’igihugu uri bubasure nka Perezida wa Repubulika, ari bwo abayobozi babo bibuka ko bagomba kwegera abaturage bakabakemurira ibibazo.

Mukamulisa Jaqueline utuye mu murenge wa Munini, avuga ko hashize hafi amezi abiri asiragira ku bayobozi b’umumurenge ashaka ko bamukemurira ikibazo afite yita ko ari icy’akarengane ariko ngo bagakomeza kumusiragiza bamubwira ngo uzagaruke ejo.

Kuri we ngo akaba asanga abayobozi rimwe na rimwe batita ku nshingano zabo kandi ari cyo bahemberwa. Ati: ”Nkubu nkanjye ndibaza niba abayobozi bajya bamenya ko impamvu bicaye hariya ari ukubera abaturage. Hari igihe tubagezaho ikibazo, bakirebera hirya, bakakubwira ngo genda uzaze ejo, warambirwa ukabivamo, ntabwo ari byo ni bajye bamenya ko impamvu bicaye hariya ari twebwe abaturage”

Ku ruhande rw’ubuyobozi bw’akarere ka Nyaruguru, umuyobozi ushinzwe imiyoborere myiza Uwimana Raphael yabwiye MAKURUKI ko byaba ari agahomamunwa niba koko hari abayobozi bagifite imikorere nk’iyi.

Avuga ko ubusanzwe ari inshingano z’abayobozi gutega amatwi abaturage, bakabakemurira ibibazo kuko ari inshingano zabo. Ati:”Imiyoborere idashingiye ku nyungu z’abaturage ubwo koko iyo yaba ari imiyoborere? Natwe ntabwo ibyo bintu twabishyigikira, twakira ibibazo by’abaturage buri wa gatatu uwaba afite icyo kibazo cy’uwamusiragije yazabitubwira.”

Ikibazo nk’iki na none aba baturage bakigejeje kuri Minisitiri w’umutekano mu Rwanda, ubwo yajyaga kwifatanya na bo mu gusoza ukwezi kwahariwe imiyoborere myiza mu murenge wa Munini.

Aha abaturage bamusabaga ko ukwezi kw’imiyoborere kwajya kuba inshuro nyinshi, kuburyo ngo abayobozi bo ku nzego zo hejuru bajya babegera bakabasha kubakemurira ibibazo byananiranye.

Minisitiri w’umutekano Sheik Mussa Fazil Harerimana yababwiye ko nubwo abayobozi babarenganya bakanga kubakemurira ibibazo nkana, ngo abaturage na bo ubwabo bakwiye kugira uruhare mu kwishyiriraho abayobozi babona ko ari beza, maze ngo abababereye babi bakirinda kongera kubaha ubuyobozi kuko abaturage ari bo babutanga. Icyo gihe mu karere hakiriwe ibibazo bisaga 200 mu Mirenge yose igize aka karere.

Muneza Ferdinand

MAKURUKI.Rw

Yisangize Inshuti.

Ibitekerezo

Tanga Igitekerezo