Ngoma: Abatuye ahitwa i Nyamirambo barishyuza amashanyarazi bishyuye amafaranga yabo

Bamwe Mu baturage batuye ahitwa Nyamirambo mu murenge wa Karembo mu karere ka Ngoma, mu Ntara y’Iburasirazuba barishyuza Umuriro w’amashanyarazi bategereje imyaka itatu amaso akaba yaraheze mu kirere kandi baratanze asaga Miliyoni ngo bahabwe uwo muriro.

Bamwe mu baturage batuye mu kagari ka Nyamirambo mu Murenge wa Karembo mu karere ka Ngoma baganiriye na Makuruki bavuga ko bakusanyije amafaranga ngo babashe kwikururira umuriro w’amashanyarazi.

Bavuga ko bayahaye Ubuyobozi bwa Succursale ya Nyamirambo (agashami k’itorero gaturika) bizezwa ko bazabona umuriro ku buryo bworoshye ariko ngo ntibawubonye ndetse bavuga ko nta n’akanunu kawo bajya bumva.

Uwase Beatha utuye i Nyamirambo tuganira yagize ati: "Ibaze nawe,ubu twatanze amafaranga none imyaka itatu irihiritse kandi batwizezaga umuriro w’amashanyarazi, mutubarize aho byaheze’’.

Harindintwali Amos nawe utuye muri aka gace yagize ati:’’twakusanyije agera kuri Miliyoni none nta muriro baduhaye ariko barawutwizezaga,iyo tubajije Ubuyobozi bw’Umurenge mu Nama batubwira ko bazatubariza ku Karere ka Ngoma ariko twarahebye n’ubu’’.

Aba baturage bavuga ko Umurenge ubakoresha Inama buri gihe bakabizeza ko bizababariza ubuyobozi bw’akarere Karere ubundi bakababwira ko iki kibzo kiri kwigwaho.

Gusa ngo kuba imyaka imaze kuba itatu, ni ikigaragaza ko birengagijwe cyangwa bakaba babeshywa ko ikibazo cyabo kirimo kwigwaho kandi mu by’ukuri nta muntu ubyitayeho.

Ushyirwa mu majwi ari na we Uyobora itsinda ryakusanyije aya mafaranga mu baturage b’i Nyamirambo i Karembo mu Karere ka Ngoma twagerageje kumuvugisha ntiyaboneka tumuhamagaye kumurongo wa Telephone nabwo biba uko.

Iki Kibazo Ubuyobozi bw’Akarere ka Ngoma buvuga ko butakizi cyane ko nta naguhunda ihari yo kujyna Umuriro w’amashanyarazi aho i Karembo.

Rwiririza JMV Umuyobozi wungirije w’Akarere ka Ngoma ushinzwe Ubukungu n’Iterambere yagize ati: ’’Iki kibazo ntacyo tuzi,nta na gahunda yo kujyana amashanyarazi i Karembo Akarere ka Ngoma gafite cyakora wenda niba ari abaturage bikusanyirije ubwabo ngo bazane amashanyarazi ,ubwo byashoboka,uretse ko natwe nk’Ubuyobozi tugiye no gukurikirana iki kibazo tube twarenganura abo baturage’’.

Hirya no hino mu Gihugu usanga abaturage batandukanye bakusanya Amafaranga ngo bahabwe Umuriro w’amashanyarazi bagamije kwiteza imbere kuko amashanyarazi ari imbarutso y’iterambere.

Gusa abatuye i Karembo mu Karere ka Ngoma bo bikusanyirije asaga Miliyoni ahagana muri 2015 ariko nan’ubu ntibayahawe n’abayabijeje.

Lucien KAMANZI
Makuruki

Yisangize Inshuti.

Ibitekerezo

Tanga Igitekerezo