Kwamamaza

IJWI RY’UMUTURAGE

Musambira:Abasigajwe inyuma n’amateka bababajwe no guhezwa muri gahunda za leta kubera amateka yabo

Yanditswe

kuya

na

Alexis Musabirema
Musambira:Abasigajwe inyuma n’amateka bababajwe no guhezwa muri gahunda za leta kubera amateka yabo

Abasigajwe inyuma n’amateka bo mu Mudugudu wa Mbare mu Murenge wa Musambira mu Karere ka Kamonyi barashinja inzego z’ibanze kugendera ku mateka, zikabafata nk’aho badashoboye, bityo bikabaviramo guhezwa kuri gahunda zashyiriweho guteza imbere Abanyarwanda batishoboye bigatuma baheranwa n’ubukene.

Abasigajwe inyuma n’amateka bacuruza inkono z’ibumba mu isoko rya Musambira mu Karere ka Kamonyi baremeza ko kubumba ari amaburakindi kuko ngo bitababuza gukena. Bavuga ko kubumba ari gakondo yabo, ariko ngo n’ubwo bakibikora n’uko ari ntayindi mirimo babona, kuko batagira amasambu yo guhinga, yewe ngo na gahunda za Leta zo guteza imbere abatishoboye nta n’umwe mu basigajwe inyuma n’amateka wo mu Mudugudu wa Mbare zigeraho.

Umwe muri bo witwa Nyakazungu yagize ati “Imibereho yo ntayo, ni ukubura ikindi dukora. Dore inkono barampa ijana ubu se ubona ryagutunga? Biba byifashe nabi, ariko rero iyo Imana ivuze ngo baho ubaho.”

Mugenzi we yungamo ati “Ni ukuza gushaka icyo turya kuko nta kindi kubumba byatumariye, gusa icyaduha aho duhinga kubumba twabireka. Nk’ubungubu nk’abana bacu ntibakiga kuko ntitwabona amafaranga yo kubishyurira, ubu basigaye babumba, abandi babonye kubumba bitababereye bishakira kwiberaho gisirimu, bigira iyo za Kigali.”

Abo Makuruki yasanze mu isoko rya Musambira bagize, bati “Mudusanze mu rugo niho mwabona imibereho yacu kuko ntacyo dufite”.

Umunyamakuru yagiye mu Mudugudu wa Mbare aho abasigajwe inyuma n’amateka batuye.
Byafashe iminota 12 mu modoka ngo umunyamakuru na babiri bagiye kumwereka uko babayeho imbona nkubone bagera aho batuye. Bahingukiye ku nzu ya Mazimpaka Eric, wari urwaye mu nda yicaranye n’abana be batatu.

Mazimpaka avuga ko nta bwishingizi mu kwivuza (mituelle de santé) afite bitewe n’uko yashyizwe mu cy’iciro cya 2 cy’ubudehe kandi ari umukene. Muri we ntabyiringiro afite kuko yumva ko iherezo ari urupfu, ati “jye mbona amaherezo yanjye bitewe n’ubumuga mfite ari ugupfa kuko ndababaye cyane, dore n’umugore wanjye aratwite kandi nta mituweli dufite ku buryo twagize ikibazo cyo kwibaza tuti ubu se aramutse abyaye byagenda gute, kandi kwa muganga ko batwaka mituweli.”

Uyu muryango wasabye umunyamakuru ko yakwinjira mu nzu ngo yihere ijisho, maze yinjiramo ayitamabagira yose. Icyo yasanzemo ni inzitiramubu ba nyiri urugo baryamaho, ahandi hari amashara abana bararaho.

Ba nyir’urugo bati “Reba rwose niba hari ikintu kirimo. Ubukene ni bwa bundi. Urareba ko ntaburyamo, ni ukwiryamira mu bishangara gusa. ubuyobozi buraturangarana, ukabona ntabwo butwitayeho kandi turi Abanyarwanda nk’abandi.”

Abasigajwe inyuma n’amateka batuye muri Mbare bemeza ko ubuyobozi bwabatereranye kandi bakwiye kugerwaho n’ibyiza nk’abandi banyarwanda.

Bakomeje gusaba umunyamakuru ko bamugeza no mu zindi nzu, na we arabemerera. Inzu ikurikiraho yari irangaye binjiramo n’ubwo bwose ba nyirayo batari bahari. Naho yasanze inzu nta kirimo.

Ubugira gatatu, binjiye mu rugo rwa Myorenzi Werarisi ushinzwe amakuru mu Mudugudu wa Mbare, nabo bariraga ayo kwarika.

Mu nzu yabo ntacyarimo usibye uburiri bumwe n’inkono zitaruma ngo zitwikwe. Maze Myorenzi ashimangira ko ibyo bakorerwa ari ivangura kandi bibababaza.

Akoresheje imvugo ibabaye, yagize ati “kudafatwa nk’Umuyarwanda pire [pure], icyo nicyo kibabaza Abanyarwanda nkatwe bahejejwe inyuma n’amateka, kuko twahejejwe inyuma n’amateka.”

Aba baturage bavuga ko nta gahunda n’imwe yaba Girinka, ingoboka n’izindi zashyiriweho guteza imbere abakene zibageraho kuko nta bwo waba udatunze n’inkoko ngo utunge inka.

Bashinja ubuyobozi kutamenya ko ibintu byahindutse, bukabaheza mu mateka

Abasigajwe inyuma n’amateka bavuga ko baramutse bafashijwe kwiteza imbere nk’indi miryango yose ikennye nabo bazamuka. Bemeza ko amateka yo gutungwa n’ububumbyi atakijyanye n’igihe, ahubwo ko bakwiye guhabwa inka, bakanubakirwa, ubundi ngo bakagawa nyuma ababahaye babonye ntacyo bigejejeho.

Bahamya kandi ko guhinga babizi kuko ngo bajya guca inshuro, ahubwo ikibazo bagira ari uko batagira aho bihingira ubwabo. Bavuga ko kutagira ubutaka ari uko bisanze kuva ku bisekuruza byabo, kugera uko bimeze ubu.

Umuyobozi w’gateganyo w’Akarere ka Kamonyi Tuyizere Thadée avuga ko bafasha abaturage bigendeye ku bushobozi bw’igihugu n’ubw’Akarere. Yemeza ko hari igihe umuturage koko aba akwiye inkunga yo kumuzamura, ariko ubushobozi mu Karere bukabura.

Gusa agashimangira ko abagenerwa gahunda zo kuzamura abatishoboye batoranywa n’abaturage ku buryo yumva ko nta we basimbuka, bagendeye ku wo ari we kandi akennye.

Tuyizere yagize ati “Iyo bagiye gutoranya abakwiye gufashwa bikorerwa mu baturage, bagahera ku batishoboye. Ubwo rero uwo udatoranywa, ushobora gusanga hari abandi bakennye kumurenza. Ntabwo uyu munsi wavuga ngo abahejejwe inyuma n’amateka ntibagerwaho na gahunda ya Girinka cyangwa indi nkunga yo kuzamura abatishoboye. Ahubwo iyo umuntu bitaramugeraho, aravuga ngo impamvu batampa n’uko ndi uyu, ariko nta bwo ari uko bimeze."

Uyu muyobozi asaba abaturage guharanira kubyaza umusaro duke bafite kugira ngo babashe kwigira.

Ubwo Perezida Kagame yiyamamarizaga kongera kuyobora u Rwanda yakomeje gushimangira ko kumutora ari ugutora iterambere rigera kuri bose.

Gusa kuri aba basigajwe inyuma n’amateka ngo nihatagira igikosorwa, ubukene burabahitana.



Aha niho baryama


Icyumba cy’ibintu

Ngirabakunzi Ignace @Makuruki.rw

IBITEKEREZO

Tanga igitekerezo


Kwamamaza Car Free Day/ 18/02/2018
INKURU ZAMAMAZA 10-08-2018

ITANGAZO RYA CYAMUNARA

Kwamamaza
Perezida KAGAME avuga ku manyanga mu Iyubakwa rya Hotel ya FERWAFA n’ikibazo cy’abana bo ku mihanda
KAGAME avuga kuri za Mission z’abayobozi zidasobanutse
IBYO ABANYAMAKURU BAVUGA KU IYEGURA RYA Fred MUVUNYI ku buyobozi bwa RMC
Uwari V/Perezida w’Urukiko rw’Urukiko rurinda Itegeko Nshinga/ Burundi
RUNIGA avuga uko bazinjira Congo
Ubutumwa bw’Umuturage kuri Perezida KAGAME
Kwamamaza