Meya Rwamurangwa yitabye abadepite kubera kudashyira mu bikorwa umwanzuro bafashe

Abadepite 2 (babanza ibumoso) Meya Rwamurangwa (hagati) abakozi 2 b’akarere ka Gasabo(babanza iburyo)

Komisiyo y’Ubumwe bw’Abanyarwanda, uburenganzira bwa muntu no kurwanya Jenoside ikorera mu Nteko Ishinga Amategeko yatumije ubuyobozi bw’Akarere ka Gasabo ngo butange ibisobanuro ku mpamvu yatumye Meya Rwamurangwa Stephen yanga gushyira mu bikorwa icyemezo cyo guha umuturage witwa Rutaganda John ingurane imukwiriye ku kibanza cye gifite metero 25 kuri 35 akarere kashyizemo umudugudu w’abatishoboye.

Rutagarama John ni umuturage utuye mu Murenge wa Kanombe ariko ubutaka bwe aburana bukaba buri mu Murenge wa Ndera mu kagari ka Mukuyu, mu karere ka Gasabo, avuga ko yabuguriwe n’akarere ka Gasabo tariki ya 05/02/2008 akarere kakabbwubakamo umugudugudu w’abatishoboye ariko ntikamuhe ingurane ikwiye.

Ibi byatumye muri 2014 Inteko Ishinga Amategeko itumira uwari umuyobozi w’Akarere ka Gasabo Ndizeye Willy baganira kuri iki kibazo ndetse yemera ko Inteko Ishinga amategeko nibyemeza, Rutagarama azahabwa ibibanza bibiri buri kimwe gifite metero 20/30 nk’ingurane y’ibyo akarere kubatsemo.

Bidatinze, tariki ya 17 Gicurasi 2015 Inteko Rusange y’Umutwe w’Abadepite mu Nteko Ishinga Amategeko yemeje ko Rutagarama agomba guhabwa ingurane y’ibibanza bibiri bisimbura ibye akarere ka Gasabo kubatsemo.

N’ubwo Inteko Ishinga Amategeko yemeje ko Akarere ka Gasabo kagomba guha ingurane ikwiriye Rutagarama, ngo batunguwe no kumva ko meya mushya w’Akarere ka Gasabo Rwamurangwa Stephen yabwiye uwo muturage ko nta bibanza akwiye guhabwa kuko ngo yahawe ingurane ukwiye ku butaka bwe.

Meya Rwamurangwa yemereye abadepite ko yanze gushyira mu bikorwa icyemezo cyari cyafashwe n’Inteko Rusange y’Umutwe w’Abadepite ariko yemera ko bongera kukiganiraho ndetse hagafatwa umwanzuro ubereye bose.

Ikibazo cyuzuyemo urujijo

Umuyobozi wa Komisiyo ishinzwe Ubutaka mu Karere ka Gasabo yavuze ko hari amakuru Rutagarama yathaye inteko ariko akaba adahura n’ari mu mpapuro z’akarere ka Gasabo ibintu byatumye iki kibazo kirushaho gukomera.

Byagaragaye ko uyu mugabo Rutagarama John akimara kubarurirwa ubutaka bwe tariki 02 Gashyantare 2008 ubu butaka yahise abugurisha uwitwa Kabayija jean Pierre amafaranga miliyoni 1 n’ibuhumbi 200 (1,200,0000Frw.)

Ikindi ni uko avuga ko yaguriwe ubutaka bwe n’Akarere ka Gasabo tariki 02 Gashyantare 2008 nyamara mu mpuro akarere kerekana ko iyo tariki ari bwo ubutaka bwabaruriweho bukagurwa tariki ya 19 Gicurasi 2009 agahabwa amafaranga angana na miliyoni 2 n’ibihumbi 500 (2,500,000Frw) ndetse agategekwa gusubiza Kabayija Jean Pierre amafaranga bari baguze ubwo butaka hiyongereyeho inyungu ingana n’ibihumbi 250 (250,000 Frw).

Icyiyongera kuri ibi ngo ni uko ubwo habarurwaga ubu butaka bwari bufite metero 20 kuri 30 ariko ubwaguzwe buri kuri metero 25 kuri 30, gusa ngo akarere kemeye kubwishyura kirengagije izo metero ibi bikaba bitarasobanuriwe abadepite ubwo bajyaga kureba iki kibazo i Ndera.

Ubuyobozi bw’Akarere ka Gasabo kandi ngo bwashatse kuvugisha uyu muturage ariko arabyanga ababwira ko ngo ikibazo cye hari aho kizwi kandi kiri gukurikiranwa.

Abadepite bagize Komisiyo y’Ubumwe bw’Abanyarwanda, Uburenganzira bwa Muntu no Kurwanya Jenoside basabye ubuyobozi bw’Akarere bwari bufite umurundo w’inyandiko bwerekaniragaho aho ukuri gushingiye, kubaha foto kopi ya buri kamwe maze bakazongera guhura na bo bamaze kubisoma banabisonukiwe.

Meya Rwamurangwa Stpehen yavuze ko nibigaragara ko uyu muturage yareze akarere, akagasiragiza kandi nta kuri afite na we ngo agomba gushyirwa mu igorora agahabwa inama zo kuba inyangamugayo.

Yisangize Inshuti.

Ibitekerezo

Tanga Igitekerezo