Gicumbi: Abaturage barinubira kuryozwa amakosa yakozwe n’abayobozi

Abaturage batuye mu karere ka Gicumbi barunubira kwishyuzwa amafaranga yo gukosoza amakosa yagiye agaragara ku byangombwa byabo by’ubutaka bakavuga ko batakagombye kwakwa ayo mafaranga kuko atari bo bakoze ayo makosa.

Kuba hari ibyangombwa by’ubutaka byagiye byandikwa bikagaragaramo amakosa, abaturage bajya kuyakosoza bagacibwa amafaranga ibihumbi bitanu (5,000),bamwe mu baturage bavuga ko ari akarengane kuko ngo aba atari bo banditse kuri ibyo byangombwa bityo ngo bakaba batagomba guhanirwa amakosa batakoze.

Iki kibazo cyagiye kigaragara hirya no hino mu mirenge igize akarere ka Gicumbi aho ikigo cy’umutungo kamere cyagiye kizenguruka mu minsi ishize mu karere ka hagamijwe kuzamura imyumvire y’abaturage ku mikoreshereze y’ubutaka no gukemura ibibazo bimwe na bimwe bijyanye n’ubutaka, ibidakemutse bigahabwa umurongo bigomba gukemukiramo.

Kuba nta ruhare abaturage bagize mu makosa yagiye agaragara ku byangombwa bimwe na bimwe by’ubutaka, abaturage bajya kubikosoza bakakwa amafaranga ibihumbi bitanu,bamwe mu baturage bo mu murenge wa Rwamiko baganiye na MAKURUKI babifata nk’akarengane bakorerwa.

Uwitwa Bugingo Jean Bosco yagize ati:” Kubikosoza ni ingorane dufite, kuko umuntu baramuca amafaranga kandi nta ruhare yagize mu kwandikaho amakosa, nubwo hariya birengagije bavuga ngo bazabikosora. Mu nzego z’ubuyobozi bagomba gukosora ayo makosa umuturage adaciwe amafaranga kuko nta ruhare aba yabigizemo”.

Undi witwa Niyonzima Boniface na we ngo asanga ari akarengane, akifuza ko bajya babibakosorera batabaciye amafaranga kuko ngo aba atari bo babigizemo uruhare.

Ati:” Hari inama yabaye ku kagari batubwira ko amakosa ari ku byangombwa twahawe mu kuyakosora nk’ahanditse izina rimwe cyangwa abindi umuntu agomba gutanga ibihumbi bitanu, tugasanga ari akarernga atari twe twabikoze tukumva nkuko baje kudukemurira ibibazo, uriya muyobozi ushinzwe iby’ubutaka hano ku murenge yabidukemurira nubundi nta mafaranga twatswe kandi twaratanze igihumbi cy’icyangombwa cy’ubutaka”.

Aya mafaranga abaturage bafata nk’amande bacibwa, ngo si amande mu by’ukuri ahubwo ngo yashyizweho n’iteka rya Perezida wa Repubulika, ibyangombwa byaratangiye gutangwa kuko ngo abakosoje amakosa mbere nta mafaranga batanze nk’uko Francine Uwase umukozi w’ikigo cy’umutungo kamere mu Rwanda mu bubiko bw’impapuro mpamo, akaba ashinzwe iyandikisha ry’ubutaka mu ntara y’Amajyaruguru yasubije ubwo yari abajijwe iki kibazo n’umunyamakuru wa MAKURUKI ubwo yari mu murenge wa Rwamiko.

Yagize ati: ”Akenshi ariya mafaranga bavuga, ni amafaranga ajyanye no gukosora ibyangombwa bishya ahenshi bamusaba gutanga bitanu, ariya mafaranga ubundi ategekwa n’iteka rya Perezida rigena ibiciro n’imisoro byinjizwa n’inzego zibanze, ni amafaranga ajya kuri konti y’akarere aho ubutaka buherereye”.

Akomeza agira ati: ”Uwajyaga gufata icyangombwa mbere yasanga kirimo ikosa byasubiragayo bikajya gukosorwa, hari igihe wasangaga amazina yanditse nabi cyangwa nimero y’irangamutu, icyo gihe byarakosorwaga bigakunda nta mafaranga yatswe”.

Gahunda yo kubarura ubutaka yarangiye mu mwaka wa 2013, nyamara kugeza ubu hari bamwe mu baturage batari bafata ibyangombwa by’ubutaka bwabo hakaba n’abandi babifashe ariko bikaba bikirimo amakosa agomba gukosorwa ari uko umuturage atanze amafaranga ibihumbi bitanu n’ubwo nta ruhare yaba yaragize mu ikorwa ry’ayo makosa.

NDARISABAMUNGU Paul Clement

MAKURUKI.RW /Gicumbi

Yisangize Inshuti.

Ibitekerezo

Tanga Igitekerezo