Gasabo: Arasaba kurenganurwa nyuma yo guteza cyamunara umutungo we nta nguzanyo yatse

1

Mu Karere ka Gasabo, Umurenge wa Kinyinya mu Kagali ka Kagugu umudugudu wa Gicikiza hari ikibazo cy’umugabo witwa Mporanyi Jean Nepomuscene uvuga ko yarenganyijwe nyuma yo kugura ubutaka bwo guturamo bukaza gufatirwa n’undi abwita ubwe.

Ubwo MAKURUKI yageraga aho uyu mugabo Mporanyi Jean Nepomuscene atuye yasanze umugore we n’abana bane batekeye hanze ndetse n’ibikoresho byo mu nzu byose birunze hanze bigaragara ko bari babasohoye mu nzu ndetse muri icyo gihe inzu y’uyu muryango bari barimo kuyisenya bahereye ku gipangu.

Mporanyi Jean Nepomscene avuga ko yaguze ubutaka muri 2013 n’uwitwa Kayitsinga Etienne wari ufite ubutaka yazunguyeho se witwa Semana Simon.

Ku cyangombwa cy’ubutaka hariho abantu 8 bari baraguze kuri ubwo butaka hakabaho n’ubutaka bw’ikigo cy’ishuli.

Uyu Kayitsinga ngo yari afite icyemezo cy’urukiko kimwemerera ko ari umuzungura wa se (Semana Simon) ariko nta cyangombwa cya burundu kiriho umwirondoro we afite.

Niyonizeye Bonavanture waguze ubutaka burimo ishuli yaje gufata inguzanyo ya Banki asaba Kayitsinga (uwo baguze) ko yamwishingira kuko ibyangombwa by’ubutaka byari bicyanditse kuri Kayitsinga.

Haje gutangwa inguzanyo ndetse hakorwa igenagaciro agwatiriza ibyumba by’ishuli, n’imbuga yaryo.

Niyonizeye yaje kubura ubwishyu Banki iza guteza cyamunara ingwate yari yaratanze.

Mporanyi yavuze ko yabajije Kayitsinga niba inzu ye itari mubyo bateza cyamunara, aramuhakanira amubwira ko inzu ye itarimo.

Mporanyi ngo yaje kujya kubaza banki iteza cyamunara niba ubutaka bwe butariho ngo yizezwa ko ntaburimo. Uyu mugabo avuga ko uwaguze mu cyamunara yasobanuriwe ko ubutaka bwe ari ishuli gusa ngo we ntabyumve.

Kayitsinga Etienne wagurishije bwa mbere ubu butaka akimara kumenya ko ubutaka butezwa Cyamunara buriho n’abandi yahise yihutira gutambamira icyo cyangombwa cy’ubutaka mu kigo gishinzwe umutungo kamere asaba ko mu byangombwa bizatangwa ari ishuli gusa kuko ahandi hagurishijwe ku bandi.

Uyu Mporanyi avuga ko yabonye akomeje kurenganywa akandikira Perezida wa Repubulika na Minisitiri w’ubutegetsi bw’igihugu bakaza kumusaba ko yarenganurwa n’akarere ka Gasabo gusa ngo akarere kakomeje kumutererana.

Mporanyi avuga ko kuri uyu wa Gatatu yatunguwe no kubona baje kumukuramo no kumusenyera, ati : “Twatunguwe no kubona ejo bampamagaye bati iwawe byacitse ibintu bamenaguye, umugore bamukubise, abana bari mu mapingo, nahise nza nsanga ibintu bashyize hanze, komanda wa polisi ashaka kunkubita gusa mubwira ko aturenganya kuko naguze inzego zose z’ubuyobozi zibizi, hari umuyobozi w’Umudugudu na gitifu w’Akagari. Bakubise umugore wanjye bashaka gutwara ibyangombwa by’ubutaka, bafashe ibintu byanjye babijugunya hanze ubu twaraye hanze ubuyobozi burebera.

Uyu mugabo avuga ko icyo asaba ari ukurenganurwa, agasubizwa ahantu he.

Twashatse kubaza Gashumba Emmanuel waguze ubutaka mu cyamunara, yatubwiye ko yaguze ubutaka tariki 20 Ugushyingo 2015 akabugura na Banki bityo adusaba ko ibindi twabibabaza umuhesha w’inkiko wamuhesheje ubwo butaka ari na we wasabye ko Mporanyi akurwamo n’inzego z’umutekano.

Niyonizeye Bonaventure watse inguzanyo ya Banki ubwo yubakaga icyahoze ari ikigo cye cy’amashuli abanza cya Bonaventure Foundation School, yavuze ko ishuli rye ryatse inguzanyo ubutaka bucyanditse kuri Kayitsinga Etienne kuko bari batarabona ibyangombwa bya burundu.

Yemeje ko Mporanyi yarenganye detse avuga ko mu igenagaciro ryakozwe harimo ishuli rigizwe n’ibyumba by’amashuli, ibiro n’ikibuga hatarimo umutungo wa Mporanyi, avuga kandi ko Gashumba Emmanuel arenganya Mporanyi yitwaje kuba amurusha ubushobozi.

Twagerageje kuvugana n’umuyobozi ushinzwe imibereho myiza y’abaturage mu karere ka Gasabo Nyirabahire Languida uvugwaho kuba yari afite gukemura iki kibazo mu nshingano ze ngo aduhe ibisobanuro kuri iki kibazo gusa ntibyadukundiye kugeza ubwo twandikaga iyi nkuru.


Abaje gusenya inzu ya Mporanyi bahereye ku gipangu


Ishuri ryahoze ryitwa Bonavanture Foundation School, Gashumba yarihinduriye izina nyuma yo kurigura


Mporanyi Jean Népomusene usaba kurenganurwa


Kwa mporanyi bari batekeye hanze ku karubanda

Mugemanyi Jean Paul

MAKURUKI.RW

Yisangize Inshuti.

Ibitekerezo 1

  1. Andika Igitekerezo Hano
    mporanyi ararengana;ubuyobozi bwa gasabo bugomba kubibazwa
    .barangiza ngo ni akarere ka mbere!!!

Tanga Igitekerezo