Gakenke: Abasenyewe n’ibiza bararira ayo kwarika, akarere kakabitakana

Nyiraneza Venantie, umwe mu basenyewe utaragerwaho n’ubufasha aravuga ko babayeho nabi/ Photo: A. Muvunyi

Bamwe mu baturage bo mu karere ka Gakenke basenyewe n’imvura n’inkangu byibasiye aka karere, baravuga ko batuye mu matongo nayo ashobora kubagwaho kandi nta bushobozi bafite bwo kwiyubakira.

Mu kwezi kwa Gicurasi imvura idasanzwe yaguye mu turere dutandukanye tw’igihugu ariko yibasira cyane abatuye mu karere ka Gakenke, mu ntara y’Amajyaruguru aho abantu barenga 30 bapfuye, amazu menshi agasenyuka ndetse n’imyaka yari iri mu mirima ikangirika.

Aba baturage bashoboye kubona ubufasha biturutse muri MIDIMAR bahabwa ibyo kurya, ibiryamirwa, ibikoresho byo mu rugo ndetse n’amabati yo kongera gusakara inzu zari zasambutse. Gusa kuri ubu hari bamwe bakigaragaza ko nta bufasha bahawe.

Nyiraneza Venantie utuye mu murenge wa Gekenke, avuga ko nawe ari mu bagizweho ingaruka n’ibiza ariko kugeza ubu akaba ataragerwaho n’ubufasha kuko ngo abahawe amabati ari abo mu cyiciro cya mbere n’icyaka kabiri cy’ubudehe, mu gihe we ari mu cya gatatu kandi ngo akaba adashoboye kwiyubakira.

Yagize ati “Ubu turipfumbase, ibishyimbo, ibijumba, amateke byose byaragiye, batanze amabati bayaha abo mu cyiciro cya mbere n’icya kabiri ubu ntako tubayeho rwose uretse ko ari Imana izategeka.”

Undi musaza witwa Kurubone Felecien yabwiye Makuruki.rw ko ubwo inzu ye yagwaga yari yemerewe n’ubuyobozi ko azafashwa akubakirwa ariko nyuma y’aho ngo bamusabye ko yabanza akitangirira inzu agafashwa nyuma, akaba avuga ko nta bushobozi afite ibintu byatumye kugeza ubu ngo aba mu itongo naryo avuga ko rishobora kumugwaho igihe icyo ari cyo cyose.

Yagize ati “Bari banyemereye kumfasha none ubu ngubu bakomeje kuvuga ngo ninitangirire inzu kandi ntabyo nshoboye. Ubu mba mu cyumba kimwe ikindi cyumba cyaridutse mu ruhande rwo hepfo.”

Umuyibozi w’Akarere wungirije ushinzwe iterambere ry’Ubukungu mu karere ka Gakenke, Niyonsenga Aime Fabien, yabwiye Makuruki.rw ko abaturage bose bahuye n’ibiza bose bubakiwe amazu aruzura ndetse n’abatarubakiwe kubera kubura ibibanza ngo biri gushakwa ngo nabo bubakirwe.

Yagize ati “Uwaba yavuze ko atarubakirwa ni uwaba atarahuye n’ibiza. Ubundi twari dufite imiryango igera ku 1425 yahuye n’ibiza, ariko kugeza ubu imibare dufite muri bose imibare dufite abantu 102 gusa nibo batahise babona ibibanza ni bo turi kugurira kugira ngo babone aho batura, ubu tumaze gusakara amazu 700.

Niyonsenga yongeyeho ko ababashije kwiyubakira amazu akarere kabafasha mu kubona amabati yo gusakara ndetse bagafashwa gusakara binyuze mu miganda y’abaturage.

Yagize ati “Urangije inzu akagera igihe cyo gusakara ahabwa amabati kandi ibyo byose bigenda bikorwa mu bufatanye n’abaturage mu muganda rusange, ni cyo gituma tuvuga ko mu kwezi kwa munani bizaba byarangiye.”

Kuba ubuyobozi bw’akarere butumva iri jwi ry’abaturage babutabaza, bisa n’ibyerekana ko nta gikozwe aba baturage bazaguma muri aya matongo ariko bikanatera impungenge ku kuntu bizagenda ubwo imvura izaba yongeye kugwa mu gihe kiri imbere.

Arsene MUVUNYI

MAKURUKI.RW

Yisangize Inshuti.

Ibitekerezo

Tanga Igitekerezo