GASABO: Umwana na Nyirakuru barembejwe n’inkoni zidashira bakubitwa na nyina

Umwana witwa Iradukunda Aline na Nyirakuru ubyara nyina, batuye mu mudugudu wa Bukinanyana, akagari ka Nyagatovu, umurenge wa Kimironko, mu Karere ka Gasabo, baratabaza ubuyobozi bavuga ko bahohoterwa bikomeye na Nyina aho bakubitwa nawe ku buryo bukomeye hakaniyongeraho no kuvanwa mu ishuri k’uyu mwana.

Amakuru y’ihohoterwa ry’uyu mwana na nyirakuru yaturutse ku baturanyi b’uyu muryango aho batabarizaga uyu mwana na nyirakuru ngo inzego z’ubuyobozi zigire icyo zikora nyuma yo kubona Mutegwaraba Claudine akubita nyina akabuza n’umwana we kwiga, akamuraza hanze yewe ataretse no kubabwira amwe mu magambo abatoteza.

Umwe mu baturanyi b’uyu muryango utashatse ko amazina ye atangazwa, yemeje ko Mutegwaraba Claudine atoteza akanakubita uyu mwana ndetse ataretse na nyina wa mubyaye babana, akanasaba ko ubuyobozi bwagira icyo bukora mu maguru mashya kuko ubusinzi bwe ngo butuma adafata inshingano zo kurera no kwita ku bana be ari byo bimuviramo kubatoteza no kubangamira abaturanyi.

Yagize ati: “Claudine twese yaratunaniye, imyitwarire ye si myiza, ubusinzi bwe ni bwo bumutera gushyamirana n’abaturanyi ataretse umwana na nyina akubita buri munsi…. mutuvuganire ku bayobozi rwose bamugire inama.”

Nubwo aba baturanyi bavugira uyu mwana na nyirakuru, nta numwe wifuza ko Mutegwaraba yamenya ko ari we watanze aya makuru cyangwa ngo amenye ko amakuru yatanzwe n’uyu mwana dore ko bose ngo bamutinya ari na byo byatumye badusaba gusanga umwana ku ishuri ngo tuganire n’ubuyobozi bw’ishuri uyu mwana yigaho ndetse tubonereho no kuvugisha uyu mwana bitewe n’uko ngo ari mu rugo kuvugana nawe bitakoroha.

Uyu mwana uri mu kigero cy’imyaka 17 yiga mu mwaka wa 5 w’amashuri abanza ku ishuri ribanza rya Kibagabaga, akaba ngo yaratinze kurangiza amashuri bitewe n’uko ngo yagiye irivanwamo cyane na nyina umubyara kubera guhora amujujubya.

Mu kiganiro Makuruki.rw yagiranye n’uyu mwana, yadusubije mu mvugo yuje ubwoba aho atifuzaga kugira byinshi avuga k’ubuzima bwe bitewe no gutinya ko nyina umubyara yabimenya akaba yamugirira nabi.

Uyu mwana yatubwiye ko nyina umubyara Mutegwaraba Claudine amukubita, akamwirukana mu rugo ndetse rimwe na rimwe akamubuza kujya kwiga nyamara ibi akabikorerwa we na nyirakuru.

Yagize ati: “Iyo aje arankubita, abantu bakaza kuntabara n’abana bakaza kureba…. N’ejo bundi yarankubise arangije aranyirukana yari yanze ko nza ku ishuri…. Nari ngiye kureba uniform nize mu gitondo arabyanga arambwira ngo simurarire mu nzu.”

Yakomeje atubwira ko uretse abaturanyi nta bandi bantu babizi ndetse akaba yaratinye kubibwira abayobozi kuko atinya kuba yafungisha nyina umubyara gusa kuri we ngo bimuteye ikibazo.

Yagize ati: "Nta muntu nigeze mbibwira, reka reka sinjya mbivuga…ntinya kumufungisha gusa binteye ikibazo kuko nibaza impamvu ankubita abandi bana akabareka."

Ubwo twaganiraga na Nyiraminani Speciose umuyobozi wungirije w’iri shuri uyu mwana yigaho, yatubwiye ko iki kibazo batari bakizi kuko abana benshi batinya kuvuga ko bahohoterwa gusa avuga ko bagiye kuganiriza uyu mubyeyi n’umwana we bakareba aho ikibazo kiri harimo no kumukorera ubuvugizi ndetse byakwanga ngo bakitabaza inzego zo hejuru mu rwego rwo kurengera uburenganzira bw’uyu mwana.

Uwanziga Solange, Umunyamabanga nshingwabikorwa w’akagari ka Nyagatovu, yabwiye Makuruki.rw ko iki kibazo batari bakizi uretse kuba uyu Mutegwaraba ngo akunze kurangwaho ibikorwa by’ubusinzi, ibintu ngo byanagarutsweho mu nama y’umuganda bakaba barigeze ngo no ku musura mu rwego rwo kumufasha ku bindi bibazo byihariye akunze kugira. Gusa uyu muyobozi akavuga ko kuba atoteza nyina n’umwana yibyariye ari ikindi kibazo bityo ngo bakaba bagiye kumuganiriza hamwe na nyina n’uyu mwana mu gihe azaba atikosoye ngo akazahanwa.

Yagize ati: “Iki kibazo ntitwari tukizi, gusa birashoboka ko n’umwana yaba akora amakosa gusa tugomba gukurikirana uburere bw’umwana duhamagara nyina n’umwana tukabaganiriza kuko gukubita umwana si bwo buryo bwo guhana. Mu gihe nyina azaba yanze guhinduka agomba guhanwa.”

Karamuzi Godfrey, Umunyamabanga nshingwabikorwa w’umurenge wa Kimironko yatubwiye ko ikibazo cya Mutegwaraba uhohotera umwana yibyariye na Nyina kitigeze kibageraho gusa akavuga ko bagiye gukora iperereza ryimbitse ku cyaba kihishe inyuma y’ihohoterwa ry’uyu mwana na nyirakuru, hanyuma ngo bakarengera uburenganzira bwabo harimo kuganiriza uyu Mutegwaraba byananirana bagakora icyo itegeko riteganya mu buryo bwo kurengera ubuzima bwabo.

Gusa aho bitereye urujijo ni uko uyu mugore (Mutegwaraba) ngo akunda gukubita cyane uyu mwana, ariko ngo abandi bana bavukana bo akaba ntacyo abatwara, ibintu abaturanyi bavuga ko hashobora kuba hari icyo amuziza cyihariye.

Uyu mugore yabyaye abana batanu, gusa muri abo bana bose nta n’umwe uhuje se n’undi.

Mugemanyi Jean Paul

MAKURUKI.RW

Yisangize Inshuti.

Ibitekerezo

Tanga Igitekerezo