Umudepite yibajije impamvu interineti y’i Kampala iba irinzwe, iy’i Kigali yidegembya

Guhera mu Ukwakira uyu mwaka, ahahurira abantu benshi mu mujyi wa Kampala hazatangira gukwirakwizwa interineti y’inziramugozi (Wireless) y’ubuntu.

Ibi byatangajwe kuri uyu Gatatu nyuma y’uko umwe mu badepite mu Nteko Ishinga Amategeko ya Uganda, Waila Majegere Kyewalaby abajije impamvu interineti ahantu hatandukanye mu mujyi wa Kampala iba irindishijwe umubare w’ibanga (password) mu gihe i Kigali interineti y’inziramugozi uyobonera ubuntu.

Majegere yagize ati “Mperutse i Kigali mu Rwanda, ho ugenda bakwereka ko aho uri hari interineti y’inziramugozi y’ubuntu, ariko muri Uganda ahari ho hose bagusaba umubare w’ibanga.”

Umuyobozi w’Ikigo gishinzwe itumanaho James Saaka, yahise amara impungenge abadepite, ko guhera mu Ukwakira 2016 mu mujyi wa Kampala hazaba hari interineti y’ubuntu, yishyurwa na Leta.

Yavuze ko umushinga bawugeze kure, ko hasigaye utuntu duke ugatangira gushyirwa mu bikorwa.

Iyi interineti izajya iboneka ahahurira abantu benshi, izajya ikoreshwa abakozi bavuye mu kazi guhera saa kumi n’ebyiri z’umugoroba kugeza saa kumi n’ebyiri za mu gitondo nk’uko Redpepper ibitangaza.

Imibare igaragaza ko hafi miliyoni umunani n’igice aribo bantu bakoresha Interineti muri Uganda, ni ukuvuga nibura 23 % by’abatuye icyo gihugu.

Mu mwaka wa 2013 nibwo Leta y’u Rwanda yatangiye gushyira interineti itishyuzwa ahahurira abantu benshi.Byahereye mu mujyi wa Kigali mu cyiswe ‘Smart Kigali’ muri gahunda yo guteza imbere ubukungu bushingiye ku ikoranabuhanga.

Uretse ahahurira abantu benshi, iyo gahunda yakomereje mu modoka zitwara abagenzi, nubwo ho igikemangwa kuko hari abavuga ko nubwo utwuma dutanga interineti twashyizwe mu modoka, ngo ntikora.

Yisangize Inshuti.

Ibitekerezo

Tanga Igitekerezo