Kuki kubona internet ya 4G mu Rwanda no muri Afurika bihenze?

Dr. Hamadoun Toure, umuyobozi wa Smart Africa

Hejuru ya 60 % by’Abaturarwanda mu gihugu hose bashobora kubona uburyo bwo gukoresha interineti bitabagoye igihe telefoni, imashini cyangwa tablets zabo zifite uburyo bwo gukoresha internet.

Kuri ubu benshi mu rubyiruko mu Rwanda ndetse no muri Afurika, abadakoresha imbuga nkoranyambaga wababara, icyakora nubwo ibyo byose bihari, internet yihuta yo mu bwoko bwa 4G ikoreshwa n’umugabo igasiba undi.

Ni ikibazo u Rwanda rusangiye n’ibindi bihugu bya Afurika, kikaba na kimwe mu byagaragajwe nk’imbogamizi mu iterambere ry’ikoranabuhanga, mu nama ya Transform Africa iri kubera i Kigali.

Kuri uyu wa Gatatu, ku munsi wa mbere w’iyo nama , habaye ikiganiro ku nsanganyamatsiko yo kubaka iterambere rirambye rya Afurika rishingiye ku guhanga udushya hifashishijwe ikoranabuhanga “ Building the innovation ecosystem for the sustainable development and growth in Africa.”

Muri iki kiganiro hibanzwe ku ruhare rw’ikoranabuhanga mu guhanga udushya ari na byo shingiro ryo kubaka iterambere ridaheza uwo ari we wese muri Afurika.

Gusa ibiciro bya interinet kuri bamwe basanga bishobora kuba imbogamizi ibaheza mu gutanga umusanzu wabo mu guhanga udushya.

Umwe mu bitabiriye yabajije ati “Mu Rwanda tuhamaze iminsi, internet ya 4G icyumweru kimwe igura amadolari 10, ukwezi ni amadorali 40, birahenze cyane kimwe n’ahandi muri Afurika, ibyo twabigabanya dute?

Igisubizo Dr Hamadoun Toure yamuhaye yagize ati: “Iyo tugiye kuri internet buri gihe tujya gushaka amakuru abitse muri Amerika, niyo mpamvu biduhenda.Tujya ahabitse amakuru kure, ntabwo ibyo tubifite hano. Ujya kuzana ububiko bw’ayo makuru muri Afurika bati iwanyu hari ibicu byinshi, ntabwo byakunda ..ariko ntabwo aribyo....Igihe cyose amakuru atabitse iwacu tuzakomeza gukolonizwa. Icya kabiri ni umutekano w’ikoranabuhanga. (Cybersecurity)…Ntabwo byose turabigeraho."

Yavuze ko bizagerwaho igihe cyose ibihugu bya Afurika bizahuza imirongo y’ikoranabuhanga, ku buryo nko kuva mu gihugu kimwe ujya mu kindi bidasaba kugura SIM Card yindi.

Ati"Hari ibintu byoroshye nko kuba wava mu gihugu kimwe ujya mu kindi muri Afurika ugakoresha amafaranga amwe ya internet, kandi biroroshye rwose, kuki se muri Amerika bikunda kuva muri Leta imwe ujya mu yindi ntibigusabe kugura indi internet kandi ari Leta 50?"

Toure yavuze ko kuri ubu Afurika ifite ibigo by’itumanaho bigera kuri 50, nyamara ngo nta na kimwe amakuru yacyo abikwa ku mugabanewa Afurika.

Ati: "Dufite ibigo by’itumanaho 49 muri Africa ariko muri byose nta na kimwe gifite ububiko bwayo makuru hano muri Afurika, turi kugerageza ngo natwe tubigire, amakuru abikwe inaha.Turashaka umurongo wacu twebwe nk’abanyafurika gusa."

Yavuze ko bari mu bukangurambaga bwo guhuza imirongo y’ikoranabuhanga,ku buryo nk’umuntu uvuye mu gihugu ajya mu kindi muri Africa bitamusaba kugura indi simukadi.

Turashaka ko umuntu niba agiye mu kindi gihugu bitamusaba kugura indi Sim card kuko hari ubwo umuntu agura indi Sim card ageze mu kindi gihugu, usanzwe amuzi ntazamumenya kandi biranamuhenda.Turi mubyo guhuza passport, ni na ngombwa kuvuga kuri sim card imwe, gukoresha amainite ya nternet angana mu gihugu ngezemo cyose. Ibyo nibikorwa bizagabanya igiciro cy’itumanaho kuri twe kandi ubucuruzi mu by’ikoranabuhanga bwiyongere.”

Makuruki yifashishije Imwe mu masosiyete y’itumanaho hano mu Rwanda, ukoresheje telefone ushaka internet ya 4G bigaragara ko ugomba kwishyura amafaramga 1900 ku munsi, waba ushaka iyicyumweru baguca 11 500 Frw, naho ukwezi baguca 41 000 Frw.


Dr. Hamadoun Toure na Perezida Kagame mu nama ya Transform Africa 2017

Yisangize Inshuti.

Ibitekerezo

Tanga Igitekerezo