Nyuma yo guha abanyeshuri mudasobwa zimwe zigapfa zitamaze kabiri, POSITIVO yageze no mu makoperative

1

Uruganda rukorera mudasobwa mu Rwanda ruravuga ko rugiye guha amakoperative mudasobwa ariko zitameze nk’izo bahaye abanyeshuri ba kaminuza kuko ngo zo zizaba zisumbuyeho.

Mu minsi yashize uruganda Positivo BGH Ltd rukora mudasobwa runakorera mu Rwanda, rwahaye mudasobwa abanyeshuri bo muri kaminuza zitandukanye zo mu Rwanda ku buryo bw’inguzanyo, gusa hadaciye kabiri aba banyeshuri batangiye kuvuga ko izo mudasobwa zatangiye gupfa ari nyinshi.

Ubuyobozi bwa sosiete Africa Smart Investiment Distribution Ltd ifite isoko ryo kugurisha mudasobwa z’uru ruganda, bwavugaga ko ari ibisanzwe ko mudasobwa zigira ikibazo, bukongeraho ko ahubwo bo bafite umwihariko w’uko batanga ubufasha mu kuzikora ku buntu bitewe n’uko uruganda ruri mu Rwanda.

Ubu noneho uru ruganda rwazanye indi gahunda rwise “Smart Cooperative” igamije gufasha amakoperative gucunga imari ndetse n’inyandiko zayo mu buryo bw’ikoranabuhanga kandi mu buryo bwizewe.

Iyi gahunda ngo izatangwamo mudasobwa zizaba zikoranyemo software yihariye izaba ikoreshwa muri ibyo bigo kuburyo utapfa kuyikoresha mu zindi mudasobwa zisanzwe zikoreshwa.

Gusa hari abafite impungenge z’ukuntu izi mudasobwa zahawe abanyeshuri zigahita zigira ibibazo noneho zigiye gukoreshwa mu makoperative mu gucunga amafaranga no kubika inyandiko, bakavuga ko bishobora kuzateza ikibazo.

Karenzi Francois ushinzwe igurishwa ry’izi mudasobwa muri iyi sosiyete aganira na Makuruki.rw yavuze ko koko mudasobwa bahaye abanyeshuri bo muri kaminuza y’u Rwanda zagize ikibazo ariko ko bafite serivisi ifasha abagize ikibazo gisa gityo.

Uyu muyobozi yongeyeho ariko ko mudasobwa bazatanga muri gahunda ya “Smart Cooperative” atari nk’izo bahaye abanyeshuri kuko ngo bazatanga mudasobwa bakurikije icyo igiye gukoreshwa.

Yagize ati “Izo ku makoperative ntabwo ari nka ziriya ariko abazikora ni bamwe, uruganda ni rumwe kandi na ziriya twahaye abanyeshuri uzayituzanira ikibazo cye tuzagikemura.”

Izi mudasobwa zizatangwa uyishaka yishyuye amafaranga yose cyangwa akaba yakaka inguzanyo muri banki na yo ikishyura uruganda, uwatwaye mudasobwa na we akazishyura banki mu buryo bumvikanyemo.

Yongeraho ko abavuga ko mudasobwa batanga atari nzima ari abafite impamvu zabo bwite kuko ngo Positivo ntaho itandukaniye n’izindi mudasobwa zose zikorwa n’abandi.

Ku bw’iki kibazo ngo barimo gutegura uburyo bwo kuzasobanurira abantu uko iyi gahunda izaba iteye.

Yisangize Inshuti.

Ibitekerezo 1

  1. Yewe mudasobwa ziragwira!!! Ni gute mudasobwa ivuga nabi, ifotora nabi, nto gutya, itabika umuriro na mba ishobora guhabwa umunyeshuri??? Ntibitaye ko izakoreshwa mu bushakashatsi, ntibitaye ko azashyiraho notes akigiraho mbese bishakiye inyungu gusa. Birababaje

Tanga Igitekerezo