Kigali:Transform Africa 2017 isize ibihugu bitandatu byiyemeje kwinjira muri Smart Africa

Dr Hamadoun Toure, Umuyobozi wa Smart Africa

Inama mpuzamahanga ku ikoranabuhanga yaberaga i Kigali izwi nka Transform Africa isize ibihugu bine bimaze kwinjira mu muryango ugamije guteza imbere ikoranabuhanga ku mugabane wa Afurika (Smart Africa) ndetse ibindi bibiri nabyo byatangaje ko vuba aha bizaba byamaze kuwinjiramo.

Kuri ubu umubare w’ibihugu bigize uwo muryango wamaze kuva kuri 17 ugera kuri 21 ndetse mu minsi ya vuba ushobora kugera ku bihugu 23.

Dr Hamdoun Toure, Umunyamabanga Mukuru wa Smart Africa yavuze ko ibihugu birimo Tunisia, Afurika y’Epfo, Cameroon, Sao Tome et Principe na Nigeria byamaze kwinjira muri Smart Africa, naho Zambia na Nigeria bikaba byitegura kwinjiramo vuba.

Ubusanzwe mu bihugu byari bimaze kwinjira muri Smart Africa, harimo u Rwanda, Uganda, Kenya, Gabon, Sudani y’Epfo, Senegal, Mali, Tchad, Angola, Burkina Faso, Djibouti, Cote d’Ivoire, Guinea, Misiri, Benin, Togo, Niger.

Toure yavuze ko inama ya Transform Africa y’uyu mwaka yatanze umusaruro ugaragara ndetse ikaba yaranitabiriwe ku kigero gishimishije ugereranyije n’izindi zabanje.

Yagize ati “Agatabo gakubiyemo ibigenga imijyi igezweho ( Smart City blueprint) karamuritswe, habayeho amasezerano y’abayobozi b’imijyi itandukanye, amafaranga arenga ibihumbi 40 by’amadolari yashowe muri ba rwiyemezamirimo bakizamuka, hasinywe amasezerano afite agaciro k’amafaranga arenga miliyoni 55 z’amadolari . Ibyabaye ku mugoroba wo kuri uyu wa Kane byo biratangaje. Ku mugoroba nyuma y’amasaha igishushanyo mbonera cy’imijyi gitangajwe, hari amasezerano ya miliyoni 50 z’amadolari yasinywe ngo gitangire gushyirwa mu bikorwa.”

Toure kandi yavuze ko iyi nama yitabiriwe n’abantu basaga ibihumbi bine, akaba aribwo bwa mbere uwo mubare ugezweho.Inama igitangira kuri uyu wa Gatatu, Minisitiri w’Urubyiruko Jean Philbert Nsengimana yavuze ko mu bitabiriye 70 % ari abagabo, naho 30 % bakaba abagore.

Iyi nama kandi yitabiriwe n’abakuru b’ibihugu by’u Rwanda, Togo, Djibouti, Sao, Niger na Mali.

Uyu mwaka inama ya Transform Africa yari yihaye intego yo kwiga ku iterambere ry’imijyi y’ikoranabuhanga.Inama itaha izaba hagati ya tarii ya 9 na 11 Gicurasi nkuko byatangajwe na Minisitiri Nsengimana.


Minisitiri w’Urubyiruko n’Ikoranabuhanga Jean Philbert Nsengimana


Mahamadou Issoufou, Perezida wa Niger

Perezida Kagame (iburyo) na Perezida wa Mali, Ibrahim Boubacar Keïta (ibumoso

Transform Africa uyu mwaka yitabiriwe n’abasaga ibhumbi bine

Yisangize Inshuti.

Ibitekerezo

Tanga Igitekerezo