Warning: imagejpeg(local/cache-vignettes/L463xH301/arton14767-fcc6a.jpg.tmp): failed to open stream: Disk quota exceeded in /home/makuruki/public_html/ecrire/inc/filtres_images_lib_mini.php on line 435
Isi y’Ikoranabuhanga ntikwiye guheeza abagore n’abakobwa-Madamu Jeannette Kagame .|. Makuruki.rw | Amakuru Asesenguye!

Isi y’Ikoranabuhanga ntikwiye guheeza abagore n’abakobwa-Madamu Jeannette Kagame

Madamu Jeannette Kagame, Madamu wa Minisitiri w’Intebe wa Sao Tome et Principe, Nana Trovoada, Madamu wa Perezida wa Mali, Keita Aminata Maiga, Minisitiri w’Ubyiruko n’Ikoranabuhanga, Hon. Jean Philbert Nsengimana na visi Perezida wa Zambia, Inonge Mutukwa Wina bari kumwe n’abatsinze mu marushanwa ya Ms Geek Africa 2017 mu nama ya Smart Africa Women Summit yabereye i Kigali

Madamu wa Perezida wa Repubulika y’u Rwanda, Jeannette Kagame, yavuze ko kugirango ubusumbane hagati y’abagore n’abagabo bitabira ikoranabuhanga n’ubumenyi bushireho bizasaba imbaraga za buri wese.

Yabitangarije mu nama y’umwihariko ku ruhare rw’abagore mu guhindura Afurika “ Smart Africa Women’s Summit” kuri uyu wa Gatanu yitabiriwe n’abantu batandukanye bari i Kigali mu nama y’iminsi itatu yiga ku ikoranabuhanga muri Afurika (Transform Africa 2017.)

Madamu Jeannette Kagame yavuze ko urebye abantu bitabira ikoranabuhanga muri iki gihe, abakobwa bakiri bake.

Yavuze ko iterambere nyaryo ari iritavangura muri byose, ari nayo mpamvu hakwiye ingufu nyinshi ngo abakobwa n’abagore na bo bibone mu isi y’ikoranabuhanga.

Yagize ati: “Uyu munsi twese turasabwa kureka ibidutandukanya, tugafatanya urugamba rwo guteza imbere abagore n’abakobwa mu iterambere ry’ikoranabuhanga…Isi y’iki gihe izwi nk’isi y’ikoranabuhanga, ariko ikomeje kugaragaza ubusumbane hagati y’ibihugu no mu buringanire hagati y’abagore n’abagabo.”

Madamu Jeannette Kagame yakomeje agaragaza uburyo u Rwanda ruri gukora ibishoboka byose ngo abagore n’abakobwa bisange mu isi y’ikoranabuhana.

Yavuze ku marushanwa ya Ms Geek agamije guteza imbere abakobwa bagaragaje udushya mu ikoranabuhanga, gahunda y’umuryango Imbuto Foundation yo guhemba abakobwa batsinze neza amasomo ajyanye n’ubumenyi n’ikoranabuhanga, gahunda ya HeForShe igamije guteza imbere uburinganire n’izindi.

Yavuze ko nta n’umwe ukwiye gusigazwa inyuma mu gihe isi iri guharanira iterambere mu ikoranabuhanga, asaba ko hashyirwaho ibyangombwa nkenerwa byose ngo abagore n’abakobwa na bo bibonemo.

Ati: “Dukwiye gukomeza guharanira ko ikoranabuhanga riba igikoresho cy’uburinganire hagati y’abagabo n’abagore.”

Iyi nama yitabiriwe kandi na Madamu wa Perezida wa Mali, Aminata Keita, Madamu wa Minisitiri w’Intebe wa Sao Tome Et Principe, Nana Travoada, Visi Perezida wa Zambia ,Enonge Mutukwa Wina ,n’abandi batandukanye.


Madamu Jeannette Kagame ageza ijambo ku bitabiriye inama ya Smart Africa Women’s Summit

Madamu Jeannette Kagame ashimira Ruth Njeri Waiganjo kubwo kwegukana umwanya wa mbere muri Ms Geek Africa 2017


Abatanze ikiganiro muri Smart Africa Women Summit:Dr Monique Nsanzabaganwa, Doreen Bogdan-Martin, Judith Owigar, Mpule K. Kwelagobe na Nanjira Sambuli.

Yisangize Inshuti.

Ibitekerezo

Tanga Igitekerezo