Indege nshya Boeing 737-800NG ya RwandAir yasesekaye i Kigali (Amafoto)

8

Boeing 737-800NG, indege nshya ya RwandAir yahawe izina rya Kalisimbi yasesekaye i Kigali nyuma y’igihe kirekire itegerezanyijwe amatsiko n’abanyarwanda

Iyi ndege yageze ku kibuga cy’indege mpuzamahanga cya Kigali i Kanombe ku mugoroba wo kuri uyu wa gatatu iturutse Athens mu Bugiriki aho yaruhukiye ku munsi w’ejo ubwo yari ivuye mu Leta zunze ubumwe za Amerika aho yakorewe.

Iyi ndege ni imwe muri ebyiri zatumijwe muri Amerika, RwandAir ikaba yatangaje ko muri Gicurasi umwaka utaha hategerejwe indi yitwa Muhabura na yo yakorewe muri Leta zunze ubumwe za Amerika.

Iyi ndege nshya yahawe izina rya Kalisimbi itegerejweho kwagura ingendo RwandAir isanzwe ikorera hirya no hino ku isi.

Iyi Boeing ije ikurikira iherutse kuzanwa mu Rwanda yo mu bwoko bwa Airbus 330-200, yo yahawe izina "Ubumwe".

Izi ndege ziri kwiyongera ku zindi RwandAir yari isanganwe byose bikaba bigamije kwagura ingendo zayo dore ko mu mwaka utaha biteganyijwe ko izatangira kujya i London mu Bwongereza ndetse no muri Leta zunze ubumwe za Amerika.

Dr Alexis Nzahabwanimana, Umunyamabanga wa Leta muri Minisiteri y’Ibikorwaremezo ushinzwe ubwikorezi mu izina rya Guverinoma y’u Rwanda ari na yo mushoramari mukuru muri Rwandair, yavuze ko inyungu yo kugura izi ndege zihenze itabarirwa gusa mu matike y’ingendo RwandAir ikora.

Yavuze ko izi ndege ziteza imbere izindi nzego zirimo ubukerarugendo, kandi bikoroshya ingendo z’abantu baza mu Rwanda muri gahunda zitandukanye nk’ababa bitabiriye inama mu Rwanda.

Kuri ubu RwandAir imaze kwagura amarembo yayo kuko ubu ikorera ingendo mu mijyi y’ibihugu bitandukanye nka: Cotonou, Abidjan, Nairobi, Entebbe, Mombasa, Bujumbura, Lusaka, Juba, Douala, Dar es Salaam, Kilimanjaro, Cotonou, Johannesburg, Dubai, Lagos, Libreville na Brazzaville.

Mu minsi mike kandi RwandAir izaba igera na Harare muri Zimbabwe ndetse na Mumbai mu Buhindi.

Ibi byose birajyana na gahunda RwandAir iteganya mu myaka itanu iri imbere yo kongera umubare b’abagenzi itwara bakava ku bihumbi magana atanu (500,000) ku mwaka bakagera kuri Miliyoni eshatu (3,000,000) buri mwaka.




Yisangize Inshuti.

Ibitekerezo 8

  1. Murakoze cyane kutuzanira indege nziza zigezweho ariko mugerageze gukosora niba muri kwitirira indege za Rwandair amazina nyarwanda bavuga " KARISIMBI" ntibavuga" KALISIMBI "

  2. U Rwanda rurimo gutera imbere. Nasabaga Rwandair gukosora ntabwo bandika Kalisimbi bandika Karisimbi.
    MURAKOZE.

  3. Andika Igitekerezo Hano u Rwanda turakataje mu iterambere Mzee Wacu tukuri inyuma courage

Tanga Igitekerezo