Ibyo utamenye ku guhindura amabara kw’ikiyaga cya Kivu

1

Mu mpera za Kanama 2016, byatangaje benshi ubwo amazi y’inkengero z’ikiyaga cya Kivu yahinduraga ibara, bitandukanye n’izindi mpinduka zari zagaragaye muri Werurwe 2016.

Mu binyamakuru bitandukanye byo mu Rwanda, hagiye hagaragaramo inkuru zigaruka ku kweruruka kw’ikiyaga cya Kivu.

Mutoni Augusta, Umuyobozi ushinzwe ubugenzunzi bw’ikiyaga cya Kivu mu Kigo cy’Igihugu gishinzwe gukwirakwiza ingufu (REG), yavuze ko izi mpinduka ziterwa akenshi n’imihindagurikire y’ikirere.

Muri uyu mwaka impinduka za mbere zagaragaye muri Werurwe 2016, akaba avuga ko zatewe n’ubushyuhe, ubuhehere n’imirasire y’izuba byazamutse, bigatuma amazi y’ikiyaga yo mu gice cyo hejuru (igice cyiganjemo ibinyabuzima) agabanuka.

Icyo gihe, iki gice cy’ikiyaga byagaragaye ko cyari cyarabaye kigufi cyane (metero 28 z’ubujyakuzimu, kandi ubusanzwe kiba kirenga muri metero 50 z’ubujyakuzimu) bitewe nuko muri iki gihe ngo ibipimo by’ubushyuhe n’ubusharire, byari byazamutse.

Mu bihe nk’ibyo, imyunyu yo mu bwoko bwa “carbonates” ntiba ikibasha kuyengera mu mazi nkuko bisanzwe, cyane cyane imyunyu ya kalisiyumu yo yiremamo udusenyi duto cyane twitwa calcites.

Amazi y’ikiyaga cya Kivu rero icyo gihe ahindura ibara kubera ko ibimera byitwa ‘Cynobacteria’ (ibyatsi bito cyane birebeshwa microscope) byo mu bwoko bw’urubobi byiyongera mu kiyaga, bituma amazi y’ ikiyaga ahindura ibara agasa n’icyatsi cyerurutse urebeye kure. Ibi bikaba bikunda kugaragara kenshi mu gihe cy’itumba.

Impinduka zo mu mpera za Kanama

Mutoni avuga ko ihinduka ry’ibara ry’amazi y’ikiyaga cya Kivu ryagaragaye mu nkengero z’ikiyaga cya Kivu mu mpera za Kanama 2016, ari impinduka ziterwa n’umuyaga mwinshi.

Ubusanzwe, ngo mu gihe cy’impeshyi, ikiyaga cya Kivu kibamo umuyaga mwinshi uhuha ugana mu majyaruguru yacyo. Mu gitondo, uyu muyaga uba uhuha buhoro ku buryo umuntu atabona impinduka ariko uko umunsi ugenda ukura, umuyaga ugenda wiyongera ukaza kuba mwinshi ahagana mu ma saa sita na nyuma yaho.

Impinduka z’amabara y’amazi ziterwa niri hindagurika ry’ ubukana bw’umuyaga zigaragara mu buryo bubiri:

- Impinduka ya mbere ijyanye n’igihe (Seasonal impact): Amazi y’ikiyaga yo mu gika cyo hejuru arivanga ubwayo akanivanga n’ifumbire (nutrients) ituruka mu mazi yo mu ndiba y’ikiyaga.

Indi mpinduka ya buri munsi , ari na yo ahanini yagaragaye muri iyi minsi ishize, ni aho amazi y’inkengero z’ikiyaga ahindura ibara.

Uku guhindura ibara ngo guterwa nuko uko umunsi ukura, umuyaga ugenda uba mwinshi maze ukavanga vuba vuba amazi y’imigezi ishokera mu kiyaga cya Kivu nka Sebeya, isanzwe ifite amazi arimo igitaka cyinshi, akivanga n’ay’ikiyaga cya Kivu mu gika cyacyo cyo hejuru (surface wate).

Ayo mazi ngo aba agaragara ku nkombe ari menshi, bigatuma amazi yegereye inkombe z’ikiyaga ahindura ibara akenda gusa n’aya Sebeya akagira ibara ry’umuhondo werurutse.

Uko kwivanga kw’amazi y’imigezi ishokera muri Kivu (arimo igitaka cyinshi) n’ay’ikiyaga cya Kivu kubera umuyaga mwinshi uturuka mu majyepfo ni ko kwatumye amazi y’inkengero z’ikiyaga cya Kivu ahindura ibara mu mpera za Kanama bigatuma agira ibara ry’umuhondo werurutse.

Muri ino minsi ibipimo bifatwa n’abagenzura ikiyaga cya Kivu (Lake Kivu monitoring Programme) bigaragaza ko imiyaga yo muri icyo kiyaga ituruka mu majyepfo igana mu majyaruguru .

PNG - 82 kb
Umuvuduko w’umuyaga ku kiyaga cya Kivu kuva ku wa 29 kugeza ku wa 31 Kanama 2016
PNG - 35.5 kb
Icyerekezo cy’umuyaga ku kiyaga cya Kivu, Kanama 2016

Ibipimo byafashwe na Lake Kivu monitoring Programme ku kiyaga cya Kivu ku wa 31 Kanama 2016, bigaragaza ko amazi yo mu gika cy’ikiyaga cyo hejuru yivangira hasi kugeza ku bujyakuzimu bureshya na metero 50 nkuko bisanzwe mu gihe cy’impeshyi.

PNG - 69.5 kb
Ibipimo bitandukanye bigaragaza imiterere y’amazi byafashwe ku wa 31 Kanama 2016
Yisangize Inshuti.

Ibitekerezo 1

  1. mbanje gushimira ubwitange, nubushake mukorana mukazi kanyu kaburi munsi. mukomereze aho, muzatumbwire nimpamvu sebeya iti vanga ni kivu. murakoze

Tanga Igitekerezo