Ese kugera kuri Mars nibikunda, kubayo bizashoboka?

Abahanga mu bumenyi bw’ikirere muri iyi minsi amaso yabo n’ubwenge biri ku mubumbe wa Mars. Ikigo gishinzwe ibijyanye n’isanzure cy’abanyamerika (NASA) kiri gushakisha uburyo mu mwaka wa 230 abantu baba batangiye kugera kuri uwo mumbumbe wegereye isi ukaba ufite na byinshi usangiye nayo.

Spacex yo iteganya kugera kuri uwo mubumbe vuba, nibura mu mwaka wa 2024.

Kugera kuri Mars, guturayo no kuhasura ni bimwe mu biraje ishinga abashakashatsi mu by’isanzure,ndetse na rubanda rubakurikirana ariko ikibazo kikibazwa kiracyari :ese nituramuka tubashije kugerayo, kubayo bizashoboka?

Ikinyamakuru Astronomy.com cyavuze ko kuri uwo mubumbe higanje umwuka mubi wa Dioxyde de carbone, ubutaka bwaho burakonja cyane ku buryo bigoye ko umuntu yahaba, ubushobozi bwo gukurura ikintu (gravity) kuri uwo mubumbe buri munsi y’ubw’isi, ku gipimo cya 38%, ni ukuvuga ko ushobora kugerayo gukandagira hasi bikaba ibibazo.

Iki kinyamakuru kivuga ko niharamuka hagize nugera kuri Mars, gushobora ubuzima bwaho bizaba irindi hurizo.

Kugera kuri uwo mubumbe bizatwara iminsi 260.Kuva mu mwaka wa 2007, inzobere zatanze uburyo bune bushobora kuzifashishwa ngo abashakashatsi bakandagire kuri uwo mubumbe utukura.

Uburyo bumwe ni ubwitwa Legged Landing System, bwari kubabashisha kugera ku butaka bwa Mars no kuhava.Uburyo bwa kabiri bwari ubwitwa SLS System, bugendeye ku buryo abantu basanzwe bifashisha bapakurura imodoka, ni ukuvuga ko ubwo buryo bwashobora kubashisha abantu kujyana ibintu kuri Mars, bigapakururwa gahoro gahoro kugeza bigeze ku butaka.Uburyo bwa gatatu bwari ubwo kwitwaza ibintu birimo umwuka (Air bag) bikaza kwifashishwa n’uwagiye kuri Mars kugirango abashe kumanuka mu kirere cy’aho.Ubundi buryo bwari ubwo ubw’ikoranabuhanga rigenda ryihinduranya bitewe n’aho rigeze kugeza bugejeje uwo bujyanye ku butaka bwa Mars.

Richard (Rick) McGuire Davis umuyobozi wungirije ushinzwe ubuvumbuzi muri Nasa, yavuze ko uburyo bwose bwari bwatekerejwe mbere butashoboka gukora mu kirere cya Mars kubera imyuka myinshi yirundanyirije hamwe, ahubwo ngo bari gushaka uko bakoresha icyogajuru akaba aricyo kizagezayo abantu.

Guhera umwaka ushize, Nasa yatangiye umushinga wo gukora igishushanyo mbonera cy’uburyo abantu bashobora kuzatura kuri Mars, biteganyijwe ko uwo mushinga uzamara amazi 24.

Nasa ivuga ko kugirango abantu bayo bazajya mu bushakashatsi babashe kuhagera no kuhamara igihe, bazitwaza ibintu bishobora kubafasha kubaho nk’umwuka, ibiribwa n’ibindi, noneho muri icyo gihe bazamarayo barebe igituma ubuzima kuri uwo mubumbe bugoye, ibishoboka babikemure ibidashoboka bagaruke ku isi kubyigaho.

Harateganywa kandi gukorwa ibyatsi bishobora kuzahangana n’ubukonje bwo kuri Mars no kuba ahantu hatagera izuba ryinshi, ibi byatsi ngo ni nabyo bizafasha mu kubona ingufu zizavamo urumuri rwakifashishwa kuri uwo mubumbe.

Iki kigo kandi kiri gushaka uburyo bwo kuzubaka inzu zihingwamo kuri Mars kugirango abantu bazabasha kuhatura babone uburyo bwo kwishakira ibyo barya.

Gutura kuri Mars ni igitekerezo cyashituye abashakashatsi kuva kera, icyakora biracyasa n’ihurizo kugerayo no kubayo.

Yisangize Inshuti.

Ibitekerezo

Tanga Igitekerezo