Birashimishije uburyo kubona internet i Kigali byoroshye kurusha i Barcelona -Umuyobozi wa Smart Africa

1

Dr Hamadoun Touré,umuyobozi wa Smart Africa

Dr Hamadoun Touré, umuyobozi w’umuryango ugamije guteza imbere ikoranabuhanga muri Afurika (Smart Africa) yashimye ingamba u Rwanda rwafashe zo guteza imbere ikoranabuhanga, kugeza ku rwego n’ibihugu byateye imbere bitarageraho.

Yabivuze ku gicamunsi cyo kuri uyu wa Kane, mu kiganiro n’abanyamakuru nyuma y’isinywa ry’amasezerano hagati ya Smart Africa na sosiyete zitandukanye ziyitera inkunga ndetse n’amasezerano hagati ya Guverinoma y’u Rwanda n’ikigo Inmarsat cy’Abongereza, gikora iby’itumanaho ryifashisha satellite.

Dr Touré ufite icyicaro mu Rwanda yavuze ko bishimishije kubona umuntu agera mu mujyi wa Kigali bikamworohera kubona internet y’ubuntu (Wi-Fi) nyamara wagera mu bihugu byateye imbere bikagorana.

Atanga ubuhamya bw’ibyo yabonye hagati ya Kigali n’umujyi wa Barcelona muri Espagne yagize ati “Kigali ni umwe mu mijyi byoroshye kubona internet atari muri Afurika gusa ahubwo ku isi hose.Ntabwo ari hose uzajya ngo ubone internet y’ubuntu mu modoka, ariko hano mu Rwanda irahari.Abantu bava hirya no hino bakaza kwigira hano.Ukigera ku kibuga cy’indege, uhasanga internet yihuta, n’imodoka turi gukoresha muri iyi nama zirimo internet y’ubuntu.Urajya mu modoka umushoferi agahita akubwira ati nyakubahwa hano hari umubare w’ibanga wa internet.Byaranshimishije kandi nibyo dushaka ko bikomeza.”

Yakomeje agira ati “Mu minsi ishize muri Werurwe nari ndi i Barcelone, numvise nishimiye kubabwira ko umujyi wa Kigali ufite internet kubarusha (Ab’I Barcelone).Twagiye mu mujyi dufata imodoka, tubaza umushoferi niba hari WI-Fi twabona, umushoferi atangira kubaza ngo ibyo ni ibiki, mubwira ko ibyo i Kigali ho tubifite.”

Dr Toure (iburyo) na Minisitiri Nsengimana Jean Philbert

Umwaka ushize warangiye abanyarwanda bashobora kugerwaho na Internet yo mu bwoko bwa 4G ari 62%, mu gihe uyu mwaka ikigo cy’abanyakorera gishinzwe gukwirakwiza iyo internet kihaye kugeza uwo mubare kuri 92 %.

Dr Toure wahoze ari umunyamabanga w’IKigo mpuzamahanga cy’itumanaho (ITU) yavuze ko icyifuzo cyabo ari uko umujyi wa Kigali waba icyicaro cy’ikoranabuhanga, bahereye ku kumenyekanisha ku rwego mpuzamahanga inama ya Transfrom Africa iri kuba ku nhsuro ya gatatu.

Yagize ati “Turifuza ko buri mwaka muri Gicurasi, u Rwanda ruba icyicaro cy’ikoranabuhanga ku isi.Turashaka ko bimenyekana hose.Turashaka ko Transform Africa riba izina rikomeye ku buryo buri cyumweru cya kabiri cya Gicurasi isi yose izajya iba iri I Kigali.”

Smart Africa ifite intego yo gufasha umugabane wa Afurika kubona byoroshye internet, ku buryo buri muturage azajya abasha kuyibona no kuyikoresha bitamugoye aho ari hose.

Inmarsat iri gukorana na Smart Africa mu gutanga internet mu byaro byo muri Afurika hifashishijwe satellite.

Inzego z’uburezi, ubuvuzi, umutekano n’ibindi nibyo biri ku isonga mubyo Smart Africa ishaka guteza imbere hifashishijwe ikoranabuhanga.

Minisitiri w’Urubyiruko n’Ikoranabuhanga, Jean Philbert Nsengimana yavuze ko amasezerano yasinywe uyu munsi agamije guhuza abaturage benshi bataragerwaho n’ikoranabuhanga muri Afurika.

Yagize ati “Intego yacu mu gusinya aya masezerano, ni uguhuza umugabane wacu, kugirango twizere ko abaturage benshi bafite umurongo wa internet muri Afurika.Urebye ahanini yibanda mu gutera inkunga iterambere ry’uburezi, gukora ubucuruzi mu ikoranabuhanga.”

Smart Africa buri mwaka itanga miliyari 300 z’amadolari mu mishinga itandukanye igamije guteza imbere ikoranabuhanga mu bihugu binyamuryango byayo muri Afurika.

Uwo muryango uvuga ko ukomeje gukurura abashoramari n’abaterankunga gushora imari zabo mu mishinga y’ikoranabuhanga, kugirango mu myaka mike Afurika izabe umwe mu migabane ikomeye mu ikoranabuhanga.

Abaturage bashobora kugerwaho na Internet muri Afurika ni 21 %, mu gihe abayobozi b’ibihugu bya Afurika bihaye intego yo kuba uwo mubare wageze kuri 50 % muri 2020.


Hasinywe amasezerano atandukanye agamije guteza imbere ikoranabuhanga mu Rwanda no muri Afurika

Yisangize Inshuti.

Ibitekerezo 1

  1. Nibyiza kugira internet hose bishoboka.Ariko se i Barcelone ko buri muntu aba afite internet agendana kuri telephone akishyura buri kwezi...ntago bi bakeneye gushyira wifi ahantu hose...

Tanga Igitekerezo