Abanyamakuru bakoresha imbuga mu gutangaza amakuru bibukijwe ibyabagusha mu mutego

Umunyamabanga nshingwabikorwa w’inama nkuru y’itanagazamakuru Peacemaker Mbungiramihigo

Abanyamakuru bakoresha imbuga za interineti mu gutangaza amakuru baragirwa inama yo gukora ubushakashatsi bwimbitse mbere yo gutangaza inkuru zabo ndetse no kubanza gusesengura ibitekerezo by’abasomyi mbere yo kubitangaza ku karubanda.

Kugicamunsi cyo kuru yu wa 27 Nzeri nibwo umunyamabanga nshingwabikorwa w’inama nkuru y’itangazamakuru Peacemaker Mbungiramihigo yasoje kumugaragaro amahugurwa y’abanyamakuru yaberaga mu ntara y’Amajyaruguru mu karere ka Musanze.

Ubwo yasozaga aya mahugurwa, Mbungiramihigo yagarutse ku buryo abanyamakuru bagakwiye kujya bakoresha imbuga zikoresha interineti mu gutangaza amakuru uko bikwiye kuko hari abazikoresha nabi bikarangira babizize.

Yagize ati :“Abakoresha imbuga za interineti akenshi bagwa mu mutego wo gushaka gutangaza inkuru ku buryo bwihuse nk’uko ikoranabuhanga ribidufashamo, akibagirwa gukora ubushakashatsi buhagije bw’ibyo agiye gutangaza”.

Yibukije abanyamakuru n’abahagarariye ibitangazamakuru byabo bari bitabiriye aya mahugurwa ko ubundi inkuru ikwiye kujya ibanza gucukumburwa mbere yo gushyirwa ku mbuga nkuko amahame y’itangazamakuru abigena kugirango itangazamakuru ritazagwa mu mutego wo guteza imbere inyungu y’umuntu bwite bagatangaza ibihuha.

Yanagarutse kandi ku buryo bwo gutanga ibitekerezo (comments) ku mbuga avuga ko na byo byajya bibanza gusuzumwa neza n’ababishinzwe kuko ahanini usanga hari ibirekurwa nyamara bishobora guteza umwuka mubi mubasoma iyo nkuru.

Yagize ati: ”Birumvikana bisaba ko abantu bisanzura bakavuga icyo bashaka, ariko nanone kwisanzura ntibivuga gutukana cyangwa gusebanya”

Aba banyamakuru bibukijwe ko bagomba kwirinda kuba inzira inyuzwamo ibitekerezo n’abashaka guhangana mu magambo kubw’amakimbirane bafitanye cyangwa izindi mpamvu.

Zimwe mu nshingano z’inama nkuru y’itangazamakuru, harimo no kubaka ubushobozi bw’itangazamakuru bigamije kwimakaza ubunyamwuga ndetse no gukora ubuvugizi bugamije kongerera ubumenyi itangazamakuru.

Aya mahugurwa amaze igihe kingana n’iminsi itanu akaba yari agamije kongerera ubushobozi mu buryo bw’ubumenyi mu banyamakuru.

Yisangize Inshuti.

Ibitekerezo

Tanga Igitekerezo