Abantu basaga miliyoni 500 bakoresha Yahoo bibwe amabanga yabo

Yahoo yatangaje ko amabanga y’abakiriya bayo basaga miliyoni 500 binjiriwe mu mabanga, ibintu bitari bisanzwe mu mateka y’ikoranabuhanaga.

Amabanga yinjiriwe ni ajyanye n’amakuru bwite y’abakiriya bayo, ni ukuvuga amazina na emails bagiye bohereza cyangwa bakira, ndetse n’ibibazo n’ibisubizo by’ibanga ubazwa ngo konti yawe izabashe kugaruzwa haramutse habaye ikibazo na nimero za telefone, icyakora ngo nta kijyanye n’amakarita yishyurirwaho (credit cards) cyinjiriwe.

Yahoo yameje ko uko kwinjirirwa kugaragara nk’ugushyigikiwe na Leta runaka, ndetse urwego rushinzwe iperereza muri Amerika (FBI) rwatangiye guperereza.

Uko kwinjirirwa ngo kwabaye mu mwaka wa 2014, nyamara ubu nibwo byashyizwe ahagaragara.

Ngo kugirango bimenyekane, muri Kanama uyu mwaka hari umuntu wagaragaye kuri konti z’abakiriliya ba Yahoo bagera kuri miliyoni 200 yamamaza kandi nta burenganzira yahawe.

Yahoo yagiriye inama abakiliya bayo guhindura imibare y’ibanga ya konti zabo, ngo niba batarabikora kuva mu mwaka wa 2014.

Reuters yatangaje ko impamvu bavuze ko uko kwinjirirwa hari leta yaba ikwihishe inyuma, ngo nuko gusa n’ukwagiye kuba mu minsi ishize bigakekwa ko byakozwe n’u Burusiya.

Hashize iminsi haba ibitero kuri sosiyete z’ikoranabuhanga. Twavuga nka Myspace hinjiriwe abantu miliyoni 359, LinkedIn hinjiriwe abakiliya miliyoni 164, na Adobe hinjiriwe abakiliya miliyoni 152.

Uko kwinjirirwa kwa Yahoo gushobora kugira ingaruka ku mishyikirino yari irimo n’indi sosiyete yitwa Verizon, yashakaga kugura urubuga rwa Yahoo ngo ijye irwamamazaho.Urwo rubuga rusurwa n’abagera kuri miliyari mu kwezi.

Yisangize Inshuti.

Ibitekerezo

Tanga Igitekerezo