Ubwitabire mu isura nshya mu kwamamaza Habineza, Gitifu yanenze abakumira abantu

2

Ubwitabire bw’abaturage mu bikorwa byo kwiyamamaza kw’umukandida Habineza Frank i Nyamagabe bwiyongereye cyane ugereranyije n’aho amaze kwiyamamariza hose, gitifu wamwakiranye yombi yavuze ko anenga abayobozi bakumira abantu kwitabira gahunda zo kwiyamamaza avuga ko ari ukubangamira ubwisanzure bwo gutanga no kumva ibitekerezo.

Kuri uyu wa 22 Nyakanga 2017 umukandida w’ishyaka riharanira demukarasi no kurengera ibidukikije mu Rwanda Dr Frank Habineza yakomereje ibikorwa bye byo kwiyamamaza mu karere ka Nyamagabe mu murenge wa Gashaka akagari ka Nyamugari.

Kuri iyi nshuro, ubwitabire bwatubutse cyane ugereranyije n’indi minsi kuko urebesheje ijisho wabonaga hari abaturage basaga 1500 mu gihe ubundi byabaga bigoye ko barenga nka 500.

Mu byo yijeje abatuye muri aka karere by’umwihariko, Habineza yavuze ko natorwa azakuraho ikigo ngororamuco cya Tare gifungirwamo abantu Leta ivuga ko baba bakoze amakosa runaka abangamiye umuryango nyarwanda cyane cyane abanywa ibiyobyabwenge, abicuruza n’inzererezi.

Habineza avuga ko iki kigo cya Tare kimwe n’ibindi bigo ngororamuco byo mu Rwanda bifunga abantu ku buryo bunyuranyije n’amategeko akavuga ko natorwa azabikuraho byose mu gihe umuntu yakoze ikosa agahanwa mu buryo bukurikije amategeko.

Yagize ati: " Twumvise ko hari abantu bafungirwa muri Tare Transit Centre, ngo iyo Minisitiri agiye kuza hano cyangwa Perezida ngo bafata abantu bakabafungira aho ahntu, twabyumvise ko bihari. Tare n’ibindi bigo byose bifungirwamo abantu bitemewe n’amategeko bigomba kuvaho. Niba umuntu akoze icyaha polisi yacu irahari ifite ubushobozi umuntu ukoze icyaha bajye bamutwara kuri polisi bamukorere dosiye ajye muri gereza."

Habineza yavuze ko hari n’abafungirwa muri ibyo bigo nta makosa bakoze kuko ngo hari n’umunyamuryango we wafungiwemo azira kunywa urumogi kandi ngo atanywa n’isigara bityo akavuga ko bigomba kuvaho abantu bagafungirwa muri za gereza zemewe n’amategeko.

Umunyamabanga nshingwabikorwa w’umurenge wa Gashaka, Bayiringire Jean, yakiranye yombi Habineza n’abarwanashyaka b’ishyaka rye avuga ko anenga abayobozi bagaragaweho amakosa yo gukumira abaturage bashaka kujya kumva imigabo n’imigambi y’abakandida.

Ati: "Abaturage bamaze kumva igisobanuro cya demukarasi n’imiyoborere mu bwisanzure, bafite uburenganzira bwo kujya aho bashaka bakumva ibitekezo by’abakandida cyane cyane ko bibera ku karubanda. Icyo nabwira bagenzi bange ni ukurekera umuturage ubwisanzure bwe nkuko amategeko abiteganya akisanzura mu byo akora no mu byemezo afata kuko ni uburenganzira bwe."

Gitifu yavuze ko ibigo ngororamuco bishobora kuvaho ariko hakajyaho ubundi buryo bwo gukemura ibibazo byatumaga bajyanwayo. Ati: "Iyo gahunda yavaho ariko igasimburwa n’indi, ubwo afite ubundi buryo yabigenza kundi ku buryo bitazahungabanya umutekano."

Mu minsi ishize abakandida batandukanye bagiye bahura n’amananiza aturutse ku buyobozi bw’inzego z’ibanze, hakaba n’abakumira abaturage kwitabira ndetse kugeza ubu hari abayobozi polisi yamaze guta muri yombi barimo na Meya wa Rubavu Sinamenye Jeremiah.

Abaturage baganiriye na Makuruki bavuze ko bashimishijwe na zimwe muri gahunda Habineza avuga ko azakora cyane cyane ibijyanye na politiki y’ubutaka n’iyo kugabanya ubushomeri mu rubyiruko ndetse urubyiruko rwamugaragarije ko rumwishimiye.



Gitifu wa Gashaka


Bamwe bari bicaye hakurya bakurikiye ibyo Habineza abizeza kubagezaho

Yisangize Inshuti.

Ibitekerezo 2

Tanga Igitekerezo