Abayoboke ba PS-Imberakuri buri wese azatora uwo ashaka mu matora ya Perezida

1

Ibiganiro byo kwitegura amatora byahuje abayoboke b’ishyaka PS-Imberakuri byarangiye bemeje ko iri shyaka nta mukandida rizatanga kandi ko nta n’umukandida wihariye bazashyigikira, buri wese mu bagize iri shyaka azatora uwo ashaka.

Ibi biganiro by’Ishyaka ry’Imberakuri riharanira Imibereho myiza (PS-Imberakuri) byabaye kuri uyu wa 11 Kamena 2017, aho abanyamuryango baganiraga ku myiteguro y’amatora.

Ingingo ikomeye bizeho ni ijyanye no gutanga umukandida mu matora ya Perezida azaba muri Kanama uyu mwaka.

Ibi biganiro byarangiye 69% by’abanyamuryango bemeje ko nta mukandida ishyaka rizatanga, 30% basaba ko ishyaka ritanga umukandida, mu gihe 1% bo bavugaga ko iyi ngingo ikwiye gukomeza ikigwaho

Nyuma yo kubona ko ubwiganze bw’abantu bwerekana ko abenshi ari abashyigikiye kudatanga umukandida, byarangiye iri shyaka ryemeje ko nta mukandida rizatanga mu matora.

Icyongeye ku kuba iri shyaka nta mukandida rizatanga, ni uko nta n’umukandida runaka batangaje ko bazashyigikira, ahubwo ngo buri wese ubarizwa muri iri syaka azatora umukandida ashaka mu baziyamamaza akurikije uwo abonamo ubushobozi bwo kuyobora igihugu neza nkuko Mukabunani Christine uyoboye iri shyaka yabitangarije RBA.

Mu minsi ishize amashyaka ya PL na PSD yo yatangaje ko nta mukandida uzaturuka muri aya mashyaka ariko bo batangaje ku mugaragaro ko batanze Paul Kagame wo mu Ishyaka FPR kuba ari we uzababera umukandida, muri PS- Imberakuri ho buri muyoboke azatora uwo abonamo ubushobozi, nta mwihariko w’uwo bahuriyeho nk’ishyaka.

Mukabunani yasabye abayoboke b’ishyaka abereye umuyobozi kuzitabira bose amatora ya Perezida kandi bakajya bakurikirana ibikorwa biyategura bizajya bibera hirya no hino mu gihugu.

Yisangize Inshuti.

Ibitekerezo 1

Tanga Igitekerezo