Leta yacu izonka abana bayo ariko ntizabarya-Habineza abwira ab’i Huye

3

Dr Frank Habineza, umukandida w’ishyaka Riharanira Demukarasi no Kurengera ibidukikije mu Rwanda yavuze ko iyo Leta yishyuza abanyagihugu imisoro myinshi bigereranywa no kubarya kuko kubasoresha menshi bituma imibereho yabo iba mibi, ngo natorwa azagabanya imisoro bitume Leta azaba ayoboye izaba Leta yonka abana bayo aho kubarya.

Ibi yabigarutseho ubwo yari ageze mu Murenge wa Mukura mu karere ka Huye mu Ntara y’Amajyepfo kuri uyu wa 30 Nyakanga 2017 ubwo yari akomeje ibikorwa bye byo kwiyamamariza umwanya w’umukuru w’igihugu.

Yagarutse cyane kuri gahunda zo kugabanya imisoro mu nzego zose z’ubucuruzi no gukuraho imwe mu misoro aho yavuze ko abacuruzi mu rwego rwo hejuru azabashyiriraho umusoro umwe gusa.

Yagize ati: "Abacuruzi bakuru na bo tubafitiye gahunda nziza, iya mbere ni igushyiraho umusoro umwe kuko nabo bishyura umusoro mwinshi bikabaviramo kuyihunga no kuyikwepa, umusoro umwe abantu bawishyura bishimye kuko ntabwo uba uvunanye kandi n’abawishyura bakaba benshi. Niba hasoraga abacuruzi bangana na Miliyoni ebyiri baziyongera bagere kuri Miliyoni eshanu. Icyo gihe abanyarwanda bazakira babone amafaranga kandi na Leta na yo ibone amafaranga."

Uyu mukandida kandi avuga ko azagabanya umusoro ku nyungu ku buryo umuturage azashobora kugura icyo ashaka cyose. Avuga ko uko Leta isoresha abantu imisoro myinshi ariko umubare munini w’abaturage barushaho kuba mu buzima bubi, ibi ni byo agereranya no kuba Leta irya abana bayo.

Ati: "Uko Leta isoresha imisoro myinshi ni ko ikamura amafaranga mu baturage, ugasanga abaturage barakamutse nta kantu bagira, ugasanga kwinjiza batinjiza nubwo bafite bwose bukagenda noneho ugasanga Leta irimo kurya abana bayo kandi Leta ari umubyeyi, Leta yacu izaba ari umubyeyi nyawe itarya abana bayo ahubwo ibareberera kugirango bazamuke, nkuko babivuga, urukwavu rukuze rwonka abana, Leta yacu izonka abana bayo aho kugirango ibarye, izabateza imbere na bo bayitunge."

Habineza avuga ko aho gusoresha abantu bake imisoro myinshi azasoresha abantu benshi akabasoresha imisoro mike. Ibi avuga ko bizatuma abanyarwanda avuga ko bagiye gucururiza mu bindi bihugu bahunga imisoro bazagaruka mu Rwanda kandi n’abakora ubucuruzi bakaba benshi bityo imisoro nayo ikiyongera.

Mu zindi ngamba zijyanye n’imisoro, uyu mukandida avuga ko azasonera imisoro imishinga y’urubyiruko yose kuva batangiye kugeza bamaze imyaka ibiri kugirango bazatangire gusora bafite amafaranga ahagije.

Avuga kandi ko azaha uburenganzira abacuruzi bato nk’abacururiza ku gataro, abazunguzayi, abacuruza caguwa, n’abandi bafite igishoro kiri munsi ya Miliyoni bagacuruza badasora bagatangira gusora bagejeje igishoro gisaga Miliyoni.

Habineza aherutse kuvuga ko naramuka atorewe kuyobora u Rwanda yiteguye kubona amafaranga menshi mu mutungo kamere urimo peteroli na gaze metane ndetse n’amabuye y’agaciro. Ikindi ni uko ngo andi mafaranga azaturuka mu gucunga neza no gushyira mu bikorwa neza ingengo y’imari ya Leta kuko avuga ko kuri ubu 40% by’ ingengo y’imari ya Leta iburirwa irengero.


Yisangize Inshuti.

Ibitekerezo 3

  1. Wazabanje kubaza icyo bita demokrati kuko ibyo tubonana ntaho bihuliye nayo. Ufite ayahe mahitamo ku bayobozi bawe? Ufite ubuhe burenganzira mu miyoborere hano iwacu?

  2. Ahaaa nzaba mbarirwa wumvise ibya Frank wagirango azajya aha leta budget. Nasobanure aho azakura frw yamaze gukuraho imisoro cyereka niba abakozi biyo leta ye bazamara imyaka 2 badahembwa!!!!!!?

Tanga Igitekerezo