Kicukiro: Frank Habineza yavuze ko natorwa azashyira iherezo ku gahinda k’abazunguzayi n’abifuza caguwa

Ubwo yageraga mu Karere ka Kicukiro mu Murenge wa Gahanga mu Mujyi wa Kigali, Dr Frank Habineza yiyamamaje avuga ko azaha uburenganzira abazunguzayi bagacuruza uko bashaka kandi agasubizaho ubucuruzi bwa caguwa avuga ko bwari butunze benshi kandi bigatuma abanyarwanda bahaha imyambaro badahenzwe bijyanye n’ubushobozi bwabo.

Mu Karere ka Kicukiro, Frank Habineza yakiriwe na Meya w’aka Karere Dr. Nyirahabimana Jeanne amwifuriza ikaze muri aka Karere amubwira ko yemerewe kwiyamamaza kuko abyererwa na komisiyo y’igihugu y’amatora.

Mu byo yahereyeho abwira abari baje kumutega amatwi batari bake, Habineza yavuze ko mu karere ka Kicukiro kimwe n’ahandi mu mujyi wa Kigali abantu benshi batunzwe n’ubucuruzi bityo akavuga ko azaha uburenganzira abantu bose bashaka gucuruza kandi akabakuriraho imwe mu misoro avuga ko ari myinshi.

Yagize ati: “Tuzi yuko ari aka Karere ka Kicukiro ndetse n’umujyi wa Kigali wose twese dutunzwe cyane cyane n’ubucuruzi, hari abantu bakora ubucuruzi buciriritse, ari abazunguzayi, ari abanyagataro, ari amaduka tuzi agahinda mufite, tujya tubibona DASSO zibirukankana muvunika, mugwa hasi, turabizi kandi twavuze kenshi ko dushaka ko ibyo bintu birangira burundu.”

Yakomeje avuga ko abanarwanda bose bafite uburenganzira bwo kuba mu gihugu kandi bose bagacuruza ku buryo bungana. Ati: “Twese turi abanyarwanda, u Rwanda ntabwo ari igihugu cy’abakire gusa, natwe ba rubanda rugufi, ab’ubushobozi buke n’ubuciriritse twese tugomba kubana nta muntu utekereza ko afite ubushobozi burenze ubw’abandi cyangwa burenze n’ubw’Imana kubera ko afite amafaranga menshi.”

Uyu mukandida yavuze ko ashyobora gushyiraho gahunda yo gufata abazunguzayi bose akabahuza n’abaranguza imyenda bakajya bakora ubucuruzi buzwi kandi banambaye imyambaro ibaranga ku buryo uzajya umenya ngo umuntu runaka akora ubuzunguzayi ku buryo bwemewe n’amategeko.

Habineza yavuze ko natorwa azanasubizaho ubucuruzi bwa caguwa dore ko kuri ubu Leta y’u Rwanda ifite gahunda yo kuyica burundu igateza imbere ibikorerwa mu Rwanda.

Ati: “Twumvise yuko abakire bo hakurya hariya, turaturanye hariya muri Gasabo aho bafatira imyanzuro, bafashe umwanzuro ngo baciye caguwa, ngo buri munyarwanda wese agomba kwambara umwenda mushyashya, bakiyibagiza ko abanyarwanda bose badafite amafaranga yo kugura iyo myenda mishyashya, kandi n’izo nganda zikora imyenda ntazihari, ariko kubera ko bo ari abakire bahita bavuga ngo twese tugomba kwambara ikositimu tukagendera muri V8 ntibamenye ko hari n’abadafite inkweto, twebwe ikintu cya mbere tuzakora ni ugusubizaho caguwa! Duhe abanyarwanda uburenganzira bwo kwambara umwenda ujyanye n’ubushobozi bwabo!”

Mu guteza imbere urubyiruko no kurushishikariza gutangira imishinga y’ubucuruzi, Habineza yavuze ko natorerwa kuyobora u Rwanda azafasha umuntu wese w’urubyiruko uzatangira ubucuruzi akamara imyaka ibiri adatanze imisoro ku buryo bazajya batangira gusora bamaze gufatisha no kubona inyungu ihagije maze bagasora banezerewe bigatuma badakwepa imisoro.

Yavuze ko azakuraho imisoro ku butaka bwo mu mujyi no mu Rwanda hose kuri ubu busoreshwa kandi ku bashobora guhinga akabaha uburenganzira ku bishanga bagahingamo ibyo bifuza bijyanye n’ibyo bashaka.


Meya wa kicukiro yahaye ikaze Habineza n’abarwanashyaka ba Green Party

Yisangize Inshuti.

Ibitekerezo

Tanga Igitekerezo