Kagame yatanze igisobanuro cya Kicukiro, abahatuye abaha isezerano

Umukandida wa FPR Inkotanyi Paul Kagame yabwiye abatuye Kicukiro ko izina ryabo risobanura ubutunzi ndetse anabasezeranya ko ibyiza kurushaho biri imbere ariko ko tariki ya kane bagomba kuzinduka bakarangiza akazi izuba ritarabica.

Kuri uyu wa gatatu Perezida Paul Kagame ibikorwa byo kwiyamamaza yabisoreje mu karere ka Kicukiro. Aganira n’abaturage baho bari benshi baje kumwakira yabanje kubasobanurira inkomoko y’izina ry’akarere kabo.

Ati :”Kicukiro ubundi muzi icyo bivuze ? Ahantu hatari amatungo ntabwo haba icukiro! Ubwo Kicukiro bishatse kuvuga ubukire bw’ahantu. Amatungo yarahahoze hanyuma ubu zigomba kuba zimaze kugwira nibwo ikiba Kicukiro.”

Yakomeje agira ati :”Naje ngo tujye imigambi y’ukuntu dukomeza kubaka u Rwanda ariko dukomeza no kubaka Kicukiro, rero ibintu ni byinshi. Ubundi mbere abantu basangaga umujyi ariko ubu umujyi usanga abantu kuko Kicukiro ubwayo imaze kuba umujyi, ibyo ni amajyambere.”

Yavuze ko Kicukiro ifite inyubako,imihanda, amashuri abaha isezerano agira ati ”mvuge iki ndeke iki ? biracyaza n’ibindi biduteza imbere biracyaza.”

Yababwiye ko aricyo itariki ya 4 Kanama 2017 ivuze , ngo kuri we ni vitesi . Ati :” Ni nacyo iriya tariki ya 4 ivuze. Buriya muzi icyo ivuze, ni vitesi! Hano muzi gutwara imodoka iyo imaze gufata umuhanda neza igeze aheza irihuta, yongera vitesi. Ubwo rero iriya tariki ya 4 ni iya vitesi. Hanyuma banyamuryango mwese uko muri benshi ndabashimira uko mwaje buri wese mu bikorwa by’amajyambere cyangwa se muri uko gutora tukihuta tukagera kure kandi twese tukajyana n’ufite intege nke tukamufata mu nkokora tukamujyana, abari mu zabukuru tukabasindagiza nabo tukagerana kure. Abatoya tukabaha amahirwe ahagije yo kugira ngo batere imbere.”

Yavuze ko buri wese ushaka ko bamutora afite ibyo yavuga azabagezaho ariko ngo umwihariko wa FPR nuko yo yerekanye ko ibishoboye.

Ati :”Buri wese ashobora kuzakubwira ko aho dushaka kugera ariko rero iyo wahageze ugomba kwerekana ibikorwa abantu babikuramo , inyungu abantu babikuramo. FPR Inkotanyi yarabyerekanye. FPR yabyerekanye ifatanya n’abanyarwanda."

Yavuze ko urubyiruko rugomba gutegurwa ejo hazaza rukazaba arirwo rukorera igihugu.

Yababwiye ko tariki ya 4 bagomba kuba bari kumwe bakarangiza akazi izuba ritarabica. Ati :”Tuzaba turi kumwe itariki 4 mu gitondo kare umurimo nawo tuwurangize kare izuba ritaraba ryinshi iryo twose uyu munsi rirahagije itariki 4 nta mpamvu.”


Yisangize Inshuti.

Ibitekerezo

Tanga Igitekerezo