Kagame yamaze imyaka irenga 30 mu buhungiro ariko yanga ko abanyarwanda babumaramo iminsi 600- Depite Gatabazi

Kuri uyu wa kabiri tariki 01 Kanama 2017, ubwo umukandida wa PFR Inkotanyi yiyamamarizaga mu karere ka Gicumbi, Honorable Depute Gatabazi Jean Marie Vianney yavuze ko Perezida Kagame yamaze imyaka irenga 30 mu buhungiro ariko yatahuka akanga ko abanyarwanda baba impunzi kuko nta byiza by’ubuhunzi.
Depute Gatabazi ahagarariye akarere ka Gicumbi mu Inteko ishinga amategeko y’u Rwanda akaba ari n’umwe mu bashinzwe kwamamaza umukandida wa FPR, kuri uyu munsi yabwiye abari baje kwamamaza Paul Kagame ko abanyagicumbi bose bakunda FPR kuko yabakuye ibuzimu ibashyira ibumuntu.

Yagize ati: “hano hari abantu barenga ibihumbi ijana (100.000) bose bari barahungiye mu nkambi zitandukanye muri Congo, kibumba, Gatare, Rumasi, Kashusha, Mugunga aho hose hari abantu bavuye Gicumbi ariko wageze ku Kibuye nyuma y’iminsi itageze kuri 600 kandi wowe waramaze imyaka 30 mu buhungiro wanga ko tugwa mu buhungiro twishwe n’amacinya n’amashyamba.”

Gatabazi yakomeje avuga ko ibyo FPR yakoreye abanyagicumbi batazabyibagirwa kuko ngo niho yahereye itangiza urugamba rwo kubohora igihugu aho bashinze ibirindiro byambere ku Mulindi. Mu bikorwa byinshi bashima bagejejweho na Paul Kagame harimo inka bahawe bakira ubworo n’imirire mibi.

Yagize ati: “Leta zatsinzwe zigishaga abaturage ko ifuku zivura bwaki, abagabo bari baragatoye; birirwaga bacukura imyobo bahiga amafuku ngo baravura bwaki, ariko wowe waduhaye amata.”

Kuri uyu munsi kandi Umuyobozi wungirije w’Umuryango FPR-Inkotanyi Bazivamo Christophe yibukije abanyagicumbi ko I Gicumbi ariho Kagame yateguriye urugamba rwo kubohora igihugu, araruhayoborera ndetse aranarutsinda.
Yagize ati: “Banyagicumbi ikibatsi cyaturutse hano iwanyu cyakwije ihumure mu gihugu hose, ikibatsi cyubatse ubumwe bw’abanyarwanda, ikibatsi cyashubije umutekano mu gihugu, ikibatsi cyubatse iterambere mu Rwanda rukaba ruryoheye abanyarwanda ndetse n’abanyamahanga bakarwifuza.”

Paul Kagame yunze mu ijambo rya Gatabazi yibutsa abanyagicumbi ko FPR n’abanyagicumbi bafatanyije mu rugamba rwo kubohora igihugu ababwira ko ari bamwe.
Yagize ati: “Amateka Gatabazi yari amaze kutubwira maremare ya Gicumbi, buriya benshi, bamwe dusanzwe turi abanyagicumbi mu bundi buryo. Ariko ibyo ndaba mbirekeye aha ngaha, ndasubira ku mateka y’urugamba uko twahabaye, uko twahabanye namwe, uko twahabereye inshuti, uko twakoranye, uko mwadufashije bigatuma urugamba rushoboka…”

Perezida kagame yabwiye abaturage bari bahuriye mu murenge wa Cyumba ko bagikeneye gufatanya gukora bakagera ku bindi byiza bifuza.
Yagize ati: “Mwahoze muvuga ababahaye inka, ababahaye amata, abahaye imihanda, amashayarazi, amashuri, amavuriro, ubuhinzi,… Biracyaza; ibyiza byinshi biri imbere kandi biracyadusaba kubikorera, ntabwo tubuze imbaraga, ntabwo tubuze ubushake kandi ntabwo tubuze kumenya.”

Perezida Kagame yakomeje gahunda ye yo kwiyamamaza aho yavuye mu murenge wa Cyumba yerekeza mu murenge wa Rutare.

Yisangize Inshuti.

Ibitekerezo

Tanga Igitekerezo