Ahari ikinyuranyo mu migabo n’imigambi y’ingenzi y’abahatanira kuyobora u Rwanda

Imyiteguro y’amatora y’Umukuru w’igihugu irarimbanyije. Abakandida uko ari batatu bari kuzenguruka hirya no hino mu baturage babasobanurira imigabo n’imigambi byabo ndetse n’ibyo bazabagezaho nibaramuka batorewe kuyobora u Rwanda muri manda ya 2017-2024.

Tugiye kwibanda ku bakandida b’amashyaka abiri ariyo FPR Inkotanyi yatanze Paul Kagame nk’umukandida, Democratic Green Party of Rwanda yatanze Frank Habineza ndetse n’umukandida wigenga Phillipe Mpayimana.

Twabegeranyirije iby’ingenzi aba bakandida bavuga ko bazageza ku banyarwanda nibaramuka batowe.

Umurimo

Imibare mishya yashyizwe hanze n’ikigo cy’igihugu gishinzwe ibarurishamibare uyu mwaka, yagaragaje ko abanyarwanda 13.2 % badafite akazi ko gukora biganjemo urubyiruko. Abaturage bafite umurimo ni ryo shingiro ry’iterambere ry’igihugu, kubura imirimo mu benegihugu bikaba intandaro y’ibibazo by’umutekano mu gihugu.

FPR Inkotanyi ku bijyanye n’umurimo, ivuga ko niramuka itowe, izongera umubare w’abize ubumenyingiro buhujwe n’ibikenewe ku isoko ry’umurimo, hanatangwe ibibafasha gutangira umurimo; hazubakwa ubushobozi bw’Abanyarwanda mu guhanga, gutegura no gushyira mu bikorwa imishinga; Hazashyirwaho uburyo bufasha guteza imbere imishinga y’ikoranabuhanga no guhanga ibishya kandi Hazashyirwaho gahunda yo guteza imbere guhanga imirimo, hashyirwaho umushinga w’icyitegererezo ubyara inyungu kuri buri mudugudu.

Ishyaka Green Party: rivuga ko rizanoza Politiki y’igihugu yo kwihangira umurimo, hashyirweho Ikigo cy’Igihugu gishinzwe guhanga umurimo (Rwanda Employment Board) kizashyiraho (Centres d’Information sur l’Entreprenariat) muri buri Karere; ngo urubyiruko ruzatozwa kwihangira umurimo hashyirweho amahugurwa menshi, gushyiraho ikigega kizajya gifasha mu mishinga mito ibyara inyugu kigamije urubyiruko, abagore n’abari….

Mpayimana Philippe: Buri mushomeri uzamara amezi atandatu nta murimo akoze ahemberwa cyangwa yikorera ku giti cye azasabwa gukora imirimo y’inyungu rusange kugira ngo abone imfashanyo yo kubaho, gushyiraho icyiciro cy’abazunguzayi mu bucuruzi kugira ngo hacike imirimo itemewe, uwatswe akazi n’ikoranabuhanga azajya ahabwa indishyi, kuringaniza imishahara y’abakozi ba Leta...


Habineza n’ishyaka rye ngo bazashyiraho ikigega gifasha imishinga mito y’urubyiruko

Ubukungu

FPR ivuga ko ku bufatanye n’Abikorera, hazubakwa inganda nshya hanongererwe ubushobozi inganda zitandukanye zifasha guteza imbere ibikorerwa mu Rwanda no guhanga imirimo ku Banyarwanda, harimo Uruganda rukora imiti; Uruganda rukora inzitiramibu; Inganda zikora ibikoresho by’ubwubatsi; Uruganda rukora amafumbire; Uruganda rukora ibyo gupfunyikamo ibicuruzwa (packaging materials);...

FPR ivuga ko amazi n’amashanyarazi bizagezwa kuri bose, kandi hakoreshejwe uburyo butangiza ibidukikije; hazanozwa serivisi zo gutwara abantu n’ibintu mu migi no mu cyaro; hazarangizwa imihanda ya kaburimbo ihuza Uturere ireshya na km 800 mu Gihugu cyose, hazakomezwa guhuza u Rwanda n’Ibihugu by’Akarere, hakoreshejwe imihanda, gariyamoshi, ikibuga cy’indege cya Bugesera n’ibyambu mu kiyaga cya Kivu.

Green Party: Gukuraho imisoro itagize icyo yahungabanya ku bukungu bw’igihugu, gushyiraho ikigo cyigenga gihuza abasoreshwa na RRA kikazaba gishinzwe kwakira ibibazo by’abasoreshwa ku buryo mu gihe habayeho guhohoterwa ku musoreshwa cyangwa atanyuzwe n’ibyemezo byamufatiwe azajya yitabaza icyo kigo nkemurampaka, kongera imishahara y’abakozi bato hagabanywa iy’abayobozi bakuru, gukora imihanda, gusaranganya amasomo n’imirimo y’ubwikorezi…

Mpayimana: Avuga ko azakuraho Imisoro yose idashingiye ku musaruro w’umuturage ndetse n’iyakwa amatungo n’imyaka bigiye kugurishwa. Mpayimana ngo ku buyobozi bwe nta muntu uzahatirwa kwinjira muri koperative atabishaka.

Ubuhinzi

FPR igaragaza ko Hazatezwa imbere ikoreshwa ry’imashini mu buhinzi. Ubuso bukorwaho amaterasi y’indinganire buzikuba kabiri bunabyazwe umusaruro; hazongerwa imbaraga mu bukangurambaga bugamije guhindura imyumvire mu bahinzi n’aborozi.Buri mwaka, ubutaka bwuhirwa buzongerwaho 12%; hatezwe imbere ikoreshwa ry’imashini mu buhinzi.

Hazashyirwaho uburyo bwo korohereza abahinzi n’aborozi kubona no gukoresha serivisi z’imari mu kuzamura umusaruro..

Green Party: Kuvugurura itegeko rigenga politiki y’ubutaka mu Rwanda ku buryo rizagena imicungire yabwo muri bimwe bikubiye muri iryo itegeko nuko ubutaka buzaba buri mu maboko y’umuturage nta muntu uzongera gukodesha ubutaka kuri Leta; gukuraho umusoro w’ubutaka, hazatezwa imbere inganda zitunganya ibivuye mu bihingwa, gushyiraho Bank iteza imbere ubuhinzi n’ubworozi izajya itanga inguzanyo ndetse itere n’inkunga imishinga y’abahinzi n’aborozi, umuturage ni we uzajya yihitiramo guhinga icyo ashaka bitewe n’ibimufitiye akamaro…

Mpayimana: Ngo azahagarika gahunda igenga isoko ry’ibihingwa, isoko rusange risesuye rikaba ari ryo rigena ibiciro by’imyaka, azahagarika gahunda yo guhingira inganda mbere yo kwihaza, guhagarika gusuzugura isuka n’icyaro, guhagarika kubaka ku butaka buhingwa ko guhunga icyaro bikabije, Gushyiraho ibigega bihoraho by’ubwiteganyirize bw’abahinzi bigoboka abari mu bihe by’inzara.


Kagame n’ishyaka rye FPR Inkotanyi bazorohereza abahinzi kubona serivisi z’imari mu kongera umusaruro
Uburezi

FPR: Hazashyirwa ingufu mu guhangana n’ikibazo cy’abana bata ishuri; Hazongerwa ireme ry’ uburezi mu bufatanye n’ abikorera, hazamurwe ubumenyi n’imibereho myiza by’abarezi, hazongerwa umubare w’amashuri y’icyitegererezo, harimo n’ay’abikorera, bigamije kwigishiriza mu Rwanda abashaka amashuri meza hanze…

Green Party: Kuzamura ireme ry’uburezi no kongera umushahara wa mwalimu, kongera ibikoresho mu mashuri, Igifaransa n’Icyongereza mu mashuri bizanganya agaciro…

Mpayimana :Avuga ko azongera umushahara wa mwalimu, Leta niyo izajya ikurikirana umubyeyi wanze kwishyurira umwana we ishuri aho kuba umuyobozi w’ishuri, no kubuza abashoramari kwiharira inyungu mu bikorerwa abanyeshuri.

Ubuzima

Umuryango FPR Inkotanyi mu migabo n’imigambi uvuga ko hazongerwa umubare w’abaganga, abaforomo, abaganga b’inzobere, n’ abayobozi b’ibitaro, hanazamurwa ireme ry’ imyigishirize yabo; hazashyirwaho ibigo by’ubuvuzi bw’icyitegererezo birimo n’iby’abikorera hagamijwe kuvurira mu gihugu abanyarwanda n’abanyamahanga…

Green Party: Izagaburira abana bafite amezi 6-59 ibiryo bifite intungamubiri, izatanga amatungo ku ngo azakamirwa abana bafite imirire mibi ikabije, gushyiraho ikigo mbonezamirire kuri buri kigo nderabuzima (poste de santé) muri buri kagari, hazashyirwaho nibura ikigo nderabuzima (poste de santé) imwe muri buri kagari, gushyirwaho kw’ imbangukiragutabara byibuze ebyiri (2) kuri buri kigo nderabuzima…

Mpayimana: Azongera ubushobozi bw’abaganga no kongera umubare wabo, gushyiraho uburyo bw’inguzanyo izajya ihabwa abadafite ubushobozi bwo gutanga ubwishingizi bw’ubuzima.


Abadafite ubushobozi bwo kwitangira ubwishingizi bw’ubuzima bazajya bahabwa inguzanyo

Umutekano

FPR: Hazaharanirwa kugira inzego z’umutekano zifite ubushobozi bwo gukomeza guha abanyarwanda umutekano usesuye, kurinda Igihugu no kugira uruhare mu iterambere ryacyo, Hazongerwa imbaraga mu kubaka ubushobozi bw’inzego z’umutekano zose harimo no kuzishakira ubushobozi bwihariye, butuma zishobora kuzuza neza inshingano zazo…

Green Party: Izakaza umutekano ku mbibi z’u Rwanda hakoreshejwe ibyuma by’ikoranabuhanga rigezweho, gutegura uburyo bwo kuganiriza imitwe yitwaje intwaro hagamijwe gushyira intwaro hasi no kubinjiza mu buzima busanzwe cyangwa kubabyifuza bagakomereza mu Ngabo z’Igihugu, abashinzwe umutekano bazongererwa ubumenyi ku buryo igihe umufungwa atorotse bashobora kumufata mu bundi buryo kurasa akaba gisubizo ari cya nyuma kandi akaraswa ahantu hatari mu cyico, umushahara w’abasilikare n’abapolisi uzazamurwa,…

Mpayimana:Mpayimana avuga ko umutekano mu gihugu ucunzwe neza ariko ngo haracyari ahantu hadacunzwe nko mu mirima y’abaturage ari byo azakemura natorwa.Ngo azashyiraho kandi ikigega cy’igihugu cy’umutekano kizafasha ikorwa ry’amarondo ku manywa na nijoro.

Ubumwe n’ubwiyunge

FPR:Hazakomeza kwimakazwa ubumwe n’ubwiyunge mu Banyarwanda, hashyirwa imbaraga muri gahunda ya « Ndi Umunyarwanda », Guteza imbere gahunda y’abarinzi b’Igihango no komora ibikomere byasizwe na Jenoside yakorewe Abatutsi…

Green Party: Ngo izaca ubuhunzi, izashyiraho gahunda y’ibiganiro hagati ya Leta n’abatavuga rumwe nayo no hagati ya Leta n’abanyarwanda muri rusange, Izashyiraho INAMA KAMINUZA Y’IGIHUGU YO GUSASA INZOBE aho hazatumirwa abahagarariye amashyaka, ari mu gihugu no hanze,sosiyete sivile, urugaga rw’abikorera, abavuga rikijyana n’Ihuriro ry’amadini, habemo ibiganiro mpaka ku bibazo by’impunzi, imfungwa za politiki, ubwisanzure mu gutanga ibitekerezo, uburyo bwo kwigorora no gusabana imbabazi, kubwizanya ukuri ku bibazo by’abanyarwanda,kurandura ivangura ry’amoko,kurwanya ubuhezanguni n’ingengabitekerezo ya Jenoside,...

Mpayimana: Uyu mukandida ngo natorwa azageza Inkiko Gacaca no hanze y’u Rwanda ku bakoze Jenoside bihisheyo, abayihakana bakanayipfobya.Hazashyirwaho amasezerano arangiza burundu amakimbirane yashyirwaho umukono n’abahoze ari ingabo z’u Rwanda zatsinzwe cyangwa abazikomokaho...

Tubibutse ko ibikorwa byo kwiyamamamaza bizasozwa tariki 02 Kanama 2017 ubwo abakandida uko ari batatu bazaba bahetuye ibice by’igihugu, bagategereza kuzabona umusaruro w’ibizava mu matora y’umukuru w’igihugu ategerejwe tariki ya 03 n’iya04 Kanama 2017.

Yisangize Inshuti.

Ibitekerezo

Tanga Igitekerezo