Ifungwa rya Meya Sinamenye na bagenzi be, igitambo ku bakandida bahanganye na Paul Kagame

6

Nyuma y’aho Polisi y’u Rwanda itangarije ko ifunze by’agateganyo umuyobozi w’Akarere ka Rubavu, Sinamenye Jeremie hamwe n’Umukozi ushinzwe Imiyoboberere myiza ndetse n’umunyamabanga Nshingwabikorwa w’Umurenge wa Busanze mu Karere ka Nyaruguru bazira kubangamira uburenganzira bw’abakandida bahatanira kuyobora u Rwanda, iminsi yakurikiyeho ku bakandida bahanganye na Paul Kagame wa FPR Inkotanyi, ibintu byahinduye isura mu Turere bajya kwiyamamarimo, aho byafunguriye amahirwe aba bagabo bandi mu kubona abo babwira n’ababakira.

Mu ntangiriro zo kwiyamamaza kwa Dr. Frank Habineza wa GREEN PARTY na Philippe Mpayimana umukandida wigenga henshi bageraga wasangaga bahura n’ibibazo byo kugera aho bateganyije kwiyamamariza bagasanga imbuga ibahamagara, ndetse bakanagaragaza ko babangamirwa mu buryo butari bumwe n’ubuyobozi bw’ibanze.

Mpayimana Phillipe we mu ntangiriro yagezaho afata umwanzuro wundi, nyuma yo kubona ko abantu bataza aho yabaga yateguye, asanga atafata umwanya wo kuvuga imigabo n’imigambi ye nta muntu abwira, afata umwanzuro wo kugenda azenguruka abwira abantu imigabo n’imigambi ye abasanze aho bari mu mihanda.

Ni kenshi Dr Frank Habineza umukandi w’Ishyaka Democratic Green Party of Rwanda, yagiye agaragaza ko yahinduriwe aho yasabye kwiyamamariza bakamuha aho atishimiye bitewe nuko hamwe wasangaga hadatuwe ndetse i Nyagatare ho yimuwe inshuro eshatu aza no guhabwa imbere y’irimbi arahanga, agenda atiyamamaje utibagiwe no kubura ubuyobozi bw’ibanze bubaha ikaze.

Mu Karere ka Kirehe ho Habineza yatunguwe no kwimurwa i Nyakarambi aho yari yahawe ajyanwa i Gahara ku mupaka asanganirwa n’abanyeshuri bo mu ishuri ryegeranye n’aho yiyamamarije bakajya bamukwena, ndetse icyo avuze cyose bakavuga bati: "oya, oya! Ntitugushaka" ibintu bisa n’aho bari babitojwe mbere yo kuvanwa mu ishuri mu masaha y’amasomo.

Na none i Nyagatare Umukandida Habineza Frank yasanze itsinda ry’abamotari bitwikiriye ibyatsi nabo bahetse bakabitambika mu muhanda n’ibirango by’indi mitwe ya Politiki, biba ngombwa ko Polisi y’igihugu ihagoboka isubiza ibintu mu buryo.

I Rubavu Nyamyumba na Kanama Mpayimana Phillipe ubwo yahageraga aje kwiyamamaza yasanze intebe zimuhamagara, bivugwa ko hari hashyizweho amatsinda abiri yari agamije gukumira abitabira ibikorwa byo kwiyamamaza k’uyu mukandida, biri inyuma na Meya n’umwe u bakozi b’Akarere bafunganywe.

Isura nshya nyuma yo gufunga by’agateganyo abayobozi.

Ibintu bisa nkaho byahinduye isura uhereye ku wa gatandatu tariki 22 Nyakanga 2017 nyuma y’ifungwa ry’abayobozi baketsweho kuba inyuma y’ibikorwa nk’ibi.

Ni nyuma kandi ya gasopo bahawe na Minisitiri w’Ubutegetsi bw’Igihugu Kaboneka Francis mu nama yagiranye n’abayobozi b’Uturere, Intara n’Umujyi wa Kigali kuwa 20/7/2017 kuri Video conference, aho yababuriye aba bayobizi b’inzego z’ibanze kutabangamira abakandida ndetse asaba inzego bireba ko ababa baragaragaye kuba inyuma y’ibikorwa nk’ibi ko bikwiye gukorwaho iperereza abo bigaragayeho bakabiryozwa.

Aha ni Kicukiro ubwo umuyobozi w’Akarere ka Kicukiro yari yaje kwakira Dr. Frank Habineza wa GREEN PARTY ahari hateraniye abaturage bari hagati y’ibihumbi bisaga bitandatu

Bidateye kabiri, nyuma y’ifungwa ry’abayobozi bavuzwe haruguru, ku wa gatandatu umukandida Frank Habineza imbaga yarakubise mu Karere ka Nyamagabe yaje kumwumva, ubwitabire buhagije bwakomeje kugaragara mu turere twa Muhanga, Gatsibo, Nyamagabe, Bugesera, Kicukiro, Kamonyi, Rwamagana, Kayonza n’ahandi hose Habineza yageze.

Kuri ubu kandi aho umukandida Philippe Mpayimana anyura hose ubu bigaragara ko abona ubwitabire buri hejuru ugeranyije na mbere y’itariki 22 Nyakanga 2017 ndetse kuri uyu wa 27 Nyakanga yavuze ko ashimishwa no kubona agera ahantu akabona abantu basaga 100 mu minota mikeya, akavuga ko icyizere cyo gutsinda amatora kigenda kizamuka.

Uretse ubwitabire buzamuka umunsi ku munsi, abayobozi b’inzego z’ibanze barimo abayobozi b’Akarere n’Umurenge basigaye baza guha ikaze abakandida bigenga n’uwa Democratic Green Party.

Aba bayobozi basigaye batanga ikaze mu gihe nyamara umwe mu bayobozi b’Akarere ka Ngoma yumvikanye asubiza itangamakuru ko akazi kabo atari uguha ikaze abakandida, mu gihe nyamara yagaragaye yivuye inyuma mu kwamamaza undi mukandida nawe uhanganye n’abo atakiriye.

Mu karere ka Kirehe na ho umukandida wa Democratic Green Party of Rwanda yagezeyo ariyakira nyuma y’aho Meya yamutungiye agatoki akamwereka icyerekezo cy’umurenge wa Gahara.

Uku kubangamira abakandida mu burenganzira bwabo bwo kwamamaza kandi byagarutsweho n’umuvugizi wa Polisi y’igihugu ACP Theos Badege watangaje ku wa 21/0/2017 ko uburenganzira bw’abakandida bose biyamamaza bungana kandi bugomba kubahirizwa ubirenzeho akabihanirwa n’amategeko. Akaba ari yo mpamvu Polisi yataye muri yombi abayobozi bikekwa ko babangamiye bamwe mu biyamamariza uyu mwanya wa Perezida wa Repuburika.

Ibi byerekana ko imyumvire ya bamwe mu bayobozi b’inzego z’ibanze isa nk’aho yari yarasigaye inyuma ku bijyanye n’imyiteguro y’amatora, dore ko izindi nzego zose cyane cyane za leta zahaye abakandida amahirwe n’uburenganzira bungana nyuma y’uko bemejwe na Komisiyo y’igihugu y’amatora.

Ingero ni kuri Polisi y’Igihugu aho yagennye uburyo bwo korohereza abakandida aho biyamamariza no gucungira umutekano (uburinzi) ku bakandida bose kandi kimwe. Ahandi twatanga urugero ni ku bitandazamakuru bya Leta Radiyo na Televiziyo by’igihugu aho bagenerwa umwanya ungana yaba mu makuru, mu biganiro ndetse no kwamamaza imigabo n’imigambi yabo.

Ibi kandi ni nyuma yaho mu kiganiro aheruka kugirana n’abanyamakuru ubwo yatangagaga Kandidatire, Perezida w’u Rwanda Paul Kagame uri no mu bahatanira kongera kuyobora u Rwanda yatangaja ko ntawe ukwiye kubangamirwa cyangwa guhohoterwa kubera kugaragaza uwo ashyigikiye cyangwa ubushake bwo guhatana mu matora.

Aha umukuru w’igihugu yavuze ko bibaye biriho atabishyigikira nk’umukuru w’igihugu ko bibabye biriho ababikora bakwiye kubibazwa n’amategeko. Paul Kagame mbere gato y’uko ibikorwa byo kwiymamaza bitangira yarumvikanye cyane ahamagarira abakiri bato kwitabira ibikorwa bya Politiki kuko ari yo igenga ubuzima bw’igihugu.

Aba bakandida bahatana na Paul Kagame bahamya ko akanyafu kakubiswe bamwe mu bayobozi b’inzego zibanze byakebuye bagenzi babo, bakabona ko amazi atakiri ya yandi, bityo bikaba byarababereye igisubizo muri gahunda zo kwiyamamaza kwabo.

i Gatsibo Umukandida Phillipe Mpayimana ngo ubu bwitabire butangiye kumuha icyizere

Aha ni i Gicumbi ubwo umukanida Filipo yiyamamarizaga mu Rukomo

Ngo abaturage basigaye bakubita bakuzura

Abaturage ngo ntibagitinya no kubagaragariza amarangamutima y’ibyishimo ku mihanda

Abayobozi mu nzego zitandukanye n’iz’umutekano baza kwakira umukandida

Mbere uko byabaga byifashe

I Rubavu ubwo umukandida Philipe Mpayimana yajyaga kwiyamamaza agasanga intebe zimuhamagara

i Nyagatare ubwo umukandida Frank Habineza yajyaga kuhiyamamariza agahitamo gutaha atiyamamaje

i Gahara muri Kirehe, ubwo Dr. Frank yiyamamazaga yahasanze abanyeshuri bo mu mashuri abanza gusa.

Jean Paul Niyitanga/ Makuruki.rw

Yisangize Inshuti.

Ibitekerezo 6

  1. Ikigaragara abo bayobozi baba bagirango bigaragaze kandi se mu byukuri ko usanga benshi ari ibipinga

  2. Ikigaragara abo bayobozi baba bagirango bigaragaze kandi se mu byukuri ko usanga benshi ari ibipinga

  3. Abo bayobozi baba bishyanuye ngo berekane ko bakoze kandi nta nuwabatumye none birangiye bafunzwe. Bazongere izo njiji.

  4. none bazi koo urwanda twifuza ari iryitekinika barekw twitorere kagame mu mucyo bene kudutezaabantu izo njiji. Paul kagame urashoboye ntituzaguterana mu krwanya injinji nkizi

  5. nuko nyine ubwo bize umushinga nabi bazi ko bari gushimisha ingoma bagende bumve uko umunyururu uryana ntibazongera kwitambika uwo batazi. erega igihugu kiri gutera imbere have muri analogue

Tanga Igitekerezo