Kwamamaza

AMATORA 2017

Habineza azakora ate ibyo yizeza abaturage nyuma yo gukuraho no kugabanya imwe mu misoro?

Yanditswe

kuya

na

Jean Paul Niyitanga
Habineza azakora ate ibyo yizeza abaturage nyuma yo gukuraho no kugabanya imwe mu misoro?

Dr. Frank Habineza avuga ko natorerwa kuyobora u Rwanda azakuraho imwe mu misoro indi akayigabanya ku buryo hazasigara umusoro umwe ku bacuruzi bose, umuntu ashobora kwibaza uko uyu mukandida azashyira mu bikorwa gahunda nyinshi nziza agenda yizeza abaturage kuko imisoro ni inkingi ikomeye mu bigize ingengo z’imari z’ibihugu .

Muri gahunda ze agenda ageza ku banyarwanda mu bikorwa bye byo kwiyamamaza, umukandida w’Ishyaka Riharanira Demukarasi no kurengera ibidukikije mu Rwanda, Dr Frank Habineza, agenda agaruka kuri gahunda nyinshi zo guhindura imikorere n’imibereho y’abanyarwanda bigaragara ko zisaba amafaranga menshi.

Muri izo gahunda harimo kubaka ibikorwa remezo birimo imihanda, amashuri, amazi, amashanyarazi n’ibindi,kugaburira abanyeshuri mu mashuri abanza n’ayisumbuye, avuga ko azakuba kane inguzanyo ya buruse ihabwa abanyeshuri biga muri kaminuza, gutanga inka ebyiri ku banyarwanda bashoboye kuzorora, ndetse agatanga amatungo magufi ku banyarwana n’abana bato badashoboye korora inka.

Avuga kandi ko azubakira amazu abasirikare n’abapolisi bose bo mu Rwanda muri gahunda yise ’Gira inzu mupolisi, Gira inzu musirikare’ kandi akabongerera umushahara. Mu guteza imbere uburezi, Uyu mukandida ngo azongerera imishahara abarimu kandi ngo abaganga na bo bazongererwa umushahara.

Habineza avuga ko mu kurinda umutekano azakoresha ibyuma kabuhariwe mu kurinda umutekano nabyo ubona ko bisaba amafaranga menshi.

Imisoro myinshi izakurwaho indi igabanywe.

Ubusanzwe imisoro ni imwe mu nzira zikomeye Leta ikuramo amafaranga yo guteza imbere igihugu, mu Ngengo z’imari z’ibihugu usanga imisoro ifite umugabane munini, gusa Habineza avuga ko mu Rwanda imisoro yabaye myinshi bigatuma bamwe bayikwepa, abandi bakareka gucuruza no gukora ibikorwa bitandukanye ndetse avuga ko hari n’abandi bahisemo kujya gukorera mu mahanga bahunga imisoro ihanitse yo mu Rwanda.

Kubera izo mpamvu, Habineza avuga ko natorerwa kuyobora u Rwanda azakuraho imisoro ku bicuruzwa bito, agakuraho imisoro ku butaka, ubukode bw’ubutaka, akagabanya TVA, kandi ngo azaha uburenganzira urubyiruko bwo gukora ubucuruzi n’ibindi bikorwa mu gihe cy’imyaka ibiri badasora umusoro n’umwe, mu bacuruzi bakomeye, Habineza avuga ko azashyiraho umusoro umwe kandi utabangamiye abacuruzi ku buryo bazawutanga babyishimiye.

Habineza azakurahe amafaranga yo gukora ibyo yizeza abaturage?

Uyu mukandida avuga ko mu Rwana amafaranga ahari ariko akavuga ko akoreshwa nabi, yemeza ko amafaranga igihugu kibona aramutse akoreshejwe neza kandi agasaranganywa neza mu bikorwa biteza imbere abaturage hatabayeho kunyereza imitungo ya Leta ngo ibikorwa byose byakorwa neza.

Ibi Habineza yongeye kubishimangira kuri uyu wa 26 Nyakanga 2017 ubwo yiyamamarizaga mu karere ka Gicumbi mu murenge wa Byumba.

Yagize ati: "Amikoro ntabwo yigeze abura kubera ko icya mbere amafaranga y’u Rwanda arasesagurwa, usanga hari ba Rusahurira mu nduru bafata ingengo y’imari y’igihugu 40%bakayirya bakayimara, ni ukuvuga ngo nubundi amafaranga arahari ariko ntabwo akora ibyo ateganyirijwe gukora."

Avuga ko azabanza gukuraho inzira zose zo kunyereza amafaranga ya Leta kugirango amafaranga ya Leta akore ibyo yagenewe gukora

Ati: "Tuzabanza dufunge izo nzira zose aho ruswa yabaye ikibazo, amafaranga yacu tubanze tuyagarure kandi ibyo bikorwa bizakorwa neza kuko nkubu iyo ubonye umuhanda ungana gutya ntabwo uba ari ko ugomba kumera, uba wakagombye kuba munini cyane ariko baba bawuriye n’ibindi ni uko bigenda bitakara, tuzabanza dufunge izo nzira zose."

Ikindi ni uko yiteguye kubyaza umusaruro umutungo kamere uri mu Rwanda nayo ikaba ari inzira avuga ko izavamo amafaranga menshi yo gushyira mu bikorwa ingamba ze mu guteza imbere abaturage.

Ati: "Ariko n’andi mafaranga azaboneka kuko hari n’indi mitungo kamere dufite mu Rwanda izatangira gukoreshwa mu minsi iri imbere, nkuko twabivuze ubushize hari ahabonywe peteroli, mu minsi iri imbere izacukurwa, ayo ni amafaranga aziyongera mu Rwanda, hari n’iriya Gaze Metane, ntabwo irabyazwa umusaruro neza, twe tuzayibyaza umusaruro! Hari n’ibindi byinshi cyane u Rwanda rufite tuzabyaza umusaruro kugirango amafaranga aboneke."

Habineza avuga ko nubwo hari abumva ko igihugu kizabura amafaranga kuko yavuze ko azagabanya imisoro indi akayikuraho ariko ngo baribeshya kuko avuga ko nagabanya imisoro abasora bazaba benshi ndetse n’abo avuga ko bahungiye imisoro mu mahanga na bo bazagaruka mu Rwanda haze n’abacuruzi bo mu mu bihugu by’amahanga kuko bazaba bishimiye uburyo boroherezwa kwishyura imisoro.

Yagize ati: "Tuzi yuko tugabanyije iriya misoro abacuruzi bazaba benshi mu Rwanda kandi Leta izabona amafaranga kuko abasoreshwa bazaba basora bishimye batavunika kandi ntabwo bazaba bahunga imisoro, urumva ko bazaba bishimye cyane."

Mu bindi yagarutseho ubwo yari ari i Gicumbi, Habineza yavuze ko hirya no hino mu Rwanda abahinzi babangamiwe no kuba imyaka yabo igurwa n’amakoperative akabategeka igiciro ku bicuruzwa byabo bigatuma abahinzi bahomba kandi amakoperative akunguka. Ibi ngo azabikuraho maze buri muturage abashe gucuruza ibicuruzwa bye ku giciro kiri ku isoko nta muntu witambitsemo hagati.

Yavuze ko azashyiraho itegeko riha uburenganzira abavuzi ba gakondo gukora ubuvuzi bwabo kandi Leta ikabongerera ubushobozi bwo gutunganya imiti ya gakondo kuko avuga ko imiti ya gakondo ari ingenzi cyane.

Yavuze kandi ko azateza imbere umujyi wa Gicumbi ukagira isura nziza kandi agafunga ikigo ngororamuco cya Rukomo kuko avuga ko abahajyanwa bahafungirwa ku huryo butubahirije amategeko kimwe n’ibindi bigo byose ngororamuco.

Nyuma yo kuva i Gicumbi Habineza yakomereje mu Mujyi wa Kigali Akarere ka Kicukiro mu Murenge wa Gahanga.



Gitifu w’umurenge wa Gicumbi yakira Habineza.



IBITEKEREZO

Tanga igitekerezo


Kwamamaza Car Free Day/ 18/02/2018
Kwamamaza
Perezida KAGAME avuga ku manyanga mu Iyubakwa rya Hotel ya FERWAFA n’ikibazo cy’abana bo ku mihanda
KAGAME avuga kuri za Mission z’abayobozi zidasobanutse
IBYO ABANYAMAKURU BAVUGA KU IYEGURA RYA Fred MUVUNYI ku buyobozi bwa RMC
Uwari V/Perezida w’Urukiko rw’Urukiko rurinda Itegeko Nshinga/ Burundi
RUNIGA avuga uko bazinjira Congo
Ubutumwa bw’Umuturage kuri Perezida KAGAME
Kwamamaza