FPR yabahaye umukandida muziranye, saa sita muzabe mwarangije akazi : Kagame

Kuri uyu wa Kabiri, Umukandida wa FPR Inkotanyi Paul Kagame yakomereje ibikorwa byo kwiyamamaza mu karere ka Ngororero mu murenge wa Ngororero aho yahuriye n’ibihumbi by’abanyamuryango ba FPR ndetse n’ishuti zayo.

Muri aka karere Perezida Paul Kagame yabwiye abanyamuryango ba FPR Inkotanyi ko abanyarwanda nibashyira hamwe nta kizabananira kandi ko bakwiye gusoza ibyo batangiye.

Ati :”Nk’uko twishyize hamwe rero, ni ukuvuga ngo dukwiye kugisoza nta kizatunanira nta n’igikwiye kutunanira. Abanyarwanda aho tuva turahazi, aho turi turahazi, aho tugana turahazi. Ariko nidukomeza kujyana nk’abanyarwanda twaba dufite ibitekerezo bitandukanye ariko dufite umugambi umwe tuzagera kuri byinshi."

Yakomeje agira ati:”Urebye amateka yacu, aho tuvuye hakomeye nta kindi cyabikemura atari ubufatanye no gukoresha ingufu twese hamwe. Ibyo rero bikongera bikagaruka kuri iki gikorwa cyo kwamamaza, igikorwa cy’amatora wa munsi batubwiye ku itariki 4/8 ngirango twese niwo mugambi duhurijeho.”

Yabasabye ko ku munsi w’amatora bazazinduka bakarangiza igikorwa hakiri kare bitarenze saa sita bakaba bamaze gutora umukandida wa FPR.

Ati :”FPR Inkotanyi ku isonga mu kubaka igihugu cyacu ikongera ikakigira igihugu, FPR yabahaye umukandida. Umukandida musanzwe muzi, musanzwe mukorana ubwo rero inama ni iyo ngiyo ni ukuzinduka byajya kugera saa sita zitariki 4/8 tukaba twasoje akazi uko bikwiriye.”

Yababwiye ko nibatora umukandida wa FPR bazaba batora gukomeza kugira iterambere.

Ati "Tuzaba dutora gukomeza amajyambere, tuzaba dutora gukomeza gukwiza hose amashuri, amavuriro, imihanda, ubuhinzi n’ubworozi tubiteze imbere. Tuzaba dutora ibiduha umutekano, tuzaba dutora ibiduha gutera imbere mu ikoranabuhanga, tuzaba dutora kugira igihugu kitajegajega gitera imbere, gishinga kigakomeza.”

Yababwiye ko ibyo bagezeho ari byiza ariko kandi bidahagije gusa ngo ni urugero rwa byinshi bishoboka kuko ibyiza biri imbere.

Ati :”Ibyo tumaze kugeraho ni ibitanga urugero rw’ibishoboka, nibyo birashimishije ariko hari ibindi byiza biri imbere. Amashanyarazi ava kuri 4 % ubu ageze kuri 20 ku ijana ariko turacyari kure , turashaka kugera kuri 80 ku ijana. Iyo ntambwe ibanza ni itanga urugero rw’ibishoboka n’aho ubundi tuba twaraheze kuri 4 ku ijana.”



Yasanganijwe urugwiro n’abanya Ngororero

Perezida Kagame yabwiye abanyangororero ko manda itaha azibanda cyane ku kibazo cy’imirire mibi kibarizwa muri aka karere.

Ati :”Ku buryo bw’umwihariko Ngororero ndashaka ko twabirwanya tukabitsinda, burundu ntabwo bikwiye ko abana b’abanyarwanda batagaburirwa neza kuko umutungo wacu wa mbere nk’abanyarwanda ni mwebwe abantu.”

Paul Kagame yababwiye ko 2003 na 2010 yaje hano kandi uko yagarukaga ariko ibintu bikomeza kugenda bitera imbere, abizeza ko n’imyaka iri imbere ari ugukomereza muri ibyo byiza.



Yababwiye ko akarere kabo agiye kukagira umwihariko imirire mibi igacika


Byarangiye gutya bacinyana akadiho

Yisangize Inshuti.

Ibitekerezo

Tanga Igitekerezo