FPR gutsindwa ntitubiteganya; GREEN PARTY byanyuze mu mucyo tuzabyakira.., Philipe ati ’ubwo nazategereza 2024’

Mu kiganiro mpaka cyiswe Imigabo n’imigambi cyahuje abahagarariye abahatanira kuyobora u Rwanda cyatambutse kuri Radio na Televiziyo by’igihugu, abari bahagarariye abiyamamaza bavuze uko biteze kwakira ibizava mu matora ategerejwe tariki ya 03-04/08/2017, ndetse n’uko biteguye kubyakira mu gihe bazaba batsinzwe.

Iki kiganiro kibaye bwa mbere mu mateka y’amatora mu Rwanda cyari kitabiriwe na Jean Claude Ntezimana Umunyamabanga Mukuru wa Rwanda Democratic Green Party, Gasamagera Wellars Umuvugizi w’Umuryango RPF- INKOTANYI muri aya matora ndetse n’umukandida wigenga Philippe Mpayimana wari wiyiziye ku giti cye, cyaranzwe no kwibombarika cyane mu kwisobanura no gusobanura imigabo n’imigambi ’abo bahagarariye, baganiriye ku ngingo eshatu zirimo ubukungu, imiyoborere myiza ndetse n’ububanyi n’amahanga.

Kuri GREEN PARTY Ntezimana abajijwe uko bazakira gutsindwa cyangwa uko bazabanira abandi mu gihe baba batsinze, Jean Claude Ntezimana yasubije ko nka GREEN PARTY mu gihe amatora yaba anyuze mu mucyo bazemera gutsindwa, kandi ko mu gihe baba batsinze biteguye kuzakorana n’abandi bashimangira ubumwe.

Kuri Philippe Mpayimana abajijwe, we avuga ko mu gihe yaba atsinze byaba ari umunsi mukuru, gusa atanyuze ku ruhande yemeje ko mu gihe azaba atsinzwe azasuzuma aho imigabo n’imigambi ye itanyuze abanyarwanda akazabinoza neza, maze agategereza amatora ya Perezida ataha azaba muri 2024.

Ku ruhande rw’ishyaka FPR INKOTANYI, Umuvugizi wayo muri aya matora Gasamagera Wellars avuga ko gutsindwa batabiteganya bityo yirinze kubivugaho byinshi, ariko avuga ko nkuko bisanzwe FPR yahisemo gukorera mu bumwe n’andi mashyaka n’abigenga bityo ko n’igihe yaba itsinze nubu bizakomeza. Gusa Gasamagera yemeza ko nibaramuka banatsinzwe binyuze mu mucyo bazabyemera gusa ashimangira ko batabiteganya.

Muri iki kiganiro umuntu atakwita ikiganiro mpaka nkuko cyari cyitezwe na benshi ubwo byatangiraga kuvugwa ko kizaba ari ikiganiro mpaka cy’abahatanira kuyobora u Rwanda, ibyaganiriweho birimo ubukungu, imiyoborere myiza, kurwanya ruswa n’ububanyi n’amahanga, wasangaga ahanini bitinjira mu ngingo nkuko byivugirwa na ba nyir’ubwite aho biyamamaza mu bice bitandukanye by’igihugu. Aha wasangaga ibivugwa n’abahagarariye nta mpaka zirimo ibyinshi ari ibyanditse, ndetse bitanzweho umurongo n’uwari uyoboye ikiganiro Kiliwofasi Barore.

Ukutaboneka kwa Paul Kagame wiyamamaza ku itike ya FPR, ukubura kwa Dr. Frank Habineza byagabanyije uburemere bw’iki cyari kitezwe nk’ikiganiro mpaka.

Tubibutse ko ukwiyamamaza kw’abakandida kuri mu cyumweru cya gatatu, aho biteganyijwe ko bizasozwa tariki ya 02, naho amatora akaba ateganyijwe ku matiriki ya 03-04 Kanama 2017.

Yisangize Inshuti.

Ibitekerezo

Tanga Igitekerezo