Barafinda arashaka kuyobora u Rwanda agashakira abakobwa bagumiwe abagabo

17

Barafinda Sekikubo Fred w’imyaka 46 ni umugabo utuye mu murenge wa Nyarugunga mu Karere ka Kicukiro i Kigali, ngo arashaka kwiyamamariza kuyobora u Rwanda agakemura bimwe mu bibazo birimo kugumirwa kw’abakobwa n’abahungu akabashyingira.

Kuri uyu wa Mbere tariki 12 Kamena 2017 ku ngengabihe ya Komisiyo y’amatora, nibwo abashaka kwiyamamariza umwanya w’umukuru w’igihugu batangiye kuzana ibyangombwa bisabwa ngo bazashyirwe ku rutonde rw’abemerewe kwiyamamaza.

Ahagana saa tanu n’igice, ku biro bya Komisiyo y’amatora nibwo haje Barafinda, umugabo bigaragara ko akuze, avuga ko aje gutanga kandidatire kubw’ishyaka rye "Ishyaka Nyarwanda ku mpamvu nziza nyinshi 200”

Abakozi ba Komiisyo y’amatora bamubwiye ko iryo shyaka ritemewe mu Rwanda, bamugira inama yo gutanga ibyangombwa nk’umukandida wigenga.Yasabwe kujya gushaka imikono 600 y’abantu bamuzi mu turere tw’u Rwanda.

Barafinda yabwiye itangazamakuru ko mu migabo n’imigambi afite harimo no gushakira abakobwa bagumiwe abagabo no gukuraho imisoro ku masambu.

Yagize ati: "Nshaka gushyingira abakobwa n’abahungu kugirango nce umuco wo kugumirwa. Ku rwego rw’umudugudu tuzabahuza nka kuriya umuganda ujya uba, hanyuma abashimanye tubashyire ku rutonde tubashyingire ku mugaragaro bose babireba, tububakire abazajya bamara imyaka icumi tuzajya tubaha impamyabumenyi yo ku rwego rwa Kaminuza. Abazongera bakamarana indi myaka icumi, tubahe iyo ku rwego rwa Kaminuza rw’Ikirenga, ni uko tugiye kubakira abanyarwanda ingo zabo, tuzageraho twubakire akarere kose kurengaho."

Yavuze ko abaturage badakwiye gusorera ubutaka bwabo, kubw’ibyo ngo natorwa azakuraho iyo misoro.

Ati "Njyewe numva mfite ubushobozi mu rutirigongo rwanjye, nakuze ndi umuhungu uyobora abandi ahantu hatandukanye. Bityo rero ubuyobozi buri mu magufwa yanjye mugiye kunguka umunyepolitiki w’akataraboneka. Tuzakuraho imisoro ku butaka gakondo ku banyarwanda. Nta mpamvu yuko umunyarwanda asorera ubutaka bwe, keretse umunyamahanga niwe uzajya usora."

Nubwo ishyaka rye ritaremerwa mu Rwanda, Barafinda yavuze ko rifite abanyamuryango basaga miliyoni icyenda.


Barafinda wemeza ko afite abanyamuryango basaga miliyoni icyenda mu ishyaka ritaremerwa mu Rwanda.

Umwanya ukomeye yagize kuva yavuka ngo ni ukuba umuyobozi w’ishuri.Ubu ni umwarimu .Mu mashuri yisumbuye yize Amateka, Icungamutungo n’Ubumenyi bw’isi.

Ngo afite umugore n’abana icumi kandi ngo ni umunyarwanda wibohoye ku mutima no mu bitekerezo.

Ngo we mu matora ntazaba aje guhangana ahubwo azaba aje kurushanwa kuko guhangana ni bibi.

Izina rye Barafinda ngo risobanura ko ari umuhanzi utarahanzweho, naho Sekikubo ngo bisobanura umugabo wanyuze mu bibazo byinshi.

Ngo afite impamvu 200 zimutera kwiyamamariza kuba Perezida, izi mpamvi ngo azazitangaza mu kiganiro azaha abanyamakuru namara gutanga Kandidatire. Ishyaka rye RGB nitaryemera ngo aziyamamaza nk’umukandida wigenga kandi ntarajya no gushaka imikono 600 isabwa umukandida wigenga.


Barafinda ushaka kwiyamamariza kuba Perezida

Yisangize Inshuti.

Ibitekerezo 17

  1. Uyu mugabo afite ibitekerezo bizima,gusa ntaho yamenera kugira ngo abe umukuru w igihugu. gusa ni umugabo ukunda pilitike, twagendeye hamwe mumodoka yari ivuye i remera igana Kicukiro,yari kuvuga kubintu by a politiki gusa yabigize ikiganiro mpaka mu modoka(KBS).

  2. Mwitumwanya mwiyamamaza musesagura imitungo yanyu.mushaka majwi. Dufite intore izirushintambwe gukomera nyakubahwa President kagame

  3. Mwitumwanya mwiyamamaza musesagura imitungo yanyu.mushaka majwi. Dufite intore izirushintambwe gukomera nyakubahwa President kagame

  4. ibyo gukuraho gusorera ubutaka nange nabimuhera amanota menshi cyane barafinda nuko urimo gusetsa abantu, naho ubundi urimo kudushimira ahaturya nukuri amajwi wayabona

  5. 1 | 2

Tanga Igitekerezo