Umwami Kigeli V Ndahindurwa yatangiye mu buhungiro

7

Kigeli V Ndahindurwa, Umwami wategetse u Rwanda wari uri mu buhungiro muri Leta zunze ubumwe za Amerika yatanze umugambi wo gutahuka mu Rwanda utagezweho.

Aya makuru yamenyekanye kuri uyu wa 16 Ukwakira 2016 avuga ko umwami Kigeli V Ndahindurwa yatanze ( Ntibavuga gupfa kw’Umwami bavuga Gutanga).

Amakuru atugeraho aravuga ko yatanze kuri uyu wa gatandatu tariki 15 Ukwakira 2016 nyuma y’iminsi itatu yari amaze arwariye mu bitaro muri Leta zunze ubumwe za Amerika.

Umwami Kigeli V Ndahindurwa yavutse tariki 29 Kamena 1936, avukira i Kamembe (Rusizi y’ubu) mu ntara y’u Burengerazuba bw’u Rwanda.

Ubusanzwe Kigeli V Ndahindurwa akivuka se yamwise Ndahindurwa Jean Baptiste.

Se wa Kigeli V Ndahindurwa ni uwari umwami w’u Rwanda witwaga Yuhi V Musinga wategetse u Rwanda kuva 1895 kugeza 1931.

Umwami Kigeli V Ndahindurwa yategetse u Rwanda kuva kuwa 28 Nyakanga 1959 kugeza tariki 28 Mutarama 1961.

Kigeli V Nahindurwa yize amashuri yisumbuye mu yahoze ari Groupe Scolaire Astrida yaje guhinduka Groupe Scolaire Officiel de Butare, akomereza i Nyangezi mu cyahoze ari Zaire ubu ni Repubulika Iharanira Demukarasi ya Kongo.

Kigeli V Ndahindurwa yimye ingoma asimbuye mukuru we Mutara III Rudahigwa wasimbye se akayobora kuva 1931 kugeza 1959 nyuma akaza gupfa urupfu rutunguranye tariki 25 Nyakanga 1959 aguye i Bujumbura yagiye kwivuza ari na bwo yahise asimburwa na Ndahindurwa wari ukiri muto ( ku myaka 23 gusa).

Kuva yahunga, Kigeli V Ndahindurwa yanze gushakira umugore mu buhungiro ndetse n’ubu atanze yari afite imyaka 80 nta mwana afite ndetse nta n’umugore yigeze ashaka.

Yabonye ubuhungiro muri Amerika muri Leta ya Virginia avuye mu bihugu bitandukanye birimo Tanzania, Uganda na Kenya.

Ni kenshi byagiye bivugwa ko Kigeli V Ndahindurwa agiye gutahuka ariko ntibigere ku ntego agakomeza kwizaririza asa n’aho adashaka gutaha none birangiye atangiye mu mahanga akiri mu buhungiro.

Kigeli V Ndahindurwa hari amateka ahuriyeho na Se

Kigeli V Ndahindurwa yavuye ku butegetsi ahiritswe na Mbonyumutwa Dominique tariki 28 Mutarama 1961. Ibi abihuje na se kuko na we ( Yuhi V Musinga) yavuye ku butegetsi ahiritswe n’Ababiligi bamusimbuza Mutara III Rudahigwa.

Aba bombi kandi bahuriye ku kuba barahiritswe ku kagambane k’Ababiligi kuko Mbonyumutwa Dominique ni we wakoreye kudeta Kigeli V Ndahindurwa ashyigikiwe n’abakoloni b’Ababiligi, icyo gihe yari yagiye i Kinshasa aho yagombaga kubonana n’Umunyamabanga mukuru wa Loni, Dag Hammarskjöld.

Ni na ko byagendekeye Se, Yuhi V Musinga kuko na we yahiritswe ku kagambane k’abakoloni b’ababiligi bamusimbuza Mutara III Rudahigwa (umuhungu we)

Aba bami bombi kandi bahuriye ku kuba baratangiye mu mahanga kuko uyu Kigeli V Ndahindurwa yatangiye muri Leta zunze ubumwe za Amerika kandi na se umubyara na we yatangiye mu buhungiro ahoze hitwa muri Zaire ( ubu ni muri Repubulika Iharanira Demokarasi ya Congo)

Yisangize Inshuti.

Ibitekerezo 7

  1. Ubwami bwaraciwe! Yari umwami nyabaki? Twageze muli Republika na Démos crates mubahe? Ntamwami mbonye muli ndahindurwa, ni musigeho gutera icyocyere! Iseseme!

  2. Ubutegetsi Bwagatsiko Nibubyinire Kurukoma Kuberako Icyo Bashatse bakigezeho bashatse kumushimuta bakora uko bashoboyekose ngo bamujyane mugatsiko kabo arabyanga intego yoguhuza abanyarwanda ntituzayibagirwa twihanganishije abanyarwanda bose bakomere kandi bihangane Imana imwakire mubayo

Tanga Igitekerezo