Kera narakubaganaga,...Nanga ubucabiranya n’akarengane: Byinshi kuri Senateri Tito Rutaremara

2

Umukambwe Dr Senateri Tito Rutaremara yavutse mu 1944, avukira ahitwaga muri Teritwari ya Kibungo ubu ni mu Karere ka Gatsibo mu Ntara y’Iburasirazuba, mu biranga buzima bwe harimo kwanga akarengane, kwanga ubucabiranya, kwanga udutsiko agakunda kuganira. Kera ngo yarakubaganaga cyane.

Amashuri abanza kuva mu wa mbere kugeza muwa gatanu yayize ku ishuri ribanza rya Paruwasi ya Kiziguro ( Icyo gihe yari Misiyoni) Umwaka wa gatandatu yawigiye i Nemba (mu Ruhengeri).

Amashuri yisumbuye yayize mu Iseminari yo ku Rwesero (yahamaze umwaka umwe n’igice) ayakomereza muri Koleji Saint Andre amazeyo imyaka ibiri ahita ahungira muri Uganda. Ageze muri Uganda ngo yamaze imyaka itatu atiga, nyuma aza kujya kwiga ahitwa Ibanda aharangiriza ayisumbuye ahita ajya gukora akazi ko kwigisha.

Nyuma y’igihe gito yaje gusubira kwiga (Muri kaminuza) Amara imyaka ibiri muri Kaminuza yiga ubwarimu, Ahita ajya mu Bufaransa amarayo imyaka 11 yiga aza afite Metirize na Dogitora. Yavuye mu Bufaransa mu 1987, asubira muri Uganda afatanya n’abandi banyarwanda bari bariyo gushinga umuryango FPR- Inkotanyi.

Uko yirukanywe mu Iseminari kubera ubukubaganyi

Nkuko twabivuze haruguru, Senateri Tito yamaze umwaka umwe n’igice mu iseminari. kuvayo kwe ngo ntibyabaye ubushake bwe ahubwo byatewe n’amakosa yakoze y’ubukubaganyi baramwirukana.

Avuga iby’ubu bukubaganyi yagize ati: "Ubundi Kera narakubaganaga, abandi barakubaganaga babona umu Padiri bakitonda nge nkakomeza, nyuma bambona kenshi baranyirukana babona ntaba Padiri"

Yavuze uburyo yakubaganiye umuzungu wakoraga mu iseminari ndetse aza no kumuhirika amutura mu mazi.

Ati: "Hari ubwo twarimwo twubaka ishuri dufasha abubatsi kubaka itaje, hanyuma nari nje ntwaye ingorofani yari iriho amatafari, hanyuma hari umuzungu wari uhari, ntitwamenyaga n’ibyo akora yabaga ari aho ngaho, duhurira ku kantu k’agatindo arambwira ngo ninsubire inyuma kandi nikoreye amatafari (kugirango abone aho aca) ndamubwira nti nawe garuka inyuma arambwira ati ibyo ni agasuzuguro, hanyuma ndamusunika n’ingorofani yikubita mu mazi...."

Yavuze uburyo yanze agasuzuguro k’abazungu bari baje kwiga muri Saint Andre baturutse muri Kongo bahunze intambara aho umuzungu yageze muri Saint Andre umwirabura amukozeho umuzungu aramubwira ngo utanyaduza (kuko abazungu basuzuguraga abirabura cyane). Nuko Tito ngo abwira umwirabura ati: "Mukubite" ariko uwo mwana atinya gukubita umuzungu Tito ahita amurya urwara, ajya kumurega Saint Andre na ho baramwirukana.

Imikino n’Imyidagaduro: Senateri Tito akiri umusore ngo yakundaga gukina umupira w’intoki wa Volley Ball na Basket Ball. Mu bijyanye n’imyidagaduro ngo yakundaga kujya muri sinema, akajya kubyina, akajya mu biganiro mpaka bya Politiki, ubundi akareba za filime.

N’ubu ngo akunda kumva abahanzi nyarwanda akanareba za filime z’amaseri kuri televisiyo, gusa ngo hari ubwo atangira seri akazongera kuyireba byinshi byaramucitse kubera kubura umwanya.

Urugendo rwe rw’ubuhunzi

Nyuma yo kwirukanwa muri Saint Andre (hari mu 1961 afite imyaka 17), Senateri Tito yasubiye iwabo asanga abantu b’iwabo barahunze ariko ahita afatwa ajya gufungirwa i Kibungo (Ngoma y’ubu), nyuma aza gufungurwa nyuma y’amezi atatu n’igice ahita asanga abanyamuryango be muri Uganda.

Aho mu buhungiro ubuzima ngo bwari bukomeye kuko nta mahema babahaga ahubwo ngo bubakaga utuzu tw’ibyatsi bakaba ari two babamo.

Mu minsi mike ngo batangiye gutungwa no kujya guhingira ibyo kurya kuko imfashanyo y’ibiribwa yatangwaga amezi atarenze ane.

Yakoreye amafaranga bwa mbere ubwo yakoraga imisiri yo gutunganya umuhanda muri Mbarara (Uganda) mu kwezi agahabwa amashiringi ya Uganda 10 ku kwezi, icyo gihe ngo yavunjwaga amafaranga y’u Rwanda arindwi.

Uko yagiye mu Bufaransa

Ngo yagize amahirwe aza kubona buruse yo kujya kwiga mu Bufaransa kuko Abagande barahangaga kuko batashakaga kwiga igifaransa, impunzi ngo ni zo zahabwaga buruse zo mu bihugu bivuga Igifaransa.

Icyamuteraga ingufu zo kwiga ngo ni uko yumvaga nta kandi kazi azabona uretse ako kwigisha (impunzi nta cyizere cyo kubona akandi kazi zabaga zifite) ubwo rero ngo yashakaga kwiga amashuri menshi kugirango nanaba mwarimu byibuze azigishe muri kaminuza.

Ikindi ni uko ngo nyuma yo kugera mu Bufaransa, byari bigoye guhita agaruka muri Uganda kuko na ho ngo hari hariyo intambara, ibi ngo byatumye akomeza kwiga kugeza abonye Dogitora. Ati: "Wenda iyo ngira igihugu mba nararangije lisanse nkaza nkashaka akazi ariko kuko nabaga nziko ari ukujya kwigisha muri segonderi nacikaga intege."

Icyamuteye kujya muri politiki n’uburyo yashinze RPF

Impamvu ikomeye yatumye ajya muri Politiki ngo ni ubuhunzi. Ati: "burya iyo uhunze ukabona wararenganye utangira kujya muri Politiki, uba wibaza uti mbese tuzataha ryari?." Ngo yakundaga gusoma amateka ya Politiki ubwo yari ari mu buhungiro kugirango amenye uko azarwanya akarengane ubundi ngo yakundaga kujya mu biganiro mpaka bya Politiki.

Ageze mu Bufaransa ngo yahasanze abantu b’ingeri zitandukanye bafite ibibazo by’akarengane, ibi ngo byatumye ibitekerezo bye birushaho kwaguka kuko byatumye bihuza binjira muri politiki cyane atangira gutekereza uburyo bwo kubohora igihugu no kurwanya akarengane.

Mu 1986, Senateri Tito yahaye impunzi zari muri Uganda igitekerezo cy’ukuntu bashobora kwikura mu karengane kirashyigikirwa. Akiva mu Buransa ngo nta kindi yatekerezaga uretse gutangiza RPF, imaze gushingwa ngo yagiye ikomera kugeza ubwo baje kubohora igihugu mu 1994.

Guharanira gushinga RPF ngo byamusabye kwigombwa gukora akandi kazi imyaka myinshi. Ati: "Abandi nibura babaga bafite akazi, njye navuye mu 1986 ngeza mu 1996 nta kazi gahemba ndakora, ndi aho nta faranga mfite."

Igitekerezo cye ngo cyavugaga ko hakwiye kubaho abantu bitangira gukora ibikorwa bya politiki nta mushahara kugirango bazabohore igihugu cyabo. Yabaye umunyamabanga mukuru wa FPR igitangira, mu 1989 aba Komiseri w’ubukangurambaga, kuva mu 1991 yabaye umuhuzabikorwa w’ibikorwa bya FPR. Icyo gihe ngo yahoraga mu kazi ko gushishikariza urubyiruko kwitangira kurwanya akarengane.

Kuri we ngo kuba umunyapolitiki mwiza bisaba gukunda igihugu ukumva wagikorera ukagiteza imbere ugakurikiza ukuri, ukarwanya akarengane ugaharanira gukungahaza igihugu.

Ngo iyo atekereje urugendo rwo kubohora igihugu akareba aho u Rwanda rugeze ubu ngo biramushimisha ariko ngo abona hari aho u Rwanda rutaragera, ngo igihe u Rwanda rutaragera mu cyiciro cy’ibihugu bikize ku isi, inzira iracyari ndende kandi ngo urubyiruko ni rwo rufite inshingano yo kurugeza aho ibindi bihugu byakize biri.

Ibyo Senateri Tito azi kuri Perezida Kagame

Yagize ati: "Njyewe Perezida Kagame ndamuzi twarabanye,....buriya ni umuntu uzi gushyira ibintu ku murongo, icya kabiri ni uko areba kure, abona ibintu mbere yanyu mwe mutarabibona wenda akabibabwira mukabiganiraho, ikindi rero ni uko atajya ananirwa, ni umuntu ushoboye ufite intumbero zo guteza imbere igihugu bimurimo, biri mu \maraso ye, asa n’uwabinyoye, si ibintu ashakisha, ni imibereho ye."

Senateri Tito akunda iki? yanga iki?

Senateri Tito buriya ngo ni umuntu wicisha bugufi, yanga akarengane, n’abantu bagira ubucabiranya. Ati: "Buriya njyewe ndi umuntu wicisha bugufi, umuntu wicisha bugufi ndamukunda, nanga akarengane sinzi niba ari uko nakabayemo guhera cyera, iyo mbonye akarengane numva bimbabaje, ikindi abantu batanziho ni uko nanga ba bantu bagira uducabiranya, ba bantu baca hasi bagacabiranya ndabanga, utwo tuntu ndadutinya, kuganira ugatebya n’abandi ndabikunda, ndaganira nkasetsa abantu ugasanga banyibonamo.

Uko ntinya ubucabiranya rero ni ko nanga abantu bagira udutsiko, bubaka utuntu tw’udutsiko bakikururiraho ibintu, nanga abantu basa n’abashaka kukurusha ubwenge kandi ari abajura bagenda babeshya bakavuga ibintu ariko atari byo bakora. "

Ngo akunda kurya ifiriti na Foromaje n’umugati mugati cyangwa ibirayi byokeje neza.

Senateri Tito akunda kurera abana bababaye, ngo iyo abonye ibintu yumva yabisangira n’abatagira kirera. Kubera ko igihugu cyahuye n’ingorane kikagira imfubyi nyinshi ngo agomba kuba urugero rwiza abandi bigiraho kurera imfubyi zibabaye.

Ibi Senateri Tito Rutaremara yabitangarije mu kiganiro yagiranye na Radiyo Rwanda kuri iki cyumweru tariki 11 Kamena 2017.

Yisangize Inshuti.

Ibitekerezo 2

Tanga Igitekerezo