Nyarugenge: Ngo hari abayobotse idini rishingiye ku kiyobyabwenge cy’urumogi

2

Mu karere ka Nyarugenge mu murenge wa Nyarugenge akagari ka Biryogo ingeso mbi yo kunywa itabi yamaze gufata indi ntera kugera n’aho ngo bamwe basigaye barakoze amatsinda bita amadini ashingiye ku kiyobyabwenge cy’urumogi.

Ikoreshwa ry’ikiyobyabwenge cy’urumogi ni kimwe mu bibazo byagarutswe cyane mu kiganiro cyahuje abaturage batuye Akagari ka Biryogo n’umujyanama ku rwego rw’Umujyi wa Kigali Masozera Andre Pierre nyuma y’umuganda rusange wabaye kuri uyu wa Gatandatu tariki 24 Nzeli 2016.

Abaturage batandukanye bagiye bagaragaza ko babangamiwe n’icuruzwa ry’ibiyobyabwenge rikomeje kwiyongera muri aka kagari kuri ubu bikaba bimaze gufata indi ntera aho abantu bakuru basigaye bifashisha abana mu gucuruza no kugura ibiyobyabwenge byiganjemo urumogi.

Abayobozi b’imidugudu bashyize mu majwi abantu baturuka mu tundi duce bakavuga ko ari bo baza kugurisha ibiyobyabwenge muri aka kagari ka Biryogo.

Umuyobozi w’umudugudu wa Gabiro mu kagari ka Biryogo yahakanye ko mu mudugudu ayobora habarizwamo ibiyobyabwenge byiganjemo urumogi maze avuga ko abayobozi bahabwa amakuru atari yo ndetse yemeza ko umudugudu ayobora wahawe igihembo kubera kurwanya ibiyobyabwenge byiganjemo urumogi.

Yagize ati: “nta rumogi ruri muri uriya mudugudu, unasanzemo tige imwe yarwo nakwegura kuko ntacyo naba maze.”

Uyu muyobozi yakomeje avuga ko ntabyera ngo de ko bafite abantu bacye cyane bacuruza iki kiyobyabwenge ndetse bazwi kuko bafite urutonde rwabo gusa bakaba bafite ikibazo cy’ uko aba babicuruza iyo babashyikiriza inzego z’umutekano ngo zibahane ariko ntizibikore bakagumya kwidegembya ndetse ngo n’ iyo bafunzwe ntibamaramo kabiri

Idini rishingiye ku kiyobyabwenge cy’urumogi.

Masozera Andre Pierre umujyanama mu nama njyanama y’umujyi wa Kigali wari muri uyu muganda yasabye abaturage babarizwa mu kagari ka Biryogo kurwanya ibiyobyabwenge bimaze gufata intera ndetse avuga ko hari n’abashinze amadini ashingiye ku rumogi.

Ati: “Buri wese afite idini asengeramo, iryo dini agira ukuntu aryiyumvamo, iyo myemerere ye ituma yumva ko agomba gusenga gatatu cyangwa kane cyangwa buri munota, akamenya ukuntu agomba kwitwara n’ukuntu agomba gukora akavuga ati ninkora neza nzajya mu Ijuru,

...ariko uyu munsi hari idini rindi rigiye kuzatuma abantu bapfa, kandi iryo dini riribasira inzego zose, idini rigendeye kuri rya tabi rituma abantu bayoba ubwenge iryo dini rimaze gufata indi ntera mu Biryogo nubwo atari ho honyine, iyo rero umaze kwemera ko idini ryawe ari ukunywa urumogi turagufata tukujyane i Wawa cyangwa i Ndera ”

Masozera yavuze ko bibabaje kubona abacuruza urumogi basigaye bifashisha abana bato mu kugura no kugurisha ibiyobyabwenge maze avuga ko umujyi wa Kigali ugiye gufatira ingamba ababigiramo uruhare bose.

Masozera kandi yavuze ko uretse guhindura uburyo bwo kugura no kugurisha urumogi, ngo tumwe mu tubari dusigaye dushyira ibiyobyabwenge by’urumogi mu byo bita Shisha (imyuka ikunze gukoreshwa mu tubyiniro ubusanzwe ihumura neza) maze ngo mu mwanya wo gukoresha iyo myika myiza bagakoresha imyuka y’urumogi.

Yagize ati: “ Kunywa urumogi na byo byahinduye isura, uragenda ugasanga abantu bafite Shisha, hari abashyiramo urumogi uko umuntu agenda akurura umwuka ukabona aragenda ahinduka, iki kibazo turi kugikurikirana turaza kukiganiraho turebe uburyo cyacika.”

Yavuze ko abantu bo hirya no hino mu bice by’umujyi wa Kigari bagiye bakora amatsinda yo kunyweramo ibyo biyobyabwenge aho yatanze urugero mu bice bya Biryogo, Rwezamenyo, I Remera n’ahandi.

Yavuze ko abantu bakwiye kwirinda iyi ngeso mbi yo kunywa ibiyobyabwenge kuko nta ngaruka nziza bigira ku buzima bwabo.


Abaturage mu muganda usoza ukwezi kwa Nzeri


Abaturage nyuma y’umuganda bakoze inama bungurana ibitekerezo

Masozera yasabye abasaritswe n’ibiyobyabwenge kubivamo batarabihanirwa

Yisangize Inshuti.

Ibitekerezo 2

  1. first twibaze ibi mbere yumwanzuro:Kuki rukundwa,kuki baruca ariko bikaba ibyubusaa,ese abarunyoye Bose barasaraa cg harimo kwitiranya? ahubwo bashyireho conditions Wenda rugure1000 ark bareke abanyarwanda bafate ikibanezeza uwuzanyuranya na uwuzzl

  2. Ayonamahano!! Ubwose Barasenga Mu Isengesho? Cg Nuguhura Bakanwa Ibyobiyobyabwenge? Ubuyobozi BUzasure Ayomadini Burebe Imisengengere Yayo.

Tanga Igitekerezo