Nashakaga kwandika igitabo kimeze nka Bibiliya -Hon Bamporiki avuga ku gitabo yamuritse

Hon Bamporiki Edouard, umudepite mu Nteko Ishinga Amategeko y’u Rwanda, avuga ko ubwo yandikaga igitabo yise ‘Mitingi Jenosideri’ yashakaga kwandika ikimeze nka Bibiliya kirimo isezerano rishya n’irya Kera ariko agahura n’imbogamizi zuko abavuka ku bajenosideri banze kwandikwa mu gitabo kimwe n’ababyeyi babo.

Iki gitabo cyanditse mu ndimi ebyiri, mu Kinyarwanda cyitwa “Mitingi Jenosideri: Imbundo, imbarutso y’imbunda yarimbuye imbaga” na ho mu cyongereza kikitwa “My son, it’s a long story: Reflections of Genocide perpetrators.” Cyashyizwe ahagaragara ku mugoroba wo kuri uyu wa 28 Gicurasi 2017.

Bamporiki avuga ko yanditse iki gitabo abanje guhura n’abantu bamuca intege ariko akomeza kwiyemeza kucyandika kuko yatekerezaga ko hari igihe abana bazavuka mu gihe kiri imbere bazakenera kumenya ukuri ku mateka ya Jenoside yakorewe abatutsi.

Avuga ko yari afite umugambi wo kwandika igitabo kimeze nka Bibiliya gifite isezerano rya Kera ririmo abajenosideri, n’isezerano rishya ririmo abanyarwanda igihugu kigishije ariko ahura n’imbogamizi z’uko abana bavuka ku bakoze jenoside bamubwiye ko badashaka kujya mu gitabo kimwe n’ababyeyi babo.

Ati: “Ubundi nashakaga kwandika igitabo kimeze nka Bibiliya, nshaka kugaragaza isezerano rya kera ririmo abajenosideri, n’isezerano rishya ririmo abanyarwanda iki gihugu cyigishije, ariko icyo nahuye na cyo kirakomeye, nahuraga n’umuntu ufunze akambwira ngo mfite umwana ukora muri banki ugende unshimirire Perezida Kagame ko yatwigishirije abana nubwo twahemukiye igihugu, nkavuga ngo uwo mwana ngiye kumushaka, ariko abana bose nashatse barambwiraga bati nonese wowe urumva igitabo papa arimo nanjye nakijyamo? Abagize neza barambwiye ngo nandike bibiri, kimwe kirimo ababyeyi n’ikindi kirimo abana babo.”

Bamporiki we ubwe yemera ko hari abo mu muryango we bakoze Jenoside ariko akavuga ko atazahwema kugaragaza ukuri kuri Jenoside yakorewe abatutsi.

Mu kwandika iki gitabo, avuga ko yagowe cyane no kumva ubuhamya bw’abagore bakoze Jenoside kuko we ngo Jenoside iba yari afiye imyaka isaga gato 10 ariko ngo nta mugore yabonye mu bitero by’abakoze Jenoside.

Ngo yatunguwe no kumva n’abagore b’abakeba barashoboye kujya inama bakica umututsi kandi ubusanzwe abakeba batajya bumvikana.

Ati: “Ubundi Abanyarwanda ntabwo bakunda umuco wo guharikwa, ariko hari abahutukazi babiri twaganiriye bashatswe n’umugabo umwe, jenoside igeze bumvikana kujya kwica umuntu umwe kandi barabikora. Ubundi bizwi ko abakeba nta mushinga bakorana, kubona abantu bahuje umugabo bumvikana ko bagiye kwica umuntu bakabigeraho, njye byanyumvishije ubukana iyi jenoside yari ifite binanyumvisha ko uruhare rw’abagore muri Jenoside rukomeye cyane.”

Iki gitabo kitezweho umusaruro ukomeye.

Abasomye iki gitabo bavuga ko gifite umwihariko wo kuba gikubiyemo ubuhamya bw’umwimerere bw’abantu bateguye bakanakora Jenoside. Ubuhamya bugikubiyemo bwatanzwe n’abantu b’ingeri zitandukanye barimo abagore, abakecuru, abagabo n’abasaza ndetse n’abari abayobozi mu gihe jenoside yakorwaga basobanura uruhare rwabo ubwabo muri Jenoside yakorewe abatutsi.

Harimo kandi ubuhamya bw’abahuye n’ingaruka za Jenoside barimo nk’abana bavutse ku babyeyi bafashwe ku ngufu muri Jenoside n’ubuzima abo babyeyi bahohotewe babayemo.

Umunyamabanga nshingwabikorwa wa Komisiyo y’igihugu yo kurwanya Jenoside (CNLG) Dr Jean Damascene Bizimana avuga ko iki gitabo bakitezeho umusaruro mwinshi bitewe n’umwihariko wacyo.

Yagize ati: “Guha ijambo abakoze Jenoside bakaba ari bo bivugira uko Jenoside yateguwe, ni intambwe kuko binafasha mu kurwanya no guhangana n’ingengabitekerezo ya Jenoside cyane cyane abapfobya n’abahakana ukuri kuri Jenoside yakorewe abatutsi [….] ukwemera icyaha kw’abakoze Jenoside bivugira ibyo bo ubwabo bakoze ni bumwe mu buryo bwerekana ko Jenoside yakorewe abatutsi atari impanuka ahubwo ko ari umugambi wateguwe na Leta igakoresha abaturage bayo bari mu nzego no mu byiciro bitandukanye.”

Dr Bizimana yashimiye Hon Bamporiki kuba yaragize ubutwari bwo kugaragaza ukuri kuri Jenoside kandi igihe yakorwaga we atari ari mu bahigwaga. Yanamusabye kugihindura mu ndimi nyinshi zishoboka kugira ngo kizasomwe n’abantu benshi bashobore kumenya ukuri gitanga kuri Jenoside yakorewe Abatutsi.

Senateri Prof Laurent Nkusi, Pasitoro Antoine Rutayisire, umushakashatsi Tom Ndahiro n’abandi basomye iki gitabo bavuga ko umwihariko gifite uzatuma abahakana Jenoside bacika intege n’abayipfobya bakabura aho bahera kuko abayikoza bitangiye uuhamya bw’ibyo bakoze.

Imvano y’amazina y’iki gitabo asa n’ahabanye.

Mu cyongereza iki gitabo yacyise: "My son it’s a Long story, Reflections of Genocide Perpetrators" bisobanuye mu kinyarwanda ngo "Muhungu wanjye, ni inkuru ndende: ibyiyumviro by’abakoze Jenoside" na ho mu kinyarwanda cyitwa "Mitingi Jenosideri", ni ibintu bisa naho bidahuye.

Bamporiki avuga ko Mitingi ubwazo na zo ari inkuru ndende, bityo ngo usomye igitabo ahita yumva aho aya mazina ahuriye nubwo asa n’ahabanye iyo urebeye inyuma, aavuga ko ubusobanuro bw’amazina y’iki gitabo bukubiye mu buhamya bukirimo.

Gukoresha ijambo ’Mitingi’ ubusanzwe ritari mu mwimerere w’ikinyarwanda bishingiye ku kuba abajyaga kwica abantu barabanzaga gukora za Mitingi (inama)

Uretse kuba Depite Bamporiki Edourd yandika akanakora ubushakashatsi kuri Jenoside yakorewa abatutsi, yanashinze umuryango Arts for Peace Rwanda ugamije guhangana n’ingaruka za Jenoside yakorewe abatutsi mu Rwanda hagamijwe ubumwe n’ubwiyunge.


Madamu Jeannette Kagame yakira impano yahawe n’umuhanzikazi


Madamu Jeannette Kagame asoma igitabo cyanditswe na Hon Bamporiki


Madamu Jeannette Kagame, Minisitiri w’umuco na Siporo Uwacu Julienne (ibumoso bwe) n’abandi batandukanye mu imurikwa ry’igitabo cya Bamporiki

Dr Bizimana Jean Damascene, umunyamabanga nshingwabikorwa wa CNLG

Ibitabo byacurujwe ari byinshi

Abanyeshuri biga mu mashuri yisumbuye na bo baje mu muhango wo kumurika iki gitabo

Yisangize Inshuti.

Ibitekerezo

Tanga Igitekerezo