Ku Kabaya aho Mugesera yavugiye ijambo rutwitsi ubu higishirizwa Ijambo ry’Imana

1

Aho iyi Paruwasi yubatse, niho Mugesera yavugiye ijambo rutwitsi tariki ya 22 Ugushyingo 1992

Ku Kabaya, mu Kibuga cyavugiwemo ijambo rutwitsi rifatwa nk’iryahembereye Jenoside yakorewe Abatutsi, ubu hasigaye higishirizwa ijambo ry’Imana.

Mu kibuga giherereye imbere gato y’ibitaro bya Kabaya, mu mwaka wa 1992 hari hari gusizwa ngo Kiliziya Gatolika ihubake Paruwasi. Ubu ni mu mudugudu wa Migongo, Akagali ka Kabaya , Umurenege wa Kabaya mu Karere ka Ngororero, mu burengerazuba bw’u Rwanda.

Ngiranabo Thomas, ni umusaza uhatuye kandi uhamaze igihe.Inama yo kuwa 22 Ugushyingo 1992 Dr Mugesera Leon yavugiyemo ijambo rutwitsi na Muzehe Ngiranabo yari ayirimo nk’abandi baturage bose bari bahatuye.

Mu kiganiro yagiranye na Makuruki, Ngiranabo yasobanuye amateka y’aho hantu havugiwe ijambo ryashishikarizaga Abahutu kwica Abatutsi.

Ati: “Mbere hari hasanzwe hari ibibanza bya Minitrape, nyuma Kiliziya Gatolika ikenera kubaka Paruwasi aha. Bamaze kuhasiza ikibanza cyo kubakamo Kiliziya, nibwo habaye inama ya MRND muri Perefegitura ya Gisenyi, bateganya kuyikorera Kabaya kandi ahari ikibuga kinini ni aha hari ikibanza cya Kiliziya, ubwo rero abaturutse muri Superefegitura ya Ngororero na Superefegitura ya Kabaya bahuriye aha.”

Uwo munsi w’inama ya MRND, ngo abaturage benshi bari bahari kandi ngo ntabwo byari byoroshye kwanga kwitabira inama kuko washoboraga kubizira.

Ngiranabo w’imyaka 61 akomeza agira ati “Byari nk’itegeko ko umuntu wese aza muri iyo nama.Uwasigaragara mu rugo bajyaga kumubohoza, ubwo yangaga MRND.”

Yibuka neza amagambo Dr Leon Mugesera wari Umuyobozi wungirije wa MRND muri Prefegitura ya Gisenyi yahavugiye. Ati “Icyo gihe muri za Butaro hariyo intambara, mu Rwanda hari intambara.Yaje aha (Mugesera) aravuga ngo Abatutsi ni abanzi b’igihugu, ngo abo banzi b’igihugu rero bagomba gusubizwa iwabo muri Abisiniya babacishije muri Nyabarongo.Ayo ni amagambo yavuze rwose ku mugaragaro.”

Mu mwaka wa 2016 urukiko rukuru rwakatiye Dr Leon Mugesera igifungo cya burundu. Mu miburanire ye yakunze kugaragaza ko ayo magambo atayemera, ngo ashobora kuba yarasubiwemo.

Ngiranabo avuga ko Kuba Mugesera yarahakanye ko yavuze iryo jambo ari amatakirangoyi. Ati “Nubwo yabihakanye, ni amagambo yavuze, yari amatakirangoyi kuko n’uwo bafatanye intama ayikoreye aravuga ngo sinzi uko yangezeho, uwo bafatiye mu kigega aravuga ngo nanyereye ngwamo.”

Nyuma y’ijambo rya Mugesera, hari abatutsi batangiye kwicwa muri Komini Giciye n’andi makomini byari byegeranye.

Ubu ikibanza Dr Leon Mugesera yavugiyemo iryo jambo, hubatswe Paruwasi ya Kabaya aho abakirisitu bigishirizwa ijambo ry’Imana.

Ndayambaje Godefroid, Meya w’Akarere ka Ngororero avuga ko kuba ahavugiwe ijambo rikomeye nk’iryo rigatuma Abatutsi benshi bicwa ubu hubatswe Kiliziya, ari inyigisho ikomeye.

Ati “Kuba hari paruwasi, ni inyigisho ikomeye.Kuba haravugiwe ijambo rutwitsi ubu hakaba higishirizwa ubutumwa bwiza, abantu bakahasabira imbabazi, nabyo ni ikintu kiza.”

Akarere ka Ngororero gafatwa nk’agakomokamo abacurabwenge ba Jenoside yakorewe Abatutsi.Uretse Leon Mugesera, hanakomoka Gen Mudacumura Slyvestre umugaba mukuru w’ingabo za FDLR.

Meya Ndayambaje avuga ko abaturage ayoboye bahindutse, batakigendera ku myumvire mibi.

Ati “Ntabwo abaturage bakigendera kuri ibyo bitekerezo.Abo bantu bafite n’imiryango hano ariko ntitubarebera mu ndorerwamo nk’iyo ya bene wabo, utishoboye arafashwa nk’abandi baturage kuko icyaha ni gatozi.”

Abatutsi basaga ibihumbi 50 barishwe muri Jenoside yakorewe Abatutsi mu Karere ka Ngororero.Baruhukiye mu nzibutso zirindwi zubatswe muri ako Karere.

Mu mwaka wa 2013, ako Karere kahawe igikombe kubera kuza ku isonga mu bumwe n’ubwiyunge.

Yisangize Inshuti.

Ibitekerezo 1

  1. Ariko ye uyu Thomas Ngiranabo niwe wari umushinjacyaha muri tribunal de premiere instance de Kabaya niwe washyiraga Ku ngoyi abatutsi barimo uwitwaga Karasanyi N abandi bagera Ku ijana yafunze amezi atandatu atarabashyikiriza urukiko ngo bisobanure Ku ngirwacyaha baregwaga.None amateka arahindutse ashatse gusibanganya ibimenyetso byukuntu yakobaguye abatutsi abitwa Karane Rutagaramba yabafunze Atari abashumba b inka zabo gusa ? Ubwo urupfu rwa Kayisiri wigaga muwa gatandatu kuri GS ya Rambura wiriwe mu Rwandarugali muri 1991 dosiye igakorwa nawe yigeze ayikurikirana? Ubwose kubaka urusengero bimeze iki rusengerwamo n abicanyi bamaze abatutsi batarihana? Ndibwira ko CNLG yakagombye gusaba ko hubakwa urwibutso rw abatutsi boherejwe muri Ethiopia Ku itegeko rya Mugesera na Thomas nahumure arye aryame ntacyo azaba abandi bo baraboze.

Tanga Igitekerezo