Irebere ubwiza bw’ikiraro kiri mu bushorishori bwa Nyungwe cyahuruje benshi

Ikiraro kiri mu bushorishori bw’ishyamba rya Nyungwe ni kimwe mu bikurura ba mukerarugendo basura pariki ya Nyungwe ndetse n’isumu rya Kamiranzovu rifite amazi ashimisha benshi.

Iyo uturutse ahitwa k’Uwinka ahakirirwa ba mukerarugendo, umanuka mu nzira yaciwe mu ishyamba rya Nyungwe igera kuri iki kiraro.

Kugera kuri iki kiraro bitwara urugendo rutari rurerure ugereranyije n’urugendo bisaba kugirango ugere ku bindi byiza nyaburanga biri muri Nyungwe, kuko bifata igihe kitari munsi y’iminota 30 kugira ngo ukigereho.

Ba mukerarugendo bageze kuri iki kiraro bongera guhabwa amabwiriza y’uko bitwara n’ushinzwe kubayobora, ngo badashyira ubuzima bwabo mu kaga.

Utubando bari bafite badusiga mu ntangiriro z’ikiraro n’ibindi bintu byose, ubundi bagatangira kukigendaho amaboko afashe imigozi iri ku mpande. Mukerarugendo agirwa inama yo kutareba hasi ngo atavaho azunga isereri.

Igice cya mbere cy’iki kiraro gifite metero 45 z’uburebure, aha ho abanyabwoba baharangiza imitima yabakutse, ikindi gice kingana na metero 90 gikurukiraho ho hateye ubwoba kurushaho ariko ni na ho hari umunyenga uruta iyindi, umuntu aba yibaza ati ndamutse mpanutse byagenda bite? ariko ntibishoboka kuko umuntu aba arinzwe mu mpande zose.

Hari uwateye urwenya ati “abanyabyaha banga kwemera kuki batabazana hano?”

Igice cya nyuma ni metero 25 ho nta bwoba hateye bitewe n’aho umuntu aba yanyuze aba yamaze kumenyera, urugendo rwo kuri iki kiraro rukarangirira aho.

Iki kiraro cyubatswe mu mwaka wa 2010, cyubakwa na kampani yo muri Canada, gitwara amafaranga arenga miliyoni 800. Gifite uburambe bw’imyaka 30 kandi hari abantu bagicungira hafi kugira ngo kitazateza impanuka.

Isumo rya Kamiranzovu rikomoka mu gishanga cya Kamiranzovu na cyo kiri muri pariki ya Nyungwe na ryo rikaba risurwa na ba mukerarugendo batari bake.

Ugiye gusura isumo rya Kamiranzovu, yinjira mu ishyamba aturutse hafi ya Nyungwe Forest Lodge agakora urugendo rw’amasaha 2 agenda mu ishyamba n’amaguru, ni kilometero 6.

Muri iryo shyamba kandi hagaragaramo ibimera bitandukanye ndetse n’amazi atemba ahura n’iri sumo rya Kamiranzovu.

Ukigera kuri iri sumo wumva urusaku rwinshi rw’amazi amanuka, bamukerarugendo baba bakoze urugendo rurerure banananiwe bamwe begera ku rutare ruri hafi y’iryo sumo ubundi utuzi tukajya tubatarukira bakagarura ubuyanja.

Isumo rya Kamiranzovu rifite uburebure bwa metero 50


Belyse Akariza ushinzwe Ubukerarugendo muri RDB hamwe na ba mukerugendo

Ikiraro ni kirekire


abakigezeho akanyamuneza ni kose

Yanze gutaha adafashe urwibutso

Miss Mutesi Jolly ku kiraro cya Nyungwe


Isumo rya Kamiranzovu

Ba mukerarugendo bitegereza isumo


Buri wese arashaka agafoto k’urwibutso


Miss Peace na Miss Mutesi Jolly ku isumo rya Kamiranzovu

Yisangize Inshuti.

Ibitekerezo

Tanga Igitekerezo