Inkwano n’ibirongoranwa, umutwaro uremereye mu bukwe bwo mu Rwanda-RALC

1

Dr Vuningoma James, umunyamabanga nshingwabikorwa wa RALC

Inteko Nyarwanda y’ururimi n’umuco (RALC) yamuritse ubushakashatsi yakoze ku migendekere y’ubukwe mu Rwanda bugaragaza ko inkwano n’ibirongoranwa bisigaye bibera umuzigo abakundanye rimwe na rimwe bigatuma batabana cyangwa bakagorwa no gukora ubukwe.

Mu mpamvu nyamukuru z’ubu bushakashatsi harimo kuba hari ibidahwitse byinshi bisigaye bikorwa mu bukwe nyarwanda kuko hari abatumva impamvu n’uburyo imihango y’ubukwe ikorwa, bityo ugasanga idakorwa kimwe cyangwa ntiyumvikane kimwe hirya no hino mu gihugu

Dr. Nzabonimpa Jacques, Umuyobozi w’Ishami ry’umuco mu Nteko Nyarwanda y’Ururimi n’Umuco avuga inshamake y’ibyavuye muri ubu bushakashatsi yavuze ko ubukwe mu Rwanda busigaye burimo ibibazo n’imbogamizi zikomeye zituma butagenda neza bigatuma bubera umutwaro munini imiryango aho kuba umunezero.

Mu bituma ubukwe buba umutwaro ni ibintu bihenze bikoreshwamo n’inkwano zihenze zisigaye zakwa abasore ndetse bigatuma bamwe batinya gukora ubukwe kuko baba bumva ntaho bazakura izo nkwano ugasaga akenshi abadafite izo nkwano ntibabashije kubana n’abo bakundanye.

Ku rundi ruhande kandi abasore na bo kuri iki gihe ngo basigaye barafashe ubukwe nk’umushinga bungukiramo bakabufata nk’ishoramari kuko baba bavuga bati turashaka ibirongoranwa by’umurengera.

Agaruka kuri izi mbogamizi zose, Dr Nzabonimpa yavuze ko ibi bidakwiriye. Ati: “Inkwano ikwiye kuba ikintu kitaremereye, Ibirongoranwa by’umurengera na byo ni ikibazo” ibi bigaruka ku kuba abantu basigaye bafata inkwano nk’ikiguzi aho kumva ko ari ishimwe ry’ababyeyi nyamara bamwe basigaye baciririkanwa nk’abagura itungo.

Ikindi cyagaragajwe muri ubu bushakashatsi ni ukutubahiriza amabwiriza agenga imihango y’ubukwe mu Rwanda aho abantu basigaye bajya gusezerana mu mategeko mbere yo gusaba no gukwa.

Ikindi ni uko abantu batagiha agaciro umuryango mu muhango w’Ubukwe, nyamara RALC ikavuga ko ubukwe budafite umuryango buba bufite ikibazo kuko ubukwe ni ubw’umuryango.

Bitewe nuko hari ababyeyi bagifite amacakubiri ashingiye ku bwoko n’amadini, urubyiruko ngo rusigaye ruheza ababyeyi mu gutegura ubukwe no guhitamo abo bazabana kuko baba bakeka ko bababuza kubana, hari kandi abatabibwira ababyeyi babo kuko baba ari bwo bagitangira gukundana bagahita bapanga ubukwe nta minsi bamaze bakundana.

Ikindi gituma ababyeyi badahabwa umwanya, ngo ni uko hari abaterwa ipfunwe n’uko ababyeyi babo bameze cyangwa uko basa. Ikibazo cyibajijwe kuri iyi ngingo ni iki ngo: “ Iyo umuryango uhejwe, ubukwe buba ubwa nde?”

Ba shuga dadi, shuga mami, guhererekanya abakunzi, kuryamana mbere y’ubukwe (avanse), abitwa abapfubuzi, n’indi myitwarire idahwitse na byo bibangamiye umuhango w’ubukwe ubundi abanyamadini bita ko ari umuhango wera.

Dr Vuningoma James, umunyamabanga nshingwabikorwa w’inteko nyarwanda y’ururimi n’umuco we avuga ko Ubukwe budafite umuryango buba bufite ikibazo kuko ahamya ko ubukwe ari inkingi ikomeye ifasha gushinga no gukomeza umuryango.

Abwnshi mu bakozweho ubushakashatsi, bagaragaje ko nibura inkwano yaba inka imwe cyangwa agaciro gahwanye na yo mu gihugu hose, mu rwego rwo korohereza abagiye kurushinga.


Umuyobozi w’Ishami ry’Umuco, Dr. NZABONIMPA Jacques

Yisangize Inshuti.

Ibitekerezo 1

  1. ibyo umuyobozi yavuze nukuri umukobwa asigaye ari nkiduka ryababyeyi ariko ingaruka iba kubana kuko bituma umwana agira imyaka 35cg40 atarashaka kdi afite inshuti bigatuma bajya bisambanira(kubadakijijwe) rimwe narimwe ugasa babyaranye batari babana . ABABYEYI NUKWISUBIRAHO

Tanga Igitekerezo